Naammuanda nga Ay-ayaten Ida ti Dios

Marigatan ti dadduma a mamati nga adda asinoman​—wenno uray pay ti Dios​—a mabalin a mangayat unay kadakuada. Isu a kalpasan a nabasada ti libro nga Umadanika ken Jehova, adu ti nagsurat iti panangapresiarda iti pammatalged nga ipaayna. “Ingget ragsakko idi naammuak a kasta unay ti panagayatna kaniak, agpapan pay iti amin a pagkurkurangak,” insurat ti maysa a babai a taga Decatur, Illinois, E.U.A.

Kastoy pay ti insuratna: “Makasangitak gapu iti rag-o idi nabasak ti sasao [iti panid 117]: ‘Kas maysa nga Ama nga addaan iti kinahustisia, wenno nalinteg, ti kinainget ni Jehova a maipaay iti umiso ket timbengenna iti nadungngo nga asi kadagiti naindagaan nga annakna, nga agkasapulan iti tulong ken pammakawanna.’”

Kastoy ti insurat ti maysa a lalaki a taga Ripon, California: “Pagyamanan unay iti panangipaawatyo kaniak a talaga nga ay-ayatennak ni Jehova. Saanak laeng gayam a maysa a numero iti listaan a papel.” Kinuna ti maysa a babai a taga New Hampshire: “No dadduma, diak kayat nga isardeng a basaen dayta a libro.” Inlawlawagna: “Marigatanak idi a mamati a talaga a mabalinnak nga ayaten ni Jehova.” Isu a ti libro ti eksakto a kasapulanna.

Patienmi a mabenepisiarankanto met a mangbasa iti daytoy a libro. Kalpasan ti tallo a panglukat a kapitulo, nabingay dayta iti uppat a paset a napauluan iti “Nakired iti Pannakabalin,” “Managayat iti Kinahustisia,” “Masirib iti Puso,” ken “Ti Dios ket Ayat.” Tunggal paset ti mangipaganetget iti kangrunaan a galad ti Dios. Agngudo daytoy makaparegta a libro babaen ti kapitulo nga “Umadanikayo iti Dios, ket Isu Umadaninto Kadakayo.”

Mabalinmo ti agkiddaw iti daytoy 320 ti panidna a libro a naingpis a karton ti akkubna babaen ti panangsuratmo iti naipakuyog a kupon ken ibusonmo dayta iti adres a naipaay wenno iti maitutop nga adres iti panid 5 daytoy a magasin.

□ Mabalin kadi nga agkiddawak iti kopia ti libro nga Umadanika ken Jehova nga awan aniaman a bayadak?

□ Interesadoak iti libre a panagadal iti Biblia.