Ti Nagan ti Dios iti Kastilio Idi Edad Media
Ti Nagan ti Dios iti Kastilio Idi Edad Media
BABAEN TI MANNURAT TI AGRIINGKAYO! IDIAY SLOVAKIA
BASSIT ti Slovakia ngem nakapimpintas a pagilian iti tengnga ti Europa. Iti nadumaduma a paset ti namarangmang nga away, adda dagiti kastilio nga agserbi a monumento iti nabayagen ken napateg a pakasaritaan ti rehion. Karaman kadagiti naisangsangayan unay ti Orava Castle. Naibangon dayta iti rabaw ti 112 a metro a tisa a bato a tumannawag iti kabangibang a bario.
Idi 1267 ti damo a nakadakamatan ti Orava Castle. Sipud idin, nadumaduma ti nangtagikua iti dayta a kastilio. Idi 1556, tinagikua dayta ti nabaknang a pamilia Thurzó. Ti inaramid ti pamilia Thurzó a kapilia ti kastilio ket maysa kadagiti nangpapintas ken nainayon iti dayta.
Kada tawen, araken ti pinullo a ribu a turista manipud iti adu a pagilian ti Orava Castle ken dagiti eksibitna. Iti paraangan, adda makita dagiti turista a naisangsangayan a naikitikit iti panaraten a bato a simbolo ti pamilia Thurzó. Iti lenguahe a Latin, naikitikit iti dayta ti Jehova—ti dakdakamaten ti Biblia a nagan ti Dios.