Naipasngay iti Di Naasi a Lubong!
Naipasngay iti Di Naasi a Lubong!
MAIPASNGAY ti maysa a maladaga iti naranggas, di naasi, ken nariribuk unay a lubong. Nupay di mayebkas ti maladaga dagiti riknana, patien ti adu a sientista a sakbay pay a maipasngay ti sikog, ammonan ti mapaspasamak.
Kastoy ti kuna ti libro a The Secret Life of the Unborn Child: “Pagaammotay itan nga adda ammo ken reaksion ti di pay naipasngay kas natauan a parsua sipud iti maikanem a bulanna ken agtultuloy (ken nalabit nasapsapa pay) nga agbibiagen nga addaan rikna.” Nupay mabalin a di malagip ti ubing, pampanunoten ti dadduma a sientista no ti rigat a napasaranna iti pannakaipasngayna ket talaga a mangapektar iti biagna inton nataenganen.
Kalpasan ti pannakaipasngay, agtultuloy ti rigat. Iti ruar ti aanakan, ti ubing saanen nga automatiko a mapakan. Napugsaten ti puseg a mangipaay iti oksihena ken taraonna. Tapno agbiag, masapul a mangrugin nga aganges ken mangan a bukodna. Kasapulanna ti mangpakan kenkuana ken mangaywan kadagiti pisikal a kasapulanna.
Masapul met a mapatanor iti kappasngay ti mental, emosional, ken naespirituan isu a masapul nga adda mangtaripato kenkuana. Siasino ti kasayaatan a mangtaripato? Ania ti kasapulan ti ubing kadagiti dadakkelna? Kasano ti kasayaatan a panangipaay kadagitoy a kasapulan? Makatulong dagiti sumaganad nga artikulo a mangsungbat kadagitoy a saludsod.