Dagiti Maburburibor nga Isip

ADDA dagiti tiempo a malmaldaang ni Nicole sipud pay idi agtawen iti 14. Ngem idi 16 ti tawennan, naisangsangayan ti kinaragsak ken kinaganaygayna. Adu ti mapampanunotna, agkakanat ti ibagbagana, di makaturturog ken kasta met awan gapgapuna nga agsuspetsa a gunggundawayan dagiti gagayyemna. Simmaganad, ibagbaga ni Nicole a mapaggaraw wenno mabalbaliwanna ti kasasaad dagiti awan biagda a bambanag ken masukatanna ti kolor dagitoy no kayatna. Gapu iti kastoy nga ibagbaga ni Nicole, nadlaw ni nanangna a masapul nga ipadoktorna, isu nga impanna ni Nicole idiay ospital. Kalpasan a napaliiw a naimbag ti agbaliwbaliw a rikna ni Nicole, nadayagnos met laeng dagiti doktor: Adda sakit ni Nicole a bipolar disorder. *

Kas ken Nicole, minilion iti intero a lubong ti agsagsagaba iti mood disorder​—bipolar disorder man wenno dadduma a kita ti clinical depression. Mabalin a makariribuk ti epekto dagitoy a sakit. “Adun a tawen a madandanaganak,” kuna ni Steven nga addaan iti sakit a bipolar disorder. “Napasarak ti nakaro a panagleddaang ket kalpasanna, nakaragragsakak. Nakatulong ti therapy ken panagtomar ti agas, ngem kaskasdi a narigatanak.”

Ania dagiti pakaigapuan ti mood disorder? Kasano aya ti kasasaad ti maaddaan iti depression wenno bipolar disorder? Kasano a maipaayan dagiti agsagsagaba ken dagiti agay-aywan iti panangandingay a kasapulanda?

[Footnote]