Manipud Kadagiti Agbasbasa
Manipud Kadagiti Agbasbasa
Diabetes Naimpusuan nga agyamanak gapu iti serye a “Panangibtur iti Diabetes.” (Mayo 8, 2003) Ib-ibturak ti diabetes sipud pay idi uppat ti tawenko. Sangkapanunotko idi a diakton mabalin ti makiasawa ken agserbi iti amin a tiempo, ngem dagitoy nga artikulo ti nangted kaniak iti namnama. Ita ta agtawenakon iti 17, kalatko ti agserbi iti amin a tiempo, ket ikagumaak a ragpaten dayta.
T. A., Japan
Para kaniak, makatulong unay ti singasing para iti pamilia ken gagayyem a dida paregtaen dagiti addaan iti diabetes a mangan iti maikontra iti sakitda. Narigat nga ilutuan ti pamiliak ta diak mabalin a kanen dagiti linutok. Kadagiti awan diabetesna, kasla awan ti kaimudingan daytoy, ngem siguradok a saan a kasta!
V. N., Italia
Maysaak a nars ken maestra. Inton sumaganad a semestre, isurokto dagiti estudiantek maipapan iti diabetes. Nalaka a maawatan ti ilustrasion iti panid 8 ken 9, isu nga usarekto dayta iti panagisurok. Pagyamanan iti panangipablaakyo kadagiti napasimple nga artikulo maipapan iti medikal a suheto.
C. B., Francia
Pagyamanan kadagiti artikulo maipapan iti diabetes. Awan diabetesko, ngem adda diabetes ti 14 ti tawenna nga adingko a babai. Maawatak itan ti sagsagabaen ni adingko. Agpayso nga adu ti ar-aramidenmi a panagsakripisio para kenkuana, ngem narigrigat iti aktual a panangibtur iti diabetes!
E.D.M., Italia
Lima a tawenen nga addaan iti diabetes ni nanangko. Masansan a madanaganak iti salun-atna, gapu ta adayo ti pagnanaedak. Panggepko a patulodan iti kopia daytoy a magasin. Mabalin a makatulong dayta uray no awanak.
R. W., Indonesia
Pannakadunor Naragsakanak a nangbasa iti “No Kasano a ti Pannakadangran Binalbaliwanna ti Biagko.” (Abril 22, 2003) Tultulongannak daytoy nga artikulo a mangdaer iti pannakadunor ti bukotko nasurok a 30 a tawenen ti napalabas. Napasarak met ti adu kadagiti napasaran ni Kabsat Stanley Ombeva. Naliwliwaak a nakaammo a ti Sao ti Dios ti tumultulong iti maysa a tao nga agpannuray ken ni Jehova.
G. G., Estados Unidos
Napikapikak unay iti nalawag a panangiladawan ni Kabsat Ombeva iti reaksionna iti pisikal a depektona. Natignayak nga agpakumbaba idi naamirisko nga awan ti kaimudingan dagiti problemak no idilig kadagiti problemana. Daytoy nga artikulo ti nakatulong kaniak a mangpanunot kadagiti bendision a sagsagrapek.
S. C., Canada
Naisangsangayan! Dayta a sao ti pangdeskribirko iti daytoy nga artikulo. Apaman a rinugiak a binasa, kayatko nga ungpoten. Mamagpanunot nga anagen no kasano a nagbalin a nakapatpateg dagiti Kasuratan idi kasapulan unay ida ni Kabsat Ombeva. Dayta ti makatulong kaniak tapno ad-adda a makipagriknaak iti sabsabali.
R. G., Estados Unidos
Naparegtaak a nangammo a maupay uray ti maysa a Kristiano nga agserserbi kas panglakayen iti kongregasion ken mabigbigna a nasken a daeranna ti kasta a kasasaad. Imbaga ni Kabsat Ombeva nga uray marigatan unay idi, saan a pulos a nagbalin nga iregular iti ministeriona. Determinadoak nga agbalin met a kasta.
M. K., Japan
Namin-adu a natnagak idi ubingak isu nga agsagsagabaak ita. Kanayon nga agpapaut-otak, marigatanak a magna, ken nakapuyak. Ay-ayek ti bagik gapu kadagiti limitasionko iti Nakristianuan a ministerio. Ngem nakatulong kaniak ti panangbasak iti panangdaer ni Kabsat Ombeva iti parikutna. Pagyamanan unay!
E. E., Estados Unidos