Makita ti Nagan ti Dios Kadagiti Kadaanan a Pasdek
Makita ti Nagan ti Dios Kadagiti Kadaanan a Pasdek
BABAEN ITI MANNURAT TI AGRIINGKAYO! IDIAY SLOVENIA
Sinigsiglon a naibangon dagiti simbaan ken monasterio iti tapaw ti katurturodan ti intero a Europa. Dagitoy kadaanan a pasdek ket naaramid iti estilo Romanesque idi Edad Media, nga addaan kadagiti gagangay a napuskol a diding ken kurbado nga arko, agingga iti naarte a naisangsangayan nga estilo baroque ti simmarsaruno a siglo. Makapainteres ta makita ti Tetragrammaton, ti uppat a Hebreo a letra ti personal a nagan ti Dios iti uneg ti adu kadagitoy a pasdek.
Kas pagarigan, kitaem ti monasterio ti Stična, a maysa kadagiti kabayaganen a monasterio ti orden a Cistercian ditoy Slovenia. Naibangon dayta idi 1135, agarup 40 a tawen kalpasan a naipasdek ti orden dagiti monghe ken madre a Cistercian idiay Francia. Nupay namin-adun a natarimaan ti monasterio, adda pay laeng ti orihinal nga estilo Romanesque, nupay naarkosan itan iti estilo baroque. Naarkosan ti unegna iti nadumaduma a lamina ken estatua. Maysa kadagiti makinsikigan nga altar ti naarkosan iti dadakkel a balitok a letra ti Tetragrammaton a nagtimbukel a pirak ti nakaibaskaganna.
Ti ili ti Slovenj Gradec ket damo a nadakamat kadagiti naisurat a rekord idi maikasangapulo a siglo. Naibangon sadiay ti estilo Gothic a simbaan ken ospital idi 1419. Ti intero a diding ti makin-uneg nga estruktura ket bin-ig a lamina idi maika-15 a siglo a mangiladawan iti 27 nga eksena iti Biblia. Mangrugi dayta iti panagungar ni Lazaro ket agpatingga iti Pentecostes. Iti sabali pay a paset ti isu met la a pasdek, makita ti Hebreo a nagan ti Dios a naisurat iti nangisit a letra iti balitok nga aglawlawna.
Ti ili ti Radovljica ket adda iti makin-amianan a laud a paset ti pagilian. Idi maika-15 a siglo, ti bassit a purok ket nalikmut kadagiti pader ken kanal. Iti unegna, adda maysa a kastilio, simbaan, ken nadumaduma pay a pasdek. Naisurat ti Tetragrammaton iti balitok a plake iti maysa kadagiti altar ti simbaan.
Iti asideg ti bassit a bario ti Podčetrtka, adda kadaanan a monasterio a naibangon idi maika-17 a siglo. Iti unegna, ti managpaliiw unay makitana ti nagan ti Dios a nayarkos iti lamina.
Ti Tetragrammaton ket mabalin a makita iti adu pay a kadaanan a pasdek ditoy Slovenia. Gapuna, bayat nga ap-apresiaren dagiti turista ti kinalaing ken kinasigo dagiti artesano idi ugma, mabalin a maammuanda a dagiti umili idi un-unana ket pamiliar iti nagan ti Dios.
[Ladawan iti panid 31]
Makinsikigan nga altar iti monasterio ti Stična
[Ladawan iti panid 31]
Iti simbaan ti Sveti Duh idiay Slovenj Gradec
[Credit Line]
Slovenj Gradec-Cerkev Sv. Duha, Slovenija