Manipud Kadagiti Agbasbasa

Matematika Nagustuak a binasa ti artikulo nga “Agpaay iti Amin ti Matematika.” (Mayo 22, 2003) Masdaawak a kanayon kadagiti numero. Kas iti kinunayo, ni Jehova a Dios ti Kangrunaan a Matematiko, ken sigurado nga inton baro a lubong, ad-adu pay ti masursurotayo amin maipapan iti lohika dagiti numero. Pagyamanan unay iti praktikal nga impormasion.

G. C., Britania

Talaga a nakatulong kaniak daytoy nga artikulo. Idiay eskuelaan, kagurgurak unay nga asignatura ti matematika. Diak maawatan uray no dumngeg ken aginotarak. Ngem kalpasan a binasak daytoy nga artikulo, panagkunak laklakaekton dayta. Agyamanak ta impablaakyo daytoy nga artikulo. Sangapulo ket tallo ti tawenko.

Y. I., Japan

Maibagay kaniak daytoy nga artikulo! Sangapulo ket lima ti tawenko ket saanak a nalaing iti matematika. No kitaek dagiti problema iti matematika, kunak iti un-unegko, ‘Diakto met la mausar daytoy inton nataenganakon, isu nga apay koma nga adalek pay.’ Ngem gapu iti daytoy nga artikulo, naawatak a nagadu ti maitulong ti matematika. Isu nga inkeddengko itan a lalaingek ken saanak a sumuko. Pangngaasiyo ta itultuloyyo ti agipablaak iti ad-adu pay nga artikulo a kas iti daytoy!

M. N., Japan

Dagiti Alinta Nagustuak ti makapakatawa a ladawan a nangyilustrar iti artikulo a “Ti Nakaay-ayat a Lubong Dagiti Alinta.” (Mayo 8, 2003) Nangruna nga apresiarek dagitoy a pangtulong iti memoria. Gapu kadagitoy a ladawan, nalaka a malagipko dagiti linaon daytoy nga artikulo.

M. Z., Italia

Sangapulo ket maysa ti tawenko ken kanayon a masmasdaawak idi no apay a nakagalgalis dagiti alinta ngem ita ammokon ti makagapu. Impagarupko met idi nga adda maymaysa a kita ti alinta. Diak pulos impagarup nga adda gayam nasurok a 1,800 a kita ti alinta! Itultuloyyo ti agsurat kadagiti makaisuro nga artikulo a kas iti daytoy.

T. C., Estados Unidos

Pannakadangran Pagyamanan iti artikulo a “No Kasano a ti Pannakadangran Binalbaliwanna ti Biagko.” (Abril 22, 2003) Inyebkas ni Kabsat Ombeva dagiti mismo a riknak. Agsagsagabaak iti fibromyalgia ken dadduma pay a sakit. No dadduma, napalalo ti ut-otna isu nga awanen ti maaramidak no di ti agsangit. Masapul nga agtalekak a naan-anay ken Jehova tapno mapabilegak nga agibtur. Kas iti kinuna ni Kabsat Ombeva, dakkel ti maitulong ti panangmennamenna kadagiti makaliwliwa a teksto. Ni lakayko ket maysa met a sadiri iti panawen ti rigatko. Pagyamanan kadagita nga artikulo.

C. F., Estados Unidos

Adda nagligasi iti duri ni lakayko gaput’ pannakaaksidentena idi iti trabahona. Napasaranmi met dagiti negatibo a rikna ni Kabsat Ombeva. Naidagelkami iti kasasaad a dimi makontrol. Naldaangak unay a makakita iti panagsagaba ni lakayko iti napalalo nga ut-ot ken maammuan a nagbassit ti maaramidak a mangep-ep iti dayta. Dua a tawen ti napalabasen ket kaskasdi nga ib-ibturanna dagiti ut-ot ngem saanen a kas idi. Kadagiti nagrigat a tiempo, pinabilegnakami ni Jehova ken itultuloyna nga ipakpakita ti naayat a pannakaseknanna babaen kadagiti artikulo a kas iti daytoy. Pagyamanan unay!

A. S., Estados Unidos

Agimtuod Dagiti Agtutubo Sangapulo ket innem ti tawenko ket ages-eskuelaak iti haiskul. Adu dagiti karit ken pakarigatan nga ita pay laeng a mapasarak. Talaga a mariknak dagiti epekto ti panangimpluensia ti kakadua. Gapu kadagiti artikulo ti “Agimtuod Dagiti Agtutubo,” naamirisko ti kinapateg ti panagbasa ken panagadal iti Biblia. Talaga nga apresiarek ti pannakaseknanyo kadagiti tin-edyer. Masansan a mariknak a dagita nga artikulo ket nairanta a naisurat para kaniak!

S. R., Estados Unidos