No Kasano a Maammuam ti Nagan ti Dios

MAYSA a kolumnista iti periodiko ti nakaawat iti surat ti maysa a managbasa: “Iti intero a panagbiagko pinampanunotkon daytoy a saludsod, ket sapay koma ta masungbatanyo. Ania ti nagan ti Dios? Ibaga dagiti Judio a napukawen ti pudno a nagan ti Dios bayat ti panaglabas ti panawen. Dagiti Kristiano ti mangawag Kenkuana iti Jesus. Allah ti pangawag dagiti Muslim Kenkuana. . . . Gapuna, ania ngarud ti nagan ti Dios?” Impablaak ti periodiko ti saludsod agraman daytoy a sungbat: “Sigun iti pannursuro dagiti nagkauna a Hebreo, mannakabalin-amin ti Dios, isu a mabalin nga ipanagan ti aniaman a nagan. Ngem ipasiguradok kenka  nga ipangagnaka no siraraem nga aramatem ti aniaman a nagan a mapanunotmo.”

Gagangayen ita ti kasta a di panangikabkabilangan iti nagan ti Dios. Nupay relihiosoda, adu a mamati iti Biblia ti di mangpampanunot iti nagan ti Dios. Ngem kasano ti panagrikna ti Dios maipapan iti dayta? Bassit la kadi a banag dayta kenkuana?

Saan a Bassit a Banag

Amirisem ti kinapudno a naminribu a dinakamat ti Biblia ti personal a nagan ti Dios. Iti Baro a Lubong a Patarus ti Nasantuan a Kasuratan, agparang ti nagan ti Dios iti 7,210 a daras! * Ti Dios a mismo ti nangpaltiing kadagiti mannurat ti Biblia a sipapanayag nga usarenda ti naganna. Kastoy ti insurat ti maysa kadagitoy a mannurat a ni salmista Asap: “Sika, nga agnagan Jehova, sika laeng ti Kangatuan iti intero a daga.” (Salmo 83:18) Insurat met ni David iti maysa a salmo: “No maipapan iti nagan ni Jehova a Diostayo dakamatentayto.”​—Salmo 20:7.

Ipakita ti Biblia a sukimaten ni Jehova a Dios ti pusotayo tapno maammuanna no ipatpategtayo wenno saan ti naganna. Kinuna ti salmista: “No linipatanmi ti nagan ti Diosmi, . . . saan aya a sukimatento daytoy ti mismo a Dios? Ta ammona dagiti palimed ti puso.” (Salmo 44:20, 21) Insurat ni mammadto nga Isaias: “Agyamankayo ken Jehova! Umawagkayo iti naganna. Ipakaammoyo kadagiti ili dagiti pannakilangenna. Dakamatenyo a ti naganna naitan-ok.”​—Isaias 12:4.

 Kinuna a mismo ti Dios: “Kasapulanto a maammuanda a ti naganko ket Jehova.” (Jeremias 16:21) Iti sabali nga okasion kinunana: “Sigurado a santipikarekto ti naindaklan a naganko, a matabtabbaawan idi iti tengnga dagiti nasion, . . . ket kasapulanto a maammuan dagiti nasion a siak ni Jehova.” (Ezequiel 36:23) Dadduma kadagitoy a sasao ti mangipatuldo nga addanto tiempo a makapungtot ni Jehova kadagiti di mangraraem iti naganna. Saan a bassit la a banag iti Dios daytoy nga isyu maipapan iti personal a naganna.

Asideg ni Jehova a Dios Kenka

Kasano a maammuam ti nagan ti Dios? Ania ti kaipapanan ti panangammo iti nagan ti Dios? Sumungbat ti Biblia: “Agtalekto kenka dagidiay makaam-ammo iti naganmo.” (Salmo 9:10) Nalawag nga ad-adu pay ti ramanen ti panangammo iti Dios ngem ti basta panangammo iti naganna. Masapul nga agtalekka kenkuana. Kaipapanan dayta a masapul nga ammom no ania a kita ti Dios ken ammuem dagiti galad ken pampanunotna. Daytoy ti mangtignay kenka nga agtalek kenkuana.

Maawatam laeng ti galad ti Dios a ni Jehova no basaem ken adalem a sipapasnek ti Biblia. Inkarina a salaknibanna dagiti mangipatpateg kenkuana ken iti naganna. Maipapan kadagiti mangaramid iti kasta, kinuna ti Dios: “Agsipud ta kaniak insaadna ti panagayatna, isu ilisikto met. Salaknibakto agsipud ta naammuanna ti naganko. Umawagto kaniak, ket sungbatakto. Addaakto kenkuana iti riribuk. Isu alawekto ket padayagekto. Iti kaatiddog ti al-aldaw isu pennekekto, ket ipakitakto kenkuana ti panangisalakanko.”​—Salmo 91:14-16.

Anian a nagsayaat ti pannakilangen ni Jehova a Dios kadagidiay makaammo iti naganna! Mabalin a tagiragsakem met ti kasta a relasion. Iti naimpusuan a karkararagmo, dika bumdeng a mangusar iti naganna. Sumungbatto agsipud ta kas kuna ti Biblia, “saan nga adayo iti tunggal maysa kadatayo.”​—Aramid 17:27.

[Footnote]

[Kahon/Ladawan iti panid 11]

Ammo ti Dios ti Naganmo

Kinuna ti Dios ken Moises: “Am-ammoka iti nagan.” (Exodo 33:12) Daytoy ti paneknekan ti nakalatlatak a salaysay maipapan iti sumsumged a bassit a kayo. Kuna ti Biblia a ti Dios ‘inawaganna manipud tengnga ti siitan a bassit a kayo ket kinunana: “Moises! Moises!”’ (Exodo 3:4) Daytoy ket maysa laeng kadagiti pagarigan a namin-adu nga inawagan ti Dios dagiti tattao kadagiti personal a naganda. Nabatad a ti Namarsua iti uniberso ket interesado iti tunggal maysa kadatayo.

Kuna ti Biblia nga ammona ti nagan ti tunggal maysa kadagiti binilion a bituen. (Isaias 40:26) Ad-adda pay nga ipatpategna dagiti tattao nga agdaydayaw kenkuana! Insurat ni apostol Pablo nga “ammo ni Jehova dagidiay kukuana.” (2 Timoteo 2:19) Ipasimudaag daytoy a saan laeng a basta ikabesana dagiti naganda. Am-ammo ti Dios dagiti agdaydayaw kenkuana. Masapul nga ammotayo met ti nagan ti Dios ken ammotayo dagiti galadna.

Ti maudi a libro ti Biblia deskribirenna ti piguratibo a libro a pangisuratan ti Dios kadagiti nagan ti amin nga agdaydayaw kenkuana iti intero a historia. Maawagan daytoy a libro “iti lukot ti biag” agsipud ta mangipaay ni Jehova a Dios iti biag nga agnanayon kadagidiay naisurat ti naganda iti dayta. (Apocalipsis 17:8) Daytoy ti naragsak a namnama dagidiay makaammo iti nagan ti Dios.

[Kahon/Ladawan iti panid 12]

Inwaragawagda ti Nagan ti Dios

● Ti kanta ni Moises sakbay la unay a simrek ti Israel iti Naikari a Daga: “Ideklarakto ti nagan ni Jehova.”​—Deuteronomio 32:3.

● Ti sasao ni David iti higante a ni Goliat: ‘Umayak kenka nga addaan iti nagan ni Jehova ti buybuyot.’​—1 Samuel 17:45.

● Ti sasao ni Job kalpasan a napukaw ti amin a sanikuana ken kellaat a natay ti amin nga annakna: “Ti nagan ni Jehova agtultuloy koma a mabendito.”​—Job 1:21.

● Ni apostol Pedro a nangadaw iti Hebreo a Kasuratan iti palawagna: “Tunggal maysa nga umawag iti nagan ni Jehova maisalakanto.”​—Aramid 2:21.

● Ni mammadto nga Isaias: “Agyamankayo ken Jehova! Umawagkayo iti naganna. . . . Dakamatenyo a ti naganna naitan-ok.​—Isaias 12:4.

● Ni Jesus Kristo a mangisursuro kadagiti adalanna nga agkararag: “Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo.’”​—Mateo 6:9, 10.

● Ni Jesu-Kristo nga agkarkararag iti Dios: “Imparangarangko ti naganmo.”​—Juan 17:6.

● Ti Dios a makisasao iti ilina: “Siak ni Jehova. Dayta ti naganko; ket iti asinoman a sabali saanko nga ited ti bukodko a dayag.”​—Isaias 42:8.