Tinawen a Milagro Idiay Namaqualand

BABAEN ITI MANNURAT TI AGRIINGKAYO! IDIAY SOUTH AFRICA

Amin a kolor dagiti sabong ti bin-ig a makitatayo iti tay-ak. Masansan a di malapdan dagiti sangaili ti napalalo a ragsakda bayat a makitkitada a mismo ti tinawen a milagro wenno naisangsangayan a pasamak idiay Namaqualand. “No damo a makitam,” kinuna ti maysa a biahero, “kunam la no narunaw a lava dagiti natayengteng a maris kahel a sabong nga in-inut nga agay-ayus manipud iti amin a rengngat ken rikki.”

Ngem apay a makapaamanga unay daytoy partikular a panagsasabong no primavera? Nalawa ken natikag a rehion ti Namaqualand iti makin-amianan a laud ti South Africa. Iti labes ti kabambantayan iti amianan, ti Orange River ti makin-amianan a beddeng daytoy a rehion. Dakdakkel ngem iti Switzerland (agarup 50,000 a kilometro kuadrado) ti Namaqualand, nga agpaabagatan iti agarup 200 a kilometro a kagudua laeng iti kaadayona nga agpa-Cape Town. Iti kaaduan a bulan ti tawen iti langalang nga aglawlaw, dumanon agingga iti 40 a degree Celsius ti kinapudotna no aldaw sa makapaketter a menos 8 a degree Celsius no rabii. Dandani awan danum ken adda bassit a naambal a danum iti uneg ti daga isu a kasla saan a napintas ti Namaqualand​—malaksid no dumteng daytoy tinawen a milagro!

Kada tawen, kalpasan unay ti nepnep, manipud iti nasapa a paset ti Agosto agingga iti ngalay ti Setiembre, kellaat nga agsabong ti kadawyan a natikag a kapatagan. Agsabong iti maris kahel, duyaw, rosas, puraw, nalabaga, asul, ken lila ti intero a tay-ak. Maragsakan unay dagiti sangaili manipud iti intero a lubong a mangbuya iti daytoy a kinaaglaplapusanan dagiti sabong gapu ta iti kada tawen, agpaut laeng dayta iti sumagmamano a lawas.

Nakapimpintas ti aglawlaw gapu ta kalkalainganna ti kaadu ti tudo sa masansan nga aginit. Idawdawat ti amin a saan a dumteng ti wayaway ta dagus nga aglaylay ken agkupas dagiti sabong.

Nakapimpintas met ti tay-ak ti Namaqualand gapu iti panagtubo ti nagadu a bukel. Ngem adu kadagiti sabong ti saan nga agtubo iti kada tawen​—agsabongda laeng kadagiti espesipiko a paniempo. Bayat nga agtubo ti dadduma a bukel kalpasan laeng ti makatawen, nabayag a saan nga agtubo ti dadduma, ta agur-urayda kadagiti umiso a kasasaad. “Dadduma a bukel,” inlawlawag ti maysa a sangaili, “ti masalsalakniban iti natalged a proseso ti panagtubo isu a dida agtubo a nasapsapa ngem iti umiso a tiempo. Imbes nga agtuboda kalpasan ti naminsan a panagtudona no panawen ti pudot, agtubo laeng dagita  a bukel no nalamiis ken naagneb​—a maitutop iti panagdakkel, ken panagbiagda iti daytoy di makaay-ayo nga aglawlaw.”

Depende iti kalkalainganna a panagtudo ken awan ti manglaylay nga angin, adda naisangsangayan a mabuya, ken iti dadduma a tawen, adda napimpintas pay a mabuya. Kastoy ti inlawlawag ti libro a Namaqualand​—South African Wild Flower Guide: “Gapu ta adda espesipiko a temperatura a mangikeddeng iti panagtubo ti tunggal kita, ken ti damo a panagarbisna ket manipud Abril agingga iti Hulio (bulbulan nga addaan agsasabali a temperatura), tinawen nga agtubo ti nadumaduma a kita, depende no kaano ti damo a panagtudona.”

Anian a nagadu a klase ti sabong​—nasurok nga 4,000 a kita, a tunggal maysa ket addaan iti bukodna a sukog, kolor, ken pamay-an ti panagtubo! Iti dadduma a disso, makita ti 10 inggat’ 20 a nadumaduma a kita ti sabong iti sangametro kuadrado laeng a disso. Ti kinaranga ti lugar ti mamagbalin nga awan kaimudingan dagiti kolor nga us-usaren ti maysa a pintor. Kasla kurang uray ti nalabor ken nasabsabongan a sasao a mangiladawan iti ingget kinaranga ti Namaqualand.

Nupay kasta, inspirado dagiti artist, dumadaniw, ken mannurat no makitada dagita a makapaamanga a nagpipintas a sabong. “Naisangsangayan dayta nga aldaw a panagmula ti daga,” kinuna ti maysa a dumadaniw a taga South Africa a ni D. J. Opperman, “no . . . agregreg manipud abut ti supot ti Apo dagiti napateg a bukel ti sabsabong.” Kastoy ti insurat ti maysa a manangapresiar nga agbuya: “Kas man la agakar-akar a bullalayaw iti intero a desierto a let-ang, a mangisaknap iti nadumaduma a maris iti amin a disso.” Malagip ti maysa a sangaili: “Ti makitam a bin-ig a kinapintas ti manggutugot kenka a mangapresiar iti kasta unay a kinaparabur ken kinasirib ti Namarsua kadatayo a ni Jehova.”

Kanayonanna, ti kinaranga ti tinawen a milagro iti Namaqualand ti mangipasigurado kadatayo a kabaelan ti Namarsua nga usaren dagita a proseso ti panagbiag dagiti sibibiag a banag tapno agbalinto manen a Paraiso ti intero a daga​—agpaay iti agnanayon a pakaragsakan dagiti matalek ken manangapresiar nga adipenna. (Salmo 37:10, 11, 29) Kalpasanna, iti nasaksaknap a pamay-an, “ti desierto agrag-onto, ket agsabongto dagiti let-ang.”​—Isaias 35:1, Today’s English Version.

[Ladawan iti panid 24, 25]

Napno kadagiti sabong ti intero a tay-ak nga agarup 50,000 a kilometro kuadrado