Agimtuod Dagiti Agtutubo . . .

Ania ti Pagdaksan ti Phone Sex?

SIGUN iti maysa nga agdinamag a magasin idiay America, ti “phone sex ti nangsukaten iti surat ti pammateg kas ti ad-adda a matarigagayan a pamay-an ti romantiko a pannakikomunikar dagiti aginnaddayo nga agin-innayat.”

Ania ti phone sex? Ramanenna ti pannakisarita wenno panagimdeng kadagiti erotiko unay a banag babaen iti telepono. * Dagidiay makipaspaset iti daytoy nga aramid ti masansan nga agmasturbasion tapno mapennek ti seksual a tarigagayda. Naalas man ti pagsaritaan dagiti agin-innarem wenno dagiti di agam-ammo, makapadanag ti kinalatak ti phone sex. Kinapudnona, dadduma ti sipapanayag a mangitantandudo iti dayta.

“Dayta ti katalgedan a pannakinaig,” kinuna ti maysa a babai. Nabatad nga adu ti umanamong kenkuana. Kas pagarigan, idi Oktubre 2000, kas pangrisutda iti iyaadu dagiti naakaran iti HIV, maysa a grupo dagiti Ruso nga eksperto iti salun-at ti nangaramat kadagiti anunsio iti diario tapno maitandudo ti phone sex.

Nupay kasta, itantandudo ti dadduma a tattao ti phone sex tapno panguartaanda laeng. Ti industria ti phone sex​—a pagbayadan dagiti tattao tapno mangngegda dagiti naalas a banag​—ket nagbalinen a binilion a doliar a negosio idiay laeng Estados Unidos.

Ngem apay aya a limmatak unay daytoy nga aramid? Kastoy ti kunaen ti libro a The Fantasy Factory: “Napeggad ti nasinged a pisikal ken emosional a panagdenna. Mabalin a makaptanka kadagiti sakit a mayakar babaen ti panagdenna, madadael ti personal/propesional a reputasionmo, makondenarka, ken sagabaem dagiti epekto ti ‘abnormal’ a tarigagaymo. Ti phone sex pabassitenna dagiti peggad.”

Ipapantayon a ti phone sex ket dina ramanen ti pisikal a pannakidenna iti sabali a tao. Ngem kaipapanan kadi dayta nga awanen ti aniaman a pagdaksanna wenno saan a pulos a napeggad?

 Saan Aya a Makadangran ti Phone Sex?

Nasged unay ti seksual a tarigagay kabayatan ti kinaagtutubo. Awagan ti Biblia daytoy a “kinalasbang ti kinaagtutubo.” (1 Corinto 7:36) Kabayatan daytoy napateg a pasamak iti biag, masapul a sursuruen ti maysa a Kristiano nga agtutubo nga “ikutan ti bukodna a basehas iti pannakasantipikar ken dayaw.” (1 Tesalonica 4:4) Kaipapananna a masapul a sursuruem no kasano a daeran ken kontrolen dagiti seksual a riknam. Napateg daytoy tapno maaddaanka iti naimbag ken balanse a panangmatmat iti sekso.

Nupay kasta, ti phone sex ti mangisuro iti maysa a mangpennek, imbes a mangkontrol iti seksual a tarigagayna. Malaksid iti dayta, itandudona ti naalas ken tiritir a panangmatmat iti di kasekso. Isursuro ti Biblia a dagiti seksual a kinasinged ket rumbeng a tagiragsaken laeng dagiti agassawa. (Hebreo 13:4) Ngem ti phone sex ti mangparegta kadagiti agtutubo a padasenda ti seksual a kinaragsak nupay dida pay nagkasar. Isursuro ti Biblia a ti pudno a kinaragsak agtaud iti panangted​—saan nga iti pananggun-od. (Aramid 20:35) Ngem ti phone sex ti mangisuro iti maysa nga usarenna ti sabsabali kas instrumento nga agpaay iti naagum a panagpennek. Isursuro ti Biblia kadagiti agassawa a patanorenda ti pudno a kinasinged babaen ti panangpatanorda iti panaginnayat ken panagtinnalek. (Efeso 5:22, 33) Nupay kasta, itandudo ti phone sex ti di panangikankano ken di pannakiam-ammo.

Makadangran a Pannakaadikto

Agdinamag idi ti kadaanan a Corinto kas siudad dagiti imoral nga aramid. Maitutop laeng ngarud ti insurat ni apostol Pablo kadagiti Kristiano sadiay: “Maamakak a di la ket ta, kas iti panangallilaw ti serpiente ken Eva babaen ti kinasikapna, dagiti panunotyo mapagbalin a rinuker a mayadayo iti kinapasnek ken iti kinadalus a maiparbeng iti Kristo.” (2 Corinto 11:3) Ti phone sex ti maysa kadagiti adu a pangdadael ni Satanas a Diablo kadagiti agtutubo ita.

Kadagiti dadduma nga agtutubo, didan makontrol ti pannakaadiktoda nga umawag kadagiti numero a mangitandudo iti phone sex. Paneknekan ti maysa nga agtutubo nga awagantayo iti Jim no kasano nga adikto unay ti dadduma. Iti maysa a naipaskil nga anunsio, nakita ni Jim ti numero a mangitandudo iti phone sex. Inkabesana ket idi agangay, inawaganna ta kayatna laeng ti agusioso. Simmansan ti iyaawagna iti dayta a numero. Di nagbayag, addan $600 a naurnong a babayadanna iti telepono!

Maikontra iti balakad ti Sao ti Dios ti panangabbukay kadagiti seksual a tarigagay no baro wenno balasangka pay laeng. Idagadagna: “Papatayenyo, ngarud, dagiti kameng ti bagiyo nga adda iti rabaw ti daga no maipapan iti pannakiabig, kinarugit, panaggartem iti sekso.”​—Colosas 3:5.

Dagiti Peggad iti Panaginnarem

Dagiti ngay agtutubo a sipapasnek nga agin-innarem? Siempre, natural laeng para iti dua nga agin-innayat a kayatda nga iyebkas dagiti riknada iti maysa ken maysa. Idi panawen ti Biblia, kinuna ti maysa a managbuteng iti Dios a balasang maipapan iti nobiona: “Kukuanak daydiay patpatgek, ket tumurong kaniak ti panaggartemna.” (Kanta ni Solomon 7:10) No asidegen nga agkasar ti agnobio, umiso ken maitutop laeng a pagsaritaanda ti sumagmamano a personal a banag. Nupay kasta, ti aya phone sex ket natalged a pamay-an ti panangyebkas kadagiti romantiko a rikna?

Saan. Obligado uray dagiti agnobio a mangsurot iti balakad ni apostol Pablo: “Ti pannakiabig ken tunggal kita ti kinarugit wenno kinaagum saan koma nga uray madakamat iti nagtetengngaanyo, kas maitutop kadagiti nasantuan a tattao; uray ti nakababain nga ugali wenno minamaag a panagsasao wenno naalas a panagang-angaw, bambanag a di mayanatup, no di ket ti panangipaay iti panagyaman. Ta pagaammoyo daytoy, a bigbigbigenyo dayta iti bagbagiyo, nga awan ti mannakiabig wenno narugit a tao wenno naagum a tao​—a kaipapananna ti panagbalin a managrukbab iti idolo​—​nga addaan aniaman a tawid iti pagarian ti Kristo ken ti Dios.”​—Efeso 5:3-5; Colosas 3:8.

Iti imatang ni Jehova, nabatad a narugit ti nasinged a pannakisarita a nairanta a mangabbukay kadagiti imoral a kapanunotan wenno  manggargari iti masturbasion. Mabalin met a mangiturong dayta iti nakarkaro a pananglabsing kadagiti nadiosan a prinsipio. Kas pagarigan, tagtagiragsaken idi ti maysa nga agnobio ti panaginnaremda uray no agaddayoda. Idi damo, inusarda ti masansan a panagsaritada babaen iti telepono kas pamuspusan ti pannakiam-ammoda iti maysa ken maysa. Ngem di nagbayag, rinugiandan a pagsaritaan dagiti imoral a topiko. Ad-addan nga immalas ti saritaanda. Di ngarud pakasdaawan nga idi impalubos ti kasasaad nga agkitada, ensigida a nakaaramidda iti narugit.

Sigurado a no kayattayo nga ay-aywen ti Dios, ikagumaantayo a liklikan ti phone sex. Kasano nga agballigitayo a mangaramid iti kasta?

‘Disnogem ti Bagim’

Mabalin a makaadikto ti phone sex. Masapul a ‘disnogentayo ti bagitayo ken iturongtayo dayta kas adipen’ tapno anamongannatayo ni Jehova. (1 Corinto 9:27) No makipaspasetka iti phone sex, apay a dika agpatulong? Makatulong ti panangibagam kadagiti Kristiano a dadakkelmo. Wen, mabalin a makaungetda kenka. Ngem mabalin met nga isuda ti makabael unay a tumulong a mangsiput iti kababalinmo tapno saanmo a maaramid manen dayta. Situtulok ken makabael met a tumulong dagiti panglakayen iti kongregasion dagiti Saksi ni Jehova iti lugarmo.

No agar-arem wenno makiin-innaremka, ikagumaam koma ti agtalinaed a nadalus, uray no makisaritaka babaen iti telepono. Kuna ti maysa a Kristiano ken naitulagen nga agkasar nga agnagan iti Leticia: “Agkaduakami nga agnobio nga agbasa kadagiti naibasar iti Biblia nga artikulo maipapan iti panagtalinaed a nadalus. Apresiarenmi ti panangtulongda kadakami a mangtaginayon a nadalus ti konsiensiami.” Iturturedmo a baliwan ti saritaanyo no agbalinen a narugit dayta. Pagnumuanyo a rumbeng a pagtalinaedenyo a nadalus dagiti saritaanyo.

Iti dadduma a pagilian, maipakita dagiti anunsio para iti phone sex kadagiti programa ti telebision iti adalemen a rabii. Nalabit ti kasayaatan ket dika agbuya kadagiti programa ti telebision no adalemen ti rabii. Yantangay mabalin met a magargarika nga agmasturbasion, imbes a mapapatay dagiti imoral a kapanunotan, nasken a liklikam daytoy narugit nga aramid. * Agballigika a mangiwaksi kadagiti narugit a kapanunotan no panunotem dagiti nalinteg a banag. (Filipos 4:8) Makigayyemka kadagiti agsasao iti nadalus, ken basaem iti inaldaw ti Sao ti Dios agraman dagiti Nakristianuan a publikasion tapno mapabileg ti determinasionmo. Iti kasta, dikanto makapanunot kadagiti imoral a pantasia a mangdadael iti panunotmo. Kangrunaanna, agkararagka ken Jehova. Kinuna ni apostol Pablo: “Iyallatiwyo kenkuana ti isuamin a pakaringgoranyo, agsipud ta isu maseknan kadakayo.”​—1 Pedro 5:6, 7.

“Nakaro ti pannakapilit dagiti agtutubo a makipaset iti seksual nga imoralidad,” kuna ti maysa a Kristiano nga agtutubo a babai a taga Brazil. Nupay kasta, ammo ni Jehova dagiti karit a sarsarangtem. Namnamaem nga ipaayna ti amin a tulong a kasapulam tapno agtalinaedka a nadalus iti imatangna.​—Efeso 6:14-18.

[Footnotes]

[Dagiti Ladawan iti panid 20, 21]

Agpadpada a lumatlatak ti phone sex ken cybersex

[Dagiti Ladawan iti panid 20, 21]

Rumbeng nga agannad dagiti agin-innarem a saan nga agbalin a narugit dagiti saritaanda

[Ladawan iti panid 22]

Ti panagbasa iti Sao ti Dios ken dagiti Nakristianuan a publikasion mapabilegna ti pangngeddengmo nga agtalinaed a nadalus