Dagiti Animal​—Pagragsakan nga Agnanayon

NAGADU la ketdin ti nadumaduma nga animal, a tunggal maysa ket addaan iti agsasabali a personalidad ken kababalin! Ti panagayat ken panangngaasi kadagitoy ti mabalin a mangyadani iti maysa a tao iti Namarsua kadakuada. Naipakita daytoy iti kapadasan ni Maria.

Agarup tallo a tawen ti napalabasen, idi agnanaed ni Maria idiay Lisbon, Portugal, nakabulos ti patpatgenna nga aso, isu nga impayanunsiona daytoy iti radio. Maysa kadagiti Saksi ni Jehova, a sigurado a nakakita iti aso a kaing-ingas ti nadeskribir ti nangbirok ken Maria. Idi nagkitada a dua, nasarakanda ti aso. Imbaga ti Saksi a tangay nadungngo ni Maria iti animal, sigurado a maragsakan nga agnaed iti baro a lubong nga inkari ti Dios. Inlawlawag ti Saksi a dagiti tattao makikapiadanton iti amin nga animal.

Pinatgan ni Maria ti awis a tumabuno  iti gimong dagiti Saksi. Naginteres iti nangngeg ken nakitana sadiay ta kayatna ti makipagadal iti Biblia. Bayat a nagtultuloy ti panagadal, natignay ni Maria iti naammuanna maipapan ken Jehova a Dios ken ti karina a biag nga agnanayon ditoy daga iti baro a lubong ti kinalinteg. (Salmo 37:29; Juan 17:3) Kamaudiananna, idi Pebrero 16, 2002, insimbolona ti dedikasionna ken Jehova babaen ti panagbautisarna.

Orihinal a Panggep ti Dios

Kas ken Maria, adu ti naragsakan iti ebidensia ti Biblia a matungpalton kamaudiananna ti orihinal a panggep ti Dios nga agbiag nga agnanayon dagiti tattao iti paraiso a daga ken aywananda dagiti animal. (Genesis 1:28) Kuna ti Biblia a ti Dios ‘saanna a pinarsua ti daga a maipaay laeng iti awan kapapay-anna’ no di ket ‘binukelna dayta tapno mapagnaedan.’ Nalawag a tagiragsaken iti agnanayon dagiti tattao ti daga ken dagiti animal nga adda iti dayta.​—Isaias 45:18.

Impaganetget pay ti Biblia nga ibanag ti Dios ti orihinal a panggepna a mamagbalin a paraiso iti daga. “Sinaok a mismo dayta,” kunana, ket innayonna pay: “Aramidekto.” Kinuna manen ni Jehova: “Kasta ti pagbalinanto ti saok a rummuar manipud iti ngiwatko. Saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak, ket sigurado nga agballiginto iti banag a nangibaonak iti dayta.”​—Isaias 46:11; 55:11.

Nabatad a ti orihinal a panggep ti Dios ket tagiragsaken ti tao ti naindagaan a paraiso iti agnanayon. Siguradotayo nga inton agangay, matungpalton dayta a panggep. Amirisentayo dagiti panirpatan a naipaay iti Biblia no anianto ti kasasaad ti biag iti baro a lubong ti Dios. Kinapudnona, makitatayto nga amin nga animal, agpada dagiti naamo ken atap agkakapiadanto ken makikapiada met iti sangatauan.​—Isaias 65:17, 21-25; 2 Pedro 3:13.

Dagiti Taraken iti Baro a Lubong ti Dios

Iti baro a lubong ni Jehova, mabalinton a sagiden dagiti tattao ti burboran a leon, aprosan ti garitan a dutdot ti tigre ken uray ti maturog iti kakaykaywan a di agbuteng iti aniaman nga animal a mangdangran. Paliiwem daytoy a kari ti Dios: “Sigurado a pagpukawekto ti makadangran nga atap nga animal manipud iti daga, ket pudno nga agnaeddanto [dagiti tattao] a sitatalged iti let-ang ket maturogda kadagiti bakir.”​—Ezequiel 34:25; Oseas 2:18.

Kinapudnona, dagiti atap nga animal agpaituraydanton uray kadagiti babassit nga ubbing! Kuna ti Biblia: “Ti lobo pudno a makipagtaengto iti apagbiit iti kalakian a kordero, ket iti urbon a kalding makikaiddanto a mismo ti leopardo, ket ti kigaw a baka ken ti burboran a bumaro a leon ken ti napalukmeg nga animal sangsangkamaysada; ket maysa a bassit nga ubing laeng ti mamangulonto kadakuada.”

Ngem saan la a dayta! Ituloy pay ti kasuratan: “Ti baka ken ti oso agarabdanto; dagiti urbonda agkakaiddadanto. Ket uray ti leon manganto iti garami a kas iti toro. Ket ti agsussuso nga ubing pudno unay nga agay-ayamto iti abut ti kobra; ket iti pagserkan ti lawag maipaay iti nagita nga uleg pudno nga ikabilto ti napusot nga ubing ti bukodna nga ima. Saandanto a mangaramid iti aniaman a panangdangran wenno mangpataud iti aniaman a panangdadael iti intero a nasantuan a bantayko; agsipud ta ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.”​—Isaias 11:6-9.

Iti baro a lubong ni Jehova, awanton ti parikut dagiti tattao nga aglilinnetlet kadagiti dadakkel a siudad a di nasayaat a pagnaedan ti tattao ken dagiti tarakenda. Pudno nga uray ita, adu ti mangtagiragsak kadagiti animal, ken adu ti natimbeng ti panangmatmat ken panangaywanda kadagitoy. Ngem panunotem laengen ti namnama a mangtagiragsak kadagiti taraken iti agnanayon iti nalinteg a baro a lubong! Ti naayat a panangaywan kadakuada ti talaga a pakaidayawan ti Naindaklan a Namarsua iti amin a sibibiag a banag.

No dimo pay naammuan dagiti nakaskasdaaw a panggep ti Dios​—a kas iti naayat iti animal a ni Maria a nabiit pay a nakaammo iti dayta​—sipapasnek nga awisendaka a makiuman kadagiti manangipablaak iti daytoy a magasin wenno iti maysa kadagiti Saksi ni Jehova, a maragsakanto a tumulong kenka a makaammo kadagitoy.

[Ladawan iti panid 10]

Idiay baro a lubong ti Dios, tagiragsakemto iti agnanayon dagiti animal