Manipud Kadagiti Agbasbasa

Dagiti Napuskol a Kabakiran Nagagaranak a nangbasa iti serye nga “Asino ti Mangispal Kadagiti Napuskol a Kabakiran?” (Hunio 22, 2003) Diak nasdaaw a ti napuskol a kabakiran ti Abagatan nga America ti kangrunaan nga insalaysayyo. Gapu ta nakarkaro nga amang ti kasasaad dagiti napuskol a kabakiran ti Africa ken Asia, uray kaskasano mabalin a balbaliwan ti tao ti ar-aramidenna kadagiti kabakiran iti Abagatan nga America. Maragsakanak a mangsegsegga iti ibaballaet ti Dios ket pagpatinggaenna ti pannakadadael dagiti kabakiran ditoy daga tapno maisubli ti orihinal a kinadayag dagiti pinarsuana.

G. R., Switzerland

Pagyamanan unay kadagitoy a serye. Medio nabayag metten nga agsirsirarakak kadagiti suheto maipapan iti aglawlaw isu a nagbalbaliw dagiti ugalik iti panaggatang ken panag-recycle. Maladingitanak a mangpanunot kadagiti mula a napukawen ken an-animal a napapanaw wenno napapatay gapu iti kinaagum ti tao. Maliwliwa ken manginanamaak gapu ta ammo ti Namarsua ti mapaspasamak ket asidegen a balbaliwanna dagiti kasasaad. Pagyamanan iti panangipablaakyo kadagita a napintas nga artikulo.

V. T., Canada

Kaay-ayok ti nakaparsuaan isu nga iti adun a tawen maseknanak iti mapaspasamak kadagiti napuskol a kabakiran. Maragsakanak a makaammo a maseknan dagiti Saksi ni Jehova kadagiti pinarsua ti Dios. Mabang-aranak a makaammo nga addanto aldaw a natalgeden ti kasasaad dagiti napuskol a kabakiran.

T. H., Estados Unidos

Trahedia Pagyamanan iti artikulo nga “Agimtuod Dagiti Agtutubo . . . Kasanoak a Makapagibtur no Dumteng ti Trahedia?” (Hunio 22, 2003) Idi nalpasko a binasa daytoy nga artikulo, nariknak nga imbagnosnak ni Jehova maipapan iti parikutko iti adun a tawen. Kas maysa a Kristiano, maawatak a dagiti “maudi nga aldaw” ket “narigat a pakilangenan.” (2 Timoteo 3:1) Nupay kasta, maladingitanak no adda makapadanag a damag a makitak iti telebision. Talaga a maupayak idi​—agingga a mapaksuyanak, ket no dadduma, agtalinaedak lattan idiay balay imbes a mangasabaak. Madanaganak maipapan kadagiti mabalin wenno saan a mabalin a mapasamak iti masanguanan. Ngem impalagip kaniak daytoy nga artikulo ti kinapateg ti panangitultuloy kadagiti naespirituan a rutinatayo ken ti panangyebkas iti riknatayo ken Jehova ken ti naan-anay a panagtalek kenkuana. Naimpusuan nga agyamanak kadagiti publikasionyo.

E. K., Japan

Idi Enero 2003, natay ni lolok bayat a nayospital. Idi pay la a nakakitaak iti ipapatay ti maysa a nadekket a kabagiak. Adda sungbat daytoy nga artikulo kadagiti saludsodko. Nangnangruna a natukayak iti subtema a “No Apay a Mapasamak Dagiti Dakes a Banag.” Tinulongannak a mangtarus a di napakpakadaan ti napagteng iti pamiliak. Dina kayat a sawen a binaybay-annakami ni Jehova. Kalpasan a nabasak daytoy nga artikulo, napukawen ti dati a pakaburiborak.

M. O., Japan

Naespirituan a Pannakawaw Pinagsangitnak ti artikulo a “No Kasano a Napnek ti Naespirituan a Pannakawawko.” (Hunio 22, 2003) Napadakkelak iti pamilia a Katoliko ken walo a tawen a nagadalak iti eskuelaan dagiti Katoliko. Nupay saanmi a pulos a binasa ti Biblia idiay eskuelaan wenno kabayatan ti Misa, kanayon nga apresiarek ti Biblia ken rinabii a basbasaek dayta. Kas ken ni Lucia Moussanett, kayatko nga iyaplikar dagiti naadalko maipapan iti Biblia, ngem diak ammo no kasano. Idi nakipagadalak iti Biblia kadagiti Saksi ni Jehova, napnekak iti naespirituan. Pagyamanan unay kadagiti makapikapik a pakasaritaan a kas iti daytoy!

K. F., Estados Unidos