“Ti Panangbiruk ti Sangatauan iti Dios”

Idi Setiembre 25, 2002, nangipablaak ti Excelsior a periodiko iti siudad ti Mexico iti editorial a napauluan iti nadakamat iti ngato. Dayta ti insurat ni Carlo Coccioli a maysa nga agdinamag nga eskolar ken mannurat iti Mexico. Nangrugi ti artikulona babaen kadagitoy a sasao.

“Kalkalpasko a binasa​—wenno kunaek kadi a kalkalpasko a binasa manen​—ti naisangsangayan a bassit a nalabaga a libro​—saan a daydiay nakalatlatak a libro idi kaaldawan ni Mao Tse-tung. Nagpaiduma a libro daytoy [Ti Panangbiruk ti Sangatauan iti Dios *]. Saan a kas iti ‘Bassit a Nalabaga a Libro’ ni Mao Tse-tung a nagbalinen nga awan ti mamaayna, mabalin a saanto a pulos a mapukaw dayta. Iti simple a panagsao, daytoy a libro ket sagut dagiti Saksi ni Jehova nga agpaay iti lubong. No idilig iti kaaduan a libro, bassit ngem di magatadan ti pateg ti linaonna. Mabalin nga ibulsa, ngem no adda iti maysa a libraria nga addaan iti 90,000 a nadumaduma a libro, nalabit dayta ti kapatgan kadakuada amin.”

Insalaysay ni Mr. Coccioli ti panawen ti kinaagtutubona idi inkeddengna ti kurso nga alaenna. Kinunana: “Dagiti naisangsangayan a benneg a pinilik nga adalen iti unibersidad ket adda pakainaiganna kadagiti paglaingak ken paginteresak: dagiti relihion, nangruna dagiti relihion iti Daya.” Imbagana a kaay-ayona nga adalen dagiti relihion ket bayat ti Gubat Sangalubongan II, nagun-odanna ti degree a kinadoktor mainaig kadagita a topiko.

Kastoy ti inlawlawagna: “Isu nga adda karbengak a mangibaga a ti bassit a nalabaga a libro a naawatko ket naisangsangayan ti kinapategna maipapan iti nakaskasdaaw a narelihiosuan a topiko. . . . [Ti libro] ket masapul nga adda koma iti kada pagtaengan tapno ukagen, basaen, ken pasaray maulit-ulit a basaen. Awan ti narelihiosuan nga anunsio a linaonna, no di ket maysa a nakapatpateg a surat ti tao nga agtarigagay nga agusisa iti adu a narigat a maawatan ken ilawlawag a bambanag maipapan iti Dios.”

Iti ngudo ti artikulona, inted ni Mr. Coccioli ti numero ti telepono ti Saksi a nangted kenkuana iti libro. Adun kadagiti immawag iti Saksi ti agkidkiddaw iti libro, isu nga ikagkagumaan ti sanga nga opisina dagiti Saksi ni Jehova idiay Mexico nga amin a nangipakita iti interes iti Ti Panangbiruk ti Sangatauan iti Dios ket makaawatda iti kopia. Nagsayaat ti irarang-ay ti panagadal iti Biblia ti maysa a tao a nagkiddaw iti 20 a libro para iti pamilia ken gagayyemna.

[Footnote]