Manipud Kadagiti Agbasbasa
Manipud Kadagiti Agbasbasa
Naranggas a Krimen Nagsayaat ti pannakaisurat ti serye a “Naranggas a Krimen—Adda Aya Solusionna?” (Hulio 8, 2003) Talaga a nagustuak ti panangilanad ti immuna nga artikulo kadagiti pudno a mapaspasamak a di nangdakamat iti solusion. Basta nagpatingga babaen iti sumagmamano a nasayaat ken mamagpanunot a saludsod, tapno maawatan ti agbasbasa ti kinakaro ti parikut. Kalpasanna, nailawlawag dagiti Nainkasuratan a solusion. Ti laeng mapanunotko a pangdeskribir ket nagpintas dagiti artikulo!
A. L., Estados Unidos
Impaawat kaniak ti maudi nga artikulo iti daytoy a serye a napauluan iti “Realistiko a Solusion—Posible Aya?” a masapul nga agbalbaliw ti isip ken puso ti tattao tapno ayatenda ti kinalinteg. Isursuronatay amin ni Jehova a Dios kas kinuna ti Isaias 54:13. Uray ita, babaen ti tulong ni Jehova, mabalintay a sanayen ti bagitayo nga agbalin a dagidiay kita ti tattao a kayat ni Jehova a pagbalinantayo.
V. K., Estados Unidos
Tour de France Nagustuak unay ti artikulo a “Ti Tour de France—100 a Tawen ti Karikutan a Pannubok iti Panagbisikleta.” (Hulio 8, 2003) Makipaspasetak idi kadagiti salip para kadagiti agdadamo a siklista. Nupay buybuyaek iti telebision ti tinawen a Tour de France, awan ammok maipapan iti panangrugina wenno diak ammo nga ag-100 a tawen gayamen idi 2003. Dinakamat ti artikulo dagiti aramid a pakakitaan ti “kinamaingel.” Para kaniak, daytoy ti pakaallukoyan ti nagadu a tattao.
R. S., Japan
Sangapulo ti tawenko ket talaga a magustuak ti artikulo maipapan iti Tour de France. Pagyamanan iti panangilawlawagyo iti nagadu a banag maipapan iti historia ti panagbisikleta. Sapay koma ta mangipablaakkayo iti ad-adu pay nga artikulo maipapan iti isport.
J. F., Francia
Darat Interesadoak a nangbasa iti artikulo a “Ti Kinangayed ti Darat.” (Mayo 8, 2003) Talaga a nakaskasdaaw ti pannakailawlawag ti pamay-an ti pannakabukel ti darat ken dagiti agbibiag iti darat. Nasdaawak iti kinanadumaduma ti kolor ti darat. Nakaskasdaaw a panunoten a no awan ti darat, awanantayo koma kadagiti nagpateg a banag a kas iti sarming wenno semento! Pagyamanan iti kasta a nagsayaat nga impormasion.
N. N., South Africa
Diabetes Pagyamanan unay gapu iti serye ti akkub a “Panangibtur iti Diabetes.” (Mayo 8, 2003) Sangapulo ket dua a tawenen nga addaanak iti Type 1 a diabetes, ket naagasanakon babaen iti masansan a panangineksion iti insulin. Nagdakkel ti maitultulong kaniak ni baketko. Agpadakami nga agtultuloy nga agad-adal maipapan iti sakitko, duakami nga agpadoktor, ken ikagkagumaak ti maaddaan iti nasaysayaat a kababalin. Gapu ta agserserbiak kas agdaldaliasat a manangaywan, napaliiwko kadagiti padak a Kristiano nga ad-adda nga ammoda ti kinapateg ti panagbalin a naasi ken naanus iti masakit tapno matulonganda a mangsaranget kadagiti karit iti panagbiag. Dayta a kababalin ti tumultulong kaniak a mangitultuloy iti ministeriok kadagiti kongregasion. Dimteng daytoy nga artikulo iti umiso a tiempo. Ulitek manen ti agyaman unay kadakayo.
W. B., Poland
Duapulo ket walo a tawenen nga addaanak iti diabetes. Sangapulo a miembro ti pamiliak ti agsagsagaba iti daytoy a sakit. Ti seryeyo ti nakitak nga addaan iti kalawagan nga impormasion. Iyanninaw dagiti artikulo ti ayat ti Namarsua kadatayo—banag a di ilawlawag dagiti nailubongan nga artikulo. Gapu ta diak unay kayat ti agpannuray iti pamiliak, ikagkagumaak a di ipadlaw iti sabsabali a masakitak. Maragsakanak a mangasikaso iti sabsabali. Ngem nakatulong kaniak daytoy nga artikulo a rumbeng nga asikasuek ti bagik tapno nasaysayaat ti panangasikasok iti sabsabali.
L. P., Francia