‘Napno Kadagiti Napateg a Kinapudno’

Kasta ti panangdeskribir ti maysa a direktor iti hospisio, a mangay-aywan kadagiti asidegen a matay idiay Illinois, E.U.A., iti broshur a No Adda Matay nga Ay-ayatenyo. Adda Saksi ni Jehova a nangipatulod kenkuana iti dayta a broshur ken maysa a magasin nga Agriingkayo! gapu ta nabasa ti Saksi iti magasin nga Agriingkayo! a nagadu ti agpakpakamatay a lallakay ken babbaket. Dagus a nagsurat ti direktor iti hospisio idi naawatna ti literatura.

Idi nadlaw ti direktor ti hospisio a napno ti broshur a No Adda Matay nga Ay-ayatenyo kadagiti napateg a kinapudno, kastoy ti insuratna: “Maragsakanak a mangipaay iti dayta . . . kadagiti pamilia a maliwliwanto iti linaonna a praktikal a kinasirib agraman dagiti teksto ken panangilawlawag ti Biblia.”

Nagtelepono a dagus ti Saksi iti direktor ket nakitulag a sarungkaranna a mismo. Nagkiddaw ti direktor iti 20 a kopia ti broshur ken kiniddawna a masarungkaran ti hospisio iti kada dua wenno tallo a bulan tapno masuplayan manen iti kasta a broshur.

Nalabit maliwliwaka wenno adda am-ammom a maliwliwanto met a mangbasa iti daytoy 32 ti panidna a broshur. Mabalinmo ti agkiddaw iti kopia babaen ti panangsuratmo iti naipakuyog a kupon ken panangibusonmo iti dayta iti adres a makita iti kupon wenno iti maitutop nga adres a nailista iti panid 5 daytoy a magasin.

□ Kayatko ti maaddaan iti broshur a No Adda Matay nga Ay-ayatenyo.

□ Interesadoak iti libre a panagadal iti Biblia.