“Sungbat ti Maysa a Kararag”

Kasta ti panangdeskribir ti maysa nga ina ti siam ti tawenna a barito iti pannakairuar ti libro nga Agsursuroka iti Naindaklan a Mannursuro iti maysa a kombension distrito dagiti Saksi ni Jehova idiay Ireland. “Pinagsangitnak!” inyebkasna. “Talaga a maysa a bendision dayta agsipud ta itay napan a lawas, madanaganak ta diak ammo no ania a publikasion ti iyadalko iti anakko.”

Inlawlawag daytoy a babai: “Nagkararagak ken Jehova tapno tulongannak a mangisuro kenkuana kadagiti naun-uneg a kinapudno iti Biblia iti simple ken makaay-ayo a pamay-an, ket diak ammo idi no pangrugiak. Isu a ti pannakaawatko iti daytoy nagpintas ken nagsayaat ti pannakayilustrarna a libro ket sungbat ti maysa a kararag.”

Umasping iti dayta, maysa nga ina idiay California, E.U.A., nga addaan iti lima nga annak ti nagsurat: “Iti dalanmi nga agsubli iti otel manipud iti kombension,” kunana, “nadlawko nga agbasbasa, kumitkita, ken agsasarita ti tallo nga in-inaudi nga annakko maipapan iti makapainteres kadakuada kadagiti panid ti Agsursuroka iti Naindaklan a Mannursuro.”

Kinunana: “Maragsakanak unay a nakaawat iti daytoy a sagut ni Jehova a kas iti rag-o a mariknam no adda nagpasngay, nagkasar, nagbautisar, ken nakaawat iti maysa a pribilehio manipud iti Namarsua iti uniberso. No dadduma, masiertok a dagiti luami gapu iti rag-o ti mangyebkas iti naayat nga Amatayo a ni Jehova iti saan a mayebkas ti sasao laeng.”

Nalabit kasta met ti mariknam no sukimatem daytoy nagpintas ti pannakayilustrarna a libro nga addaan iti 256 a panid a kas iti kadakkel daytoy a magasin. Mabalinmo ti agkiddaw iti kopia babaen ti panangsuratmo iti naipakuyog a kupon ken ibusonmo dayta iti naipaay nga adres wenno iti maitutop nga adres a nailista iti panid 5 daytoy a magasin.

□ Kayatko ti maaddaan iti libro nga Agsursuroka iti Naindaklan a Mannursuro.

□ Interesadoak iti libre a panagadal iti Biblia.