Ti Panangmatmat ti Biblia

Apay a Matmatam a Sagrado ti Panagasawa?

ADU a tattao ita ti mangibaga a patienda a sagrado ti panagasawa. Apay ngarud nga adu nga agassawa ti agdiborsio? Para iti dadduma, ti panagasawa ket romantiko laeng a karinkari ken legal a tulagan. Ngem mabalin a di matungpal dagiti kari. Talaga a nagbiit a makiwinnaswas dagiti tattao a kastoy ti panangmatmatda iti panagasawa no saan a matungpal ti namnamaenda a pagbanagan ti panagasawada.

Kasano ti panangmatmat ti Dios iti urnos a panagasawa? Masarakan ti sungbat iti Saona a ti Biblia idiay Hebreo 13:4: “Ti panagasawa nadayaw koma iti tengnga dagiti isuamin.” Ti Griego a sao a naipatarus a “nadayaw” kaipapananna ti maysa a banag a napateg ken kailalaan unay. No ipatpategtayo ti maysa a banag, an-annadantayo ken ditay kayat a mapukaw dayta, uray no di inggagara. Kasta met laeng koma ti urnos a panagasawa. Dagiti Kristiano ibilangda koma dayta a nadayaw​—maysa a banag a napateg ken kayatda a salakniban.

Nabatad nga inaramid ni Jehova a Dios ti panagasawa kas sagrado nga urnos iti nagbaetan ti asawa a lalaki ken asawa a babai. Ngem kasanotay a maipakita a kasta met laeng ti panangmatmattayo iti panagasawa?

Ayat ken Panagraem

Ti nadayaw a panangmatmat iti panagasawa kalikagumanna nga agpinnadayaw ti agassawa. (Roma 12:10) Kastoy ti insurat ni apostol Pablo kadagiti Kristiano idi umuna a siglo: “Ayaten koma ti tinunggal maysa kadakayo ti asawana a babai a kas ti panagayatna iti bagina; iti sabali a bangir, ti babai rebbeng nga addaan iti nauneg a panagraem iti asawana.”​—Efeso 5:33.

Ipapantayon a no dadduma, ti asawa a lalaki wenno babai  ket mabalin a makaaramid iti makapasuron ken makaparurod. Ngem masapul latta nga ipakita dagiti Kristiano ti kasta nga ayat ken panagraem. Insurat ni Pablo: “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo.”​—Colosas 3:13.

Panawen ken Atension

Dagiti agassawa a mangmatmat a sagrado ti panagasawada mangipaayda iti panawen a mangpennek iti pisikal ken emosional a kasapulan ti tunggal maysa kadakuada. Nairaman ditoy ti seksual a kinasinged. Kuna ti Biblia: “Ipaay koma ti lalaki iti asawana ti karbenganna; ngem ti babai aramidenna met koma ti isu met laeng iti asawana.”​—1 Corinto 7:3.

Nupay kasta, mabalin nga ikeddeng ti dadduma nga agassawa a temporario nga umadayo ti asawa a lalaki tapno ad-adu ti mapastrekda a kuarta. No dadduma, di ninamnama a bumayag ti kasta a panaginnaddayoda. Dagita a panaginnaddayo ti masansan a mangparigat unay iti kasasaad ti panagasawada isu a no dadduma, agtungpal dayta iti pannakikamalala ken panagdiborsio. (1 Corinto 7:2, 5) Dayta ti gapuna nga inkeddeng ti adu a Kristiano nga agassawa a saanda laengen a manggun-od kadagiti material a pagimbagan imbes a pagpeggadenda ti panagasawa nga ibilangda a sagrado.

No Rumsua Dagiti Parikut

No rumsua dagiti parikut, saan a dagus nga agsina wenno agdiborsio dagiti Kristiano a nadayaw ti panangmatmatda iti panagasawada. (Malakias 2:16; 1 Corinto 7:10, 11) Kinuna ni Jesus: “Tunggal maysa a mangidiborsio iti asawana a babai, malaksid no maigapu iti pannakiabig, isarangna iti pannakikamalala, ket siasinoman a mangasawa iti naidiborsio a babai makikamalala.” (Mateo 5:32) Saan a nadayaw ti panangmatmat ti agassawa iti panagasawada no agdiborsio wenno agsinada nga awan dagiti Nainkasuratan a pangibasaranda.

Ti panangmatmattayo iti panagasawa ket maipasimudaag met iti balakadtayo kadagiti agproblema unay iti panagasawada. Dagus kadi nga isingasingtayo nga agsina wenno agdiborsiodan? Pudno a no dadduma, adda dagiti nainkalintegan a pakaigapuan ti panagsina, kas iti nakaro a pisikal a panangabuso wenno inggagara a di panangsuporta. * Kas iti nadakamat, ipalubos met ti Biblia ti panagsina no nakiabig wenno nakikamalala ti maysa nga asawa. Ngem saan koma nga impluensiaan dagiti Kristiano ti panagdesision ti dadduma kadagita a kasasaad. Ngamin, ti tao nga agproblema iti panagasawana ti mangsaranget kadagiti epekto ti desisionna​—saan a ti mangmangted iti balakad.​—Galacia 6:5, 7.

Saanyo a Tagilag-anen ti Panagasawayo

Iti dadduma a lugar, nagbalin a gagangay ti pananggundaway dagiti tattao iti panagasawa tapno agbalin a legal ti panagnaedda iti sabali a pagilian. Gagangay a makitulag dagitoy a tattao a tangdananda ti maysa nga umili iti dayta a pagilian a mangikallaysa wenno makikallaysa kadakuada. Kaaduanna, saan a pulos nga agkabbalay dagitoy nga agassawa, ken nalabit saanda pay ketdi nga aggayyem. Di agbayag, inton naipagnan ti legal a panagnaed ti maysa kadakuada, agdiborsiodan. Matmatanda ti panagasawa a tulagan laeng iti negosio.

Saan a suportaran ti Biblia ti kasta a panangtagilag-an. Aniaman ti motiboda, dagiti makiasawa wenno mangasawa ket sumrek iti sagrado nga urnos nga ibilang ti Dios nga inggat’ tungpal biag. Agtalinaed nga agassawa dagiti nagtulag kadagita nga urnos, ken dida mabalin ti makiasawa manen no awan dagiti Nainkasuratan a nakaibasaran ti panagdiborsioda.​—Mateo 19:5, 6, 9.

Kas iti dadduma pay a nasayaat a panggep, kasapulan ti panangikagumaan ken panagregget iti nasayaat a panagasawa. Nabibiit a makiwinnaswas dagidiay di mangapresiar iti kinasagradona. Wenno mabalin nga an-anusanda lattan ti agkabbalay nupay di naragsak ti panagasawada. Iti sabali a bangir, dagidiay mangbigbig iti kinasagrado ti panagasawa ammoda a namnamaen ti Dios a dida agsinsina. (Genesis 2:24) Maamirisda met a no agtinnulongda a pagballigien ti panagasawada, padpadayawanda ti Nangyurnos iti panagasawa. (1 Corinto 10:31) No kasta ti panangmatmatda, ad-adda a magutugotda nga agregget ken mangikagumaan a pagballigien ti panagasawada.

[Footnote]