Napeggad a Panagdisso!

KAS INSALAYSAY NI CÉSAR MUÑOZ

Kalpasan ti naragsak a panagbakasionko a nangbisita iti pamiliak idiay siudad ti Monterrey, Mexico, nakasaganaakon nga agsubli iti sanga nga opisina dagiti Saksi ni Jehova idiay Mexico City a sadiay ti nakaitudingak a pagserbian. Domingo idi, Disiembre 1, 2002. Nagluganak iti Flight 190, ket nagrubbuatkami iti alas siete ti rabii.

 KALPASAN ti natalna a panagtayabmi iti kurang la bassit a maysa nga oras ket kagudua, nangrugin a bumaba ti eroplano. Ngem kellaat a nagpangato, ket nakigtotkami amin iti nakaro nga ungor iti sirok. Simmaganad, inyanunsio ti kapitan a saan a naglukat dagiti ridaw a pagruaran dagiti pilid! Gapu ta maam-amakkami, nagsangiten ti dadduma a pasahero. Sipipigsa a nagkararag ti dadduma. Pinampanunotko no ania ngata ti mapasamak.

Impakaammo ti kapitan nga ipamuspusanna a mayugyog dagiti ridaw a pagruaran dagiti pilid tapno aglukat dagitoy. Isu a bayat ti panagtayabmi iti ngatuen ti Mexico City, yinugyogna ti agsumbangir a sikigan ti eroplano iti agarup maysa nga oras. Nakarkaro pay dayta ngem iti aniaman a panagluganko kadagiti pagliwliwaan a lugan iti parke. Talaga a saan a nakaay-ayat dayta! Kalpasanna inyanunsio ti kapitan: “Ladingitenmi nga ipakaammo kadakayo a saan a naglukat dagiti ridaw. Ti laeng maaramidtayo ket inkapilitan nga agdissotayo nga awan dagiti pilid.” Nagkikinnitakami amin a madandanagan, a pampanunotenmi ti nakarkaro pay a mapasamak.

Naiteden dagiti instruksion para iti inkapilitan a panagdisso. Nagpasotkami, inikkatmi amin a makasugat, ket nagmasngaadkami kas insingasingda. Pagarupko no sigurado a matinnagkami iti runway (pagdissuan ti eroplano)! Iti dayta a kanito, nagkararagak ken Jehova a Dios isu a kimmalma unay ti riknak.​—Filipos 4:6, 7.

Kanayon a mangngegko a no dandanin matay ti maysa a tao, mapampanunotna dagiti napalabas a pasamak iti biagna ken dagiti inaramidna koma. Maladingitanak ta diak man la naikasaba ti Pagarian iti agtutubo a babai a kaabayko ket kinunak a no addanto manen gundaway, kanayon nga aprobetsarekton ti kada gundaway a mangasaba. Dagus met nga inamirisko no ar-aramidek met laeng ti amin a kabaelak nga agserbi ken Jehova.

Idi bumabbaban ti eroplano, makitakon dagiti trak ti bombero, ambulansia, ken adu a nakatakder a tattao. Kalpasanna, nariknamin ti nakaro a pannakatalteg idi nagdisso ti pannakabarukong ti eroplano iti runway. Bayat ti panaguyas ti eroplano, rimsik ti apuy gapu iti pannakarisiris ti metal iti runway. Dagus a pinusitsitan dagiti trak ti bombero iti adu a danum ti agsumbangir a sikigan ti eroplano tapno bumaaw daytoy.

Kalpasan ti sumagmamano a makapadanag a kanito, simmardengen ti eroplano. Nagpalakpakkami, ket naragsakankami ta nagballigi ti piloto a nangtaming iti daytoy nga inkapilitan a panagdisso. Naibaga kadakami a panawanmi a dagus ti eroplano. Dagus a napankami kadagiti pagruaran ket nagdayusdoskami kadagiti naparsed a dayusdosan agingga iti karuotan iti baet dagiti runway.

Bayat a nakatakderak nga agpigpigerger iti natalged a disso gapu iti napasamak, pinaliiwko ti nagdisso nga eroplano a naiballangan iti runway. Naimbag ta sumagmamano laeng a pasahero ti nasugatan, ken saan unay a nakaro. Kadagiti ambulansia nga adda iti asideg, naagasan ti dadduma a napakigtotan unay.

Ninamnamak ti makaawid koma iti agarup alas nuebe ti rabii, ngem uppat nga oras a naladawak. No panunotek ti napasamak, agyamanak ta sibibiagak! Pinagpanunotnak daytoy a kapadasak. Masapul a sarangtek ti saan a kinatalged ti biag. Mamagpakumbaba no mabigbigtayo a mabalin a mapukaw ti amin iti apagkanito. No kasla mapagduaduaan ti pannakailasat ti maysa a tao, mabalin a naladawen nga aturenna ti panagbiagna wenno agaramid pay iti naimbag tapno sumayaat ti takderna iti imatang ti Dios. Ad-adda pay nga apresiarek itan a masapul nga usarek a nainsiriban ti biagko ken ikagumaak ti agserbi ken Jehova a Diosko iti kada aldaw iti kasayaatan a pamay-an.​—Salmo 90:12.