No Kasano a Mairurumen Dagiti Biktima

Kalkalpas ni Monika ti panageskuelana idi nangrugi a nagtrabaho kas agsansanay a klerk iti opisina ti abogasia. Namnamaenna idi a makapagtrabaho iti nasayaat idi nagturpos a nageskuela.

Ni Horst ket maysa a doktor nga agtawen iti 35. Addaan asawa ken annak, ket kasla ipamatmat ti amin a kasasaad nga agbalinto a mabigbigbig ken dakkel ti sueldona.

Agpada da Monika ken Horst a nagbalin a biktima ti pannakairurumen.

NAPATEG a leksion ti isuro kadatayo dagiti kaso da Monika ken Horst: Saan a nalaka nga ipakpakauna no siasino ti mabiktima iti dakes a pannakatrato. Kinapudnona, uray siasino iti aniaman a trabaho ket mabalin a puntiria ti pannakairurumen. Kasano ngarud a masalaknibam ti bagim? Paset ti sungbat ket agpannuray iti panangadal no kasano a magun-odan ti talna iti  panggedan, uray kadagiti katrabahuan a narigat a pakibagayan.

Pannakibagay Kadagiti Katrabahuan

Kadagiti adu, ti panagtrabaho kalikagumanna ti pannakibagay ken pannakitinnulong iti grupo dagiti katrabahuan tapno naannayas ti panagtrabaho kas maysa a grupo. No agkakatunosan dagiti agkakadua, nasayaat ti pannakairingpas ti trabaho. No saan, saan unay a nasayaat ti pagbanagan ti trabaho ken kumaro met ti pannakairurumen.

Ania ti makasinga iti naannayas a panagtrabaho ti maysa a grupo dagiti trabahador? Mabalin a ti masansan a panangsukat kadagiti trabahador ti maysa a makagapu. Iti kasta a kasasaad, narigat a tumanor dagiti panaggagayyem . Kasta met, dagiti baro a kakadua saanda pay a nasigo iti trabaho, isu a bassit ti magapuanan ti amin. No umad-adu ti trabaho, mabalin a masansan nga agap-apura ti grupo.

Maysa pay, no awan dagiti nalawag a kalat ti grupo, awan unay ti panagkaykaysa. Kas pagarigan, mabalin a kastoy ti kasasaad no agamak ti amo a di natalged ti saadna ket ikaluyana dayta imbes a mangidaulo. Mabalin pay ketdi nga ikagumaanna a pagriribalen dagiti agkakatrabahuan tapno masalimetmetanna ti saadna. Nakarkaro pay no saan a nalawag ti pannakaorganisar ti grupo ken saan nga ammo dagiti agkakatrabahuan no ania ti saklawen ti trabahoda. Kas pagarigan, mabalin a tumaud ti riri no dua nga empleado ti agpadpada a mangipagarup a trabahoda ti agpirma a manganamong kadagiti napirmaanen nga invoice.

No kasta ti kasasaad, agbalin a narigat ti makisarita ken masansan a di maasikaso dagiti di panagkikinnaawatan. Madadael ti nasayaat a panagtrabaho gapu iti imon, ken agriribal dagiti agkakatrabahuan tapno magun-odanda ti pabor ti amoda. Dagiti babassit a di pagkikinnaawatan agbalin a nakaro a pananginsulto. Iti kasta, dumakkel dagiti babassit a problema isu a mangrugin ti pannakairurumen.

Ti Panangpili iti Pagpapasan

Iti sumagmamano a tiempo, mabalin a maysa nga empleado ti mapili a pagpapasan. Siasino ti mabalin a pagpapasan? Nalabit daydiay naidumduma. Kas pagarigan, mabalin a daydiay kakaisuna a lalaki iti ummong dagiti babbai a trabahador wenno maysa a babai iti panggedan nga ad-adu ti lallaki. Ti natalek a tao mabalin a maibilang nga agresibo, idinto ta ti managbabain maibilang a naatap ken nasikap. Mabalin a naiduma met ti biktima no laklakay wenno bakbaket wenno ub-ubing ngem iti kaaduan wenno nalalaing pay ketdi nga agtrabaho.

Siasinoman ti mabalin a pagpapasan, ‘marurod dagiti katrabahuanna ken nauyongda kenkuana ket mariknada a mabang-aranda iti pakasikoranda,’ kuna ti mta nga Aleman a magasin ti medisina. Bassit laeng ti maaramidan ti pagpapasan no ikagumaanna nga iremedio ti kasasaad ken mabalin a pakaruenna pay ketdi. No masansan ken patinayonen ti naiplano a pammutbuteng, ad-adda a marikna ti pagpapasan a maipupuera. Inton agangay, din maibturan ti biktima ti pannakairurumenna.

Siempre, kanayon nga adda posibilidad a mapasamak ti panangmaltrato iti panggedan. Ngem adu ti makalagip iti panawen nga agtitinnulong ken agkakatunosan idi dagiti agkakatrabahuan. Manmano a tumanor ti naiplano a panangirurumen. Ngem bayat ti panaglabas ti tiempo, napaliiw ti maysa a doktor a “kaaduanna, mapukpukawen ti panagkaykaysa ken nasaknapen ti kinaawan panagbain.” Saan unayen a mabain dagiti tattao ita a makiapa iti panggedanda.

Gapuna, nainkalintegan laeng a maseknan ti amin nga agtartrabaho maipapan iti sungbat ti saludsod a: Mabalin aya a lapdan ti pannakairurumen? Kasano a magun-odan ti talna iti panggedan?

[Ladawan iti panid 6]

Panggep ti panangirurumen a pagbalinen a maipupuera ti biktimana