Pammati ti Pamilia iti Sidong ti Rigat

NAMIN-ADUN a nagsakit ni India, maysa a napintas nga ubing a babai a siam ti tawenna a taga Wisconsin, E.U.A. Kinapudnona, namitlon a naopera iti grabe a sakitna ken namin-adun a naagasan kadagiti saan unay a nakaro a sakitna. Kastoy ti kinuna ni Lori a nanangna: “Innem a tawenen a masansan a maipan ni India kadagiti siled a pang-emerhensia, mayospital, ken maipadoktor.”

Nangrugi amin dayta idi 18 pay la a bulan ni India. Nangrugi a naaddaan kadagiti karkarna a sintoma, a pakairamanan ti nakaro a panagtakki ken nangato a gurigor. Agbubussog met ti tianna, ken kimmuttong iti kasta unay sa napanaas ti tianna. Iti dua a tawen, ti bassit nga ubing a ni India ket masansan a mariing iti kada rabii nga agsangsangit, agas-asug, ken no dadduma, umkis pay gapu iti ut-ot.

Bayat nga inkagumaan dagiti doktor nga ammuen no ania ti sakitna, nagtultuloy ti nakaro a panagsagaba ni India. Kuna ni Lori: “Matmatayen ti anakmi.” Kastoy met ti imbaga ni Mark, a tatang ni India: “Iti nasurok a makatawen, makitami a kumutkuttong ken kumapkapuy ti anakmi ngem dimi ammo no kasanomi a tulongan. Malagipko pay nga adda idi rabii a nariknak nga awanen ti maaramidanmi bayat a nagsaritaanmi ken ni Lori ti pannakaipumpon ni India, nga iti daydi a tiempo impagarupmi a dandanin matay.”

Idi agangay, naammuan a ni India ket addaan iti ulcerative colitis​—maysa a sakit a mangapektar iti pannakaap-ap ti dakkel a bagis. Addaan pay iti primary sclerosing cholangitis, a nangapektar iti pannakatubo ti apro iti dalem. Maagasan dagitoy a sakit. Nupay kasta, masapul a maopera, ket para iti ulcerative colitis, masapul nga agtomar iti agas. Gapu kadagita a sakit, masapul a kanayon a masiputan ken maaywanan bayat nga agpapaimbag.

Nasurok a pito a tawen itan sipud idi damo a nagsakit ni India. Gapu iti naannad a panangaywan dagiti doktor, umim-imbagen. Kas Saksi ni Jehova, patien da Mark ken Lori a ti pammatida iti Sao ti Dios​—nangruna iti ibagbaga daytoy  maipapan iti sakit, ipapatay, ken namnama a panagungar​—ti nakatulong kadakuada nga agibtur. Kasta met laeng ti naaramidna ken ni India. Kuna ni Lori: “Sangkasao ni India ti namnama a panagungar kas nadeskribir iti Biblia. Agpaypayso dayta kenkuana.”

Naminsan, idi adda ni India iti siled a pagay-ayaman iti maysa nga ospital, naam-ammona ti maysa nga ubing a babai a ti adingna ket addaan iti leukemia. Inyestoria ni Lori ti simmaruno a napasamak: “Imbaga ti ubing a babai ken ni India a madanagan di la ket ta matay ni adingna. Kalpasanna, imbaga ni India kenkuana no ania ti ipapatay sigun iti Biblia sana kinuna a saan a mabuteng a matay. Kabigatanna, inasitgannak ti ina ti ubing a babai ta nagadu ti kayatna a saludsoden. Nasdaaw ta sipaprangka ken situtured a nailawlawag ni India dagita a banag.”

Napaneknekan da Mark ken Lori a nagdakkel ti naitulong ti kararag dagiti kapammatianda. “Iti napalabas,” kuna ni Mark, “no ibaga ti tattao nga ikararagak ida wenno no idauluak ida iti kararag, kanayon a pampanunotek nga ad-adu pay koma ti maaramidak. Ita, maamiriskon no kasano kapateg dagita a panangikararag iti sabsabali ken agpaay iti sabsabali. Ti panangikararag ti kapatgan a maaramidan kadatayo ti padatayo a tattao iti sidong dagiti narigat a kasasaad. Anian a naayat ti panagkakabsattayo!”

Patien met ni Mark a ti sakit ni India ti nakatulong kadakuada a mangsukimat kadagiti ipangpangrunada. “Talaga a nagbalbaliw ti panangmatmatmi kadagiti material a banag,” kunana. “Kasla awan serserbi dagitoy no agsakit ti anakmo! Ti relasionmi ken Jehova a Dios ken ti naayat a panagkakabsattayo dagiti kapatgan iti biagmi idi ken ita.”

Segseggaan da Mark ken Lori agraman ni India ken ti kakabsatna ti tiempo nga impadto ni mammadto Isaias inton “awanto ti agtataeng nga agkuna: ‘Masakitak.’”​—Isaias 33:24; Apocalipsis 21:4.

[Ladawan iti panid 22]

Ni India Erickson

[Ladawan iti panid 23]

San Diego Children’s Hospital

[Ladawan iti panid 23]

Ni India ken ti pamiliana