Baro a Rupa Para ken Mailyn
Baro a Rupa Para ken Mailyn
KAS INSALAYSAY TI NANANG NI MAILYN
Apay a kasapulan ti napintas ken 11 ti tawenna nga anakko a ni Mailyn ti baro a rupa? Palubosandak a mangilawlawag.
Ni Mailyn ket buridek iti dua nga annakko. Naipasngay idiay Holguín, Cuba, idi Agosto 5, 1992. Naragsakankami unay ken ni tatangna, agraman ni manangna iti pannakaipasngayna. Ngem di nagbayag, napukaw ti ragsakmi. Sumagmamano nga aldaw kalpasan a naipasngay, nagtukoak ket makabulan kalpasanna, naakaran ni Mailyn.
Idi damo, kasla saan unay a grabe ti kasasaadna, ngem kimmaro, isu a masapul a mayospital. Naagasan ni Mailyn, ngem kimmapuy ti sistema ti imiunidadna agingga a naimpeksion. Nadlawko a limmabbaga ti maysa a sikigan ti nagbassit nga agongna. Imbaga dagiti doktor a gapu dayta iti karkarna ken nakaro unay a kita ti bakteria.
Nupay naagasan a dagus iti antibiotiko, iti sumagmamano nga aldaw, ti rupana ket dinadaelen dagiti bakteria. Idi napasardengen dagiti doktor ti impeksion, dandani narunoten ti agong, bibig, ken paspaset ti gugot ken timid ni Mailyn. Naabutan met ti sikigan ti maysa a matana.
Nakasangitkami ken ni lakayko idi nakitami. Apay a napasamak ti kastoy iti ubing pay nga anakmi? Nagtalinaed ni Mailyn iti intensive care unit iti sumagmamano nga aldaw, ket impagarup dagiti doktor a din agbiag. Sangkaibaga idi ni lakayko kaniak, “Isaganamon ti bagim iti ipapatayna.” Nupay kasta, no iserrekko ti imak iti incubator tapno iggamak ti bassit nga ima ni Mailyn, petpetanna dayta isu nga ammok a saan a matay. Imbagak ken ni lakayko: “Saan a matay ti anakta. Ngem no kasta ti kasasaadna, anianto ngay ti pagtungpalan ti biag ni Mailyn?” Kada mariingkami iti agsapa, impagarupmi a maysa laeng a batibat dayta.
Bayat nga addakami iti ospital, inaywanan dagiti dadakkelko ti innem idi ti tawenna ken inauna nga anakmi a ni Maydelis. Mailiwen ken ni adingna. Nakitana ni Mailyn a napintas a kasla munieka nga addaan iti dadakkel nga asul a mata idi naipanaw iti balaymi. Ngem inton makita manen ni Maydelis ti adingna a maladaga, nakaal-alaston ti langa ni Mailyn.
‘Apay a Nagkaro ti Sagsagabaen ti Anakko?’
Kalpasan ti makabulan ket kagudua a pannakayospital, naipalubosen nga iyawidmi ni Mailyn. Saankami a nagawid iti balaymi iti siudad agsipud ta saanmi a kayat nga adda makakita kenkuana. Imputputongmi ti bagimi iti maysa a bassit a balay iti away nga asideg iti talon ti dadakkelko.
Idi damo, pinasusok ni Mailyn iti saggabassit babaen iti maysa nga abut iti rupana nga ayan idi ti bibigna. Saan a makakunnot. Nupay kasta, idi nagluniten dagiti sugatna, dandani nagserra dayta a pannakangiwatna. Dagiti laeng taraon a napagbalin a likido a naikarga iti mamador ti mabalin idi nga ipakanko kenkuana. Idi makatawennan, nagsublikami idiay Holguín, a nangaramidan dagiti doktor iti uppat nga operasion tapno mapadakkel ti pannakangiwatna.
Iyim-imtuodko idi iti bagik, ‘Apay a nagkaro ti sagsagabaen ti anakko?’ Nagsapulak iti sungbat kadagiti espiritista ket nagkararagak kadagiti narelihiosuan nga imahenko. Ngem
awan ti aniaman a nakaliwliwa kaniak. Ad-adda pay a nariribukanak gapu kadagiti makapasair nga imbaga ti dadduma a kabagian ken gagayyem. Kinuna ti dadduma, “Ammo ti Dios no apay nga ipalpalubosna dagitoy a banag.” Dadduma ti nangibaga pay kaniak iti, “Sigurado a pannusa ti Dios dayta.” Madanaganak met unay idi no ania ti ibagakto ken ni Mailyn inton dakkelen. Naminsan, idi ubing pay unay, dinamag ni Mailyn ken ni tatangna, “Apay a saan a kas iti dadduma ti agongko?” Saan a nakauni ni tatangna ken rimmuar tapno agsangit. Inkagumaak nga inlawlawag ti napasamak. Kaskasdi a malagipna ti sangkaibagak idi nga adda bassit nga insekto a nangkinnit iti agong ken ngiwatna.Pakaibasaran ti Namnama
Idi maup-upayak unayen, malagipko a Saksi ni Jehova ti maysa kadagiti kaarrubak. Kiniddawko kenkuana nga ipakitana kaniak iti Biblia no apay nga ipalpalubos ti Dios nga agsagaba unay ti anakko. Dinamagko met, “No daytoy a sakit ket talaga a pannusa ti Dios iti aniaman a basolko, apay ngarud a ni Mailyn ti madusa?”
Rinugiannak ti kaarrubak nga iyadalan iti Biblia babaen ti libro a Mabalinyo ti Agbiag nga Agnanayon iti Paraiso a Daga. * In-inut a naawatak a saan a ti Dios ti mapabasol iti napasamak ken ni Mailyn ken talaga a maseknan kadatayo. (Santiago 1:13; 1 Pedro 5:7) Nangrugin a naapresiarko ti nakaskasdaaw a namnama nga iti sidong ti panagturay ti nailangitan a Pagarian babaen ken Jesu-Kristo, mapukawton ti amin a panagsagaba. (Mateo 6:9, 10; Apocalipsis 21:3, 4) Daytoy a pannakaammo ti nangpabileg ken nangtignay kaniak a tumabuno kadagiti Nakristianuan a gimong dagiti Saksi ni Jehova. Idi damo, saan a kayat ni lakayko ti baro a naespirituan a paginteresak. Nupay kasta, dinak linapdan a makipagadal iti Biblia no la ket ta dayta ti makatulong kaniak a mangdaer iti trahedia nga immapay kadakami.
Tulong Manipud Sabali a Pagilian
Idi dua ti tawen ni Mailyn, adda agdinamag ken mararaem a siruhano idiay Mexico a paglainganna ti mangretoke kadagiti nadadael a paset ti bagi. Nadamagna ti kasasaad ti anakko, ket intukonna a libre a retokienna ti rupa ni Mailyn. Idi 1994 a naaramid dagiti damo nga operasion. Dandani makatawen a nagnaedkami ken ni Mailyn idiay Mexico. Idi damo, saanmi a nasarakan dagiti Saksi ni Jehova, isu a saankami a nakatabuno kadagiti Nakristianuan a gimong. Dayta ti makagapu
a kimmapuy ti espiritualidadko. Kalpasanna, maysa kadagiti Saksi iti dayta a lugar ti nangbirok kadakami, isu a dagus a nakitimpuyogkami manen a kanayon agingga iti mabalin kadagiti kapammatianmi. Idi nagawidkami idiay Cuba, intuloyko ti panagadalko iti Biblia isu a napabileg manen ti espiritualidadko.Iti dayta a tiempo, kaskasdi a saan nga interesado ni lakayko iti Biblia. Iti panangikagumaak a mangtukay iti interesna, kiniddawko nga ibasaannak iti sumagmamano a paset dagiti publikasion a naibasar iti Biblia tapno ad-adda a maawatak dagita. Idi agangay, natignay a makipagadal iti Biblia, ta madanagan di la ket ta madadael ti relasion ti pamiliami gapu iti masansan a naunday a panagnaedmi idiay Mexico. Naamirisna a ti panagkaykaysami iti naespirituan ti makatulong tapno maibturanmi dagitoy a tiempo ti panaginnaddayo. Ket agpayso a kasta. Nabautisarankami ken ni lakayko ken ti inauna nga anakmi kas Saksi ni Jehova idi 1997.
Kabayatan ti sumagmamano a tiempo a panagnaedmi idiay Mexico, ibaga ni Mailyn a no ti rupana ket saan koma a kininnit ti bassit nga insekto, saankami koma a mayadayo ken ni tatang ken manangna. Makapaladingit ti mayadayo iti pamilia iti kasta a kapaut. Nupay kasta, malagipko a napabilegak kalpasan ti naminsan a panagpasiarmi idiay Bethel, ti sanga nga opisina dagiti Saksi ni Jehova sadi Mexico. Imbaga ni Mailyn a dinan kayat ti maopera manen—iti maikalima a biahemi—agsipud ta naut-ot unay ti agpaimbag. Ngem imbaga kenkuana ti dadduma a Saksi nga agserserbi iti sanga nga opisina a no agbalin a natured ken agpaopera, isaganaandanto iti padaya inton agawiden manipud ospital. Isu nga immannugot a maopera manen.
Palubosak ni Mailyn a mangibaga iti rikriknana: “Naragsakanak unay iti pannakaangay ti maysa a padaya idiay Bethel. Isu nga inturturedko ti maopera. Naragsak ti padaya, ta kaduami ti nagadu a naespirituan a kakabsat. Inikkandak iti adu a kard, nga iduldulinko pay laeng. Dagiti pammaregta a naawatko ti nangpabileg kaniak nga agibtur kadagiti sumaganad nga operasion.”
Iyiimbag ken Tulong nga Agibtur
Ni Mailyn, nga agtawen itan iti 11 ket namin-20 a naopera tapno maretoke ti rupana. Nupay dakkel ti naitulong dagita nga operasion, kaskasdi a dina mainganga unay ti ngiwatna. Nupay kasta, kanayon a natured ken positibo. Nagdakkel met ti panangapresiarna kadagiti naespirituan a banag. Sipud idi innem ti tawenna, nagpasalistan iti Teokratiko nga Eskuelaan ti Panagministro iti kongregasion iti lugarmi, ket nabautisaran idi Abril 27, 2003. Adda tallo nga iyad-adalanna iti Biblia. Naminsan, bayat nga adda idiay Mexico, kinasaritana ti maysa a lalaki nga immanamong a makipagadal iti Biblia kenkuana. Inawis ni Mailyn iti Panglaglagip iti ipapatay ni Kristo ken dadduma pay a gimong iti kongregasion, ket sigagagar a timmabuno kadagitoy.
No mangasaba ni Mailyn iti binalaybalay, kitaen ti dadduma a tattao ti rupana sada damagen no nauram idi. Aprobetsaren ni Mailyn nga iranud ti namnamana a naibasar iti Biblia nga isut’ ikkanto ni Jehova iti baro a rupa iti asidegen a Paraiso.—Lucas 23:43.
Nasaem ti sinagaba ni Mailyn kadagiti operasion ken pananguyaw ti dadduma nga ubbing. Ania ti nakatulong kenkuana nga agibtur? Sumungbat ni Mailyn buyogen ti pananginanama: “Pudno unay ni Jehova kaniak. Ipapaayannak iti bileg ken tured tapno makapagibturak. Diak kayaten ti maopera agsipud ta awanen ti maaramidan kaniak dagiti doktor. Pulos a dida maisubli ti langak idi naipasngayak. Ngem ammok nga ikkannakto ni Jehova iti baro a rupak idiay baro a lubong, ket pumintasakto manen.”
[Footnote]
^ par. 15 Impablaak dagiti Saksi ni Jehova.
[Blurb iti panid 26]
“Ikkannakto ni Jehova iti baro a rupak idiay baro a lubong”
[Blurb iti panid 27]
In-inut a naawatak a saan a ti Dios ti mapabasol