Apay a Nakaad-adu ti Naliday?

ITI kagimongan itatta, adu ti malidliday. Maapektaran ti amin a tattao aniaman ti edad, puli, kasasaad iti kagimongan, ken relihionda. Napadasam kadin ti nagliday? Malidlidayka aya ita? Kinapudnona, datay amin, no maminsan kayattayo nga adda kaduatayo wenno masapultayo ti kadua a mannakipagrikna nga umimdeng kadatayo, mangbang-ar iti pakasikorantayo wenno makipagrikna kadagiti pakadukotantayo, pakaburiborantayo, ken makaawat kadatayo. Masapultayo ti maysa a nakonsiderasion kadagiti rikriknatayo.

Ngem no agsolsolotayo, dina kayat a sawen a nalidaytayo. Mabalin nga agsolsolo ti maysa a tao iti mabayag a tiempo, ngem pagragsakanna ti bambanag nga ar-aramidenna, ket di pulos agliday. Maisupadi iti dayta, adda dagidiay di makapagsolsolo. Ti panagsolsolo ipaganetgetna ti pannakaisina iti sabsabali ngem dina kayat a sawen a saanka a naragsak. . . . Ti kinaliday masansan a kayatna a sawen ti nasaem a pannakarikna iti panagsolsolo . . . Ti kinaladingit ipaganetgetna ti maldaang a panagregget a makikadua, kayatna a sawen ti panagleddaang, panangay-ay, wenno kinatarumpingay. Ti maysa a tao nasken a maliwliwa babaen iti napasnek ken naayat a pannakikadua tapno agbalin manen a naragsak. Kamaudiananna, ti panagputputong ket nadepinar kas ti kasasaad a ‘kapada ti kinaliday ken kinaladingit. Ngem masansan nga ipaganetgetna ti pisikal a panagputputong.’

Nabileg a rikna ti kinaliday, ket mabalin a nakasasaem dayta. Dayta a rikna ti mangpukaw iti kinaganaygaymo. Mariknam a naiputputong ken naisinaka iti dadduma a tattao. Mapaksuyan ken maam-amaktayo. Nariknam kadin iti kasta? Ania dagiti pakaigapuan ti kinaliday?

 Nadumaduma ti epekto dagiti problema, situasion, ken kasasaad kadagiti tattao. Nalabit mariknam nga ipupueradaka dagiti kapatadam gapu iti langa, puli, wenno relihionmo. Dagiti panagbalbaliw iti aglawlaw​—kas iti panageskuela iti baro nga eskuelaan, panangrugi iti baro a trabaho, wenno ti iyaakarmo iti baro a sangakaarrubaan, siudad, wenno pagilian​—ket mabalin a makapaliday gapu ta mapanawam dagiti dati a gagayyemmo. Mabalin nga agladingittayo iti adu a tawen no matay ti nagannak wenno asawatayo. Kasta met a bayat a lumaklakay wenno bumakbakettayo, agbalbaliw dagiti gagayyemtayo, bumassitda wenno mabalin nga awandan.

Ti panagasawa saanna met a kanayon nga ipasigurado a saankan nga agliday. Ti di panagkinnaawatan wenno di panagtunos mabalin nga agbanag iti pakarigatan a pakaigapuan iti di kinatalged ken mabalin pay ketdi nga agresulta iti pannakaiputong ti asawa ken annak. Ngem malaksid iti kinaliday gapu iti ipupusay ti ingungoten, diborsio, pisikal wenno emosional a pannakaiputong, adda pay sabali a kinaliday a mangapektar unay kadatayo. Mapasamak daytoy no kumapuy ti relasiontayo iti Dios ket mariknatayo a naisinatayo kenkuana.

Napadasam kadin ti aniaman kadagiti nadakamat a kasasaad? Mabalin kadi a daeran ti kinaliday?

[Dagiti Ladawan iti panid 4]

Dagiti panagbalbaliw iti biag, manipud iti panageskuela iti baro nga eskuelaan agraman ti ipupusay ti asawa ket mabalin a pakaigapuan ti kinaliday