Inton Awanen ti Agliday

KUNA ti nailanad iti Genesis 2:18 nga idi naparsua ti immuna a tattao, “Kinuna ni Jehova a Dios: ‘Saan a nasayaat iti tao nga agtultuloy nga is-isuna. Mangaramidak iti katulongan maipaay kenkuana, kas maysa a komplimentona.’” Naparsua ti tattao a makikadua ken agpannuray iti sabsabali.

Ni Jehova a Dios ti kasayaatan a pakigayyemantayo. Binigbig ni apostol Pablo a ni Jehova ‘ti Ama dagiti nadungngo nga asi ken ti Dios ti amin a liwliwa, a mangliwliwa kadatayo iti amin a rigattayo.’ (2 Corinto 1:3, 4) Maladingitan ni Jehova iti panagsagaba ti asinoman kadagiti adipenna. Isut’ mannakipagrikna a Dios. ‘Isu a mismo pagaammona unay ti pannakapormatayo, a laglagipenna a tapoktayo.’ (Salmo 103:14) Saanka kadi a maay-ayo ken Jehova a Dios ken agyaman gapu iti naayat, naasi, ken mannakaawat a panangasikasona?

Saranayen ni Jehova Dagiti Malmalday

Iti napalabas, adu nga ad-adipen ti Dios ti nakapasar kadagiti makapaliday a kasasaad. Sigun kadakuada, ni Jehova ti nangsaranay ken nangliwliwa kadakuada. Alaem a pagarigan ni Jeremias a natudingan a mammadto idi isut’ ubing pay. Kadagiti 40 a mannurat iti Kasuratan, nalabit maysa ni Jeremias kadagiti kaaduan ti nayebkas maipapan iti personal a riknana. Nariknana a managbabain ken di maikari idi inawatna ti damo a nangitudingan ti Dios kenkuana. (Jeremias 1:6) Tapno maibanagna dayta, masapul a naan-anay nga agpannuray ken Jehova. Pudno unay, a ni Jehova adda kenkuana “kas maysa a nakaam-ames a mannakabalin.”​—Jeremias 1:18, 19; 20:11.

 Agarup 300 a tawen sakbay ni Jeremias, idi nadamag ni Reyna Jezebel a napapatay dagiti mammadto ni Baal, inkarina nga ipapatayna ni Elias. Pimmanaw ni Elias a napan idiay Horeb iti Sinai Peninsula nga 450 a kilometro ti kaadayona. Simrek sadiay iti maysa a rukib tapno agpalabas iti rabii, isu a kastoy ti inyimtuod ni Jehova a Dios kenkuana: “Ania ti ar-aramidem ditoy Elias?” Inlawlawag ni Elias a pagarupenna a maymaysanan a nabati nga agdaydayaw ken Jehova iti intero nga Israel, ti kakaisuna a mammadto a nabati a naregta nga agserserbi iti Dios. Impasigurado ni Jehova kenkuana nga isut’ saan nga agmaymaysa. Kaduana ni Jehova, ken dagiti 7,000 a padana nga Israelita, nupay di pagaammo ni Elias. Liniwliwa ken binang-aran ni Jehova ni Elias ken pinabilegna ti pammatina. Tinignayna ti puso ni Elias, pinaregtana ti mammadto a di sumuko iti nakaitudinganna. (1 Ar-ari 19:4, 9-12, 15-18) Kas ken Elias, no mariknatayo a nalidaytayo wenno awan serserbitayo, mabalin met nga agkararagtayo ken Jehova tapno pabilgennatayo. Kasta met, buyogen iti pannakaawat, mabalin a liwliwaen dagiti Kristiano a panglakayen dagiti matalek, tulonganda ida tapno makitada ti pasetda iti pannakaibanag ti panggep ti Dios.​—1 Tesalonica 5:14.

Manipud kadagitoy ken iti dadduma pay a pagarigan, maapresiartayo a situtulok ni Jehova a mangandingay ken siaayat a mangliwliwa kadagiti naliday. Wen, “ni Jehova agbalinto a natalged a kamang maipaay iti asinoman a nailupitlupit, natalged a kamang kadagiti tiempo ti riribuk.”​—Salmo 9:9; 46:1; Nahum 1:7.

Naasi ken Mannakipagrikna a Tao

Mapadayawan ni Jesu-Kristo gapu iti perpekto a kinatimbengna kas panangtuladna ken Jehova. Deskribiren ni Lucas ti reaksion ni Jesus idi nasabatna ti maysa a bunggoy ti pumpon idiay siudad ti Nain: “Adda mairuruar a maysa a natay a tao, ti bugbugtong nga anak a lalaki ni inana. . . . Idi nakita ti Apo, simnek ti asina kenkuana, ket kinunana kenkuana:  ‘Sumardengka nga agsangsangit.’ Iti kasta immasideg ket sinagidna ti idda ti natay, ket nagintek dagiti agaw-awit, ket kinunana: ‘Baro, kunak kenka, Bumangonka!’ Ket bimmangon ti natay a tao ket nangrugi nga agsao, ket intedna ken inana.” (Lucas 7:12-15) Natignay ni Jesus. Isut’ naasi a tao. Anian ti ragsak ti naliday a balo idi pinagungar ni Jesus ti anakna! Saanen a nagliday.

Mabalin a masiguradotayo met a ni Jesus “makipagrikna kadagiti kinakapuytayo.” Sigurado a makipagrikna kadagiti nalinteg a malidliday. Kinapudnona, babaen kenkuana “makagun-odtayo iti asi ken makasaraktayo iti di kaikarian a kinamanangngaasi kas tulong iti umiso a tiempo.” (Hebreo 4:15, 16) Babaen ti panangtulad ken Jesus, mapatanortayo ti pannakipagrikna kadagidiay agladladingit, agrigrigat, ken malmalday. No tulongantayo ti sabsabali, saantay unayen nga agliday. Ngem adda pay sabali a makatulong kadatayo a mangdaer iti negatibo a rikna a kinaliday.

Matulongannatayo ti Sao ni Jehova a Mangdaer iti Kinaliday

Natakuatan ti adu a “babaen ti liwliwa manipud iti Kasuratan maaddaantay . . . iti namnama.” Aduan ti Sao ti Dios kadagiti praktikal a balakad a makatulong kadatayo a mangparmek iti kinaliday. (Roma 15:4; Salmo 32:8) Kas pagarigan, balakadannatayo ti Sao ti Dios a ‘saantay a panunoten nga ad-adda ti bagitayo ngem iti rebbeng a panangpanunot.’ (Roma 12:3) Tapno mayaplikar daytoy a balakad, masapul a baliwantayo ti panagpampanunottayo. Ti kinapakumbaba ken kinaemma​—ti napudno a panangmatmat kadagiti limitasiontayo​—sigurado a matulongannatayo a mangpatanor iti natimbeng ken nainkalintegan a namnamaen. Balakadannatay met ti Sao ti Dios a mangpatanor iti napudno a panaginteres iti sabsabali. (Filipos 2:4) Daytoy sapulenna ti kooperasion. No maseknanka iti sabsabali, maseknanda met kenka. Makatulong daytoy nasayaat a pannakikadua a mangbang-ar iti kinaliday ken pagbalinenna a makapnek ti panagbiagtayo.

Kas Kristiano, paregtaennatayo ti Biblia a ‘saantay a baybay-an ti panagtataripnongtayo a sangsangkamaysa.’ (Hebreo 10:24, 25) Isu a makipasetka kadagiti makagunggona nga aramid, kas iti kanayon nga itatabuno kadagiti gimong dagiti Saksi ni Jehova. Awan duadua a dagiti Nakristianuan a gimong maparang-ayda ti naespirituan, emosional, ken pisikal a salun-attayo. Maysa a pamay-an ti panangpunno iti biagtayo iti nasayaat nga ar-aramid isu ti pannakisarita iti sabsabali maipapan iti naimbag a damag iti Pagarian ti Dios. Maipamaysatayo ti isiptayo iti umiso a direksion, pabilgenna ti pammatitayo, ken saluadanna ti namnamatayo.​—Efeso 6:14-17.

Umadanika ken Jehova babaen iti kararag. Namagbaga ni David: “Ipalladawmo ti dadagsenmo ken Jehova a mismo, ket isu saranayennakanto.” (Salmo 55:22) Babaen ti panagadal iti Sao ti Dios, mariknamto a naragsakka. (Salmo 1:1-3) No nalidayka, mennamennaem ti naayat a panangaywan ni Jehova a naipalgak iti Saona. Insurat ti salmista: “Ti kararuak dimket iti mismo a tapok. Taginayonennak a sibibiag maitunos iti saom.”​—Salmo 119:25.

Inton Awanen ti Agkuna “Nalidayak”

Inkari ni Jehova a Dios kadatayo ti maysa a baro a lubong nga awanen dagiti pakadukotan, pakaupayan, ken negatibo a rikrikna. Kuna ti Biblia: “Punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” (Apocalipsis 21:4) Wen, mairaman dagiti pisikal, moral, mental, ken emosional a rigat a mapaspasarantayo ita kadagidiay immuna a bambanag nga aglabas.

Mapnonto ti daga kadagiti mannakigayyem a tattao, a mangpasayaat iti biagtayo. Ni Jehova, babaen iti nailangitan a Pagarianna nga iturayan ni Jesu-Kristo agasanna nga agnanayon ti amin a kinaladingittayo. Mangipaayto kadagiti baro ken nakaskasdaaw a bambanag nga aramidentayo iti naindagaan a paraiso. Dumtengto ti aldaw nga awanton a pulos ti agkuna, “nalidayak.”

 [Ladawan iti panid 8, 9]

Babaen iti tulong ni Jehova ditay marikna a nalidaytayo, uray no agsolsolotayo

[Dagiti Ladawan iti panid 10]

Ania ti isuro kadatayo dagiti salaysay ti Biblia maipapan kada Jeremias ken Elias?