“Magasin a Masapul a Mausig a Naimbag”

NI David ket maysa nga estudiante ti abogasia iti Obafemi Awolowo University idiay Nigeria. Kastoy ti nabiit pay nga insuratna iti sanga nga opisina dagiti Saksi ni Jehova iti dayta a lugar: “Kanayon nga itulodak iti Agriingkayo! ti maysa a mararaem a 70 ti tawenna a propesor ti unibersidad iti departamento nga agisursuro iti abogasia. Maysa nga agsapa, kalpasan a naawatna dagiti kabaruan a ruar, kastoy ti imbagana iti maysa a sangaili iti opisinana: ‘Ti dadduma a libro ket masapul a mabasa ti sumagmamano laeng a pasetda, ti dadduma ket masapul a mabasa, ngem saan unay nga ipaspasnek, ket ti sumagmamano ti masapul a mausig a naimbag. Ti Agriingkayo! ket magasin a masapul a mausig a naimbag.’”

Iti sabali pay a gundaway, kalpasan ti iruruarna iti opisina ti propesor, kinuna ni David a naallingagna nga isingsingasing ti propesor iti maysa a sangailina a basaenna ti Agriingkayo! “Imbagana iti sangaili a no maisagsagana ti Agriingkayo!, maar-aramid ti naannad a panagsirarak, ken balanse ngem natured ti panangilawlawag ti magasin kadagiti isyu. Nangngegko nga imbagana: ‘Basbasaek a naimbag ti Agriingkayo! Ti Dios la ketdi ti mangmangted iti kinasirib kadagiti mannurat tapno maputarda dagita a nagsayaat nga artikulo.’”

Makaisuro ti Agriingkayo! ken adu a suheto ti saklawenna. Kangrunaanna, pabilgenna ti panagtalek iti adda iti Biblia a kari ti Namarsua a natalna ken natalged a baro a lubong a dandanin mangsukat iti agdama a sistema ti bambanag. Itampok ti 32 ti panidna a broshur nga Ania ti Kalikaguman ti Dios Kadatayo? dayta a panggep ti Dios ken isurona no ania ti ibagbaga ti Biblia a nasken nga aramidentayo tapno anamongannatayo ti Dios. Mabalinmo ti agkiddaw iti daytoy a broshur babaen ti panangsuratmo iti naipakuyog a kupon ken ibusonmo dayta iti adres a makita iti kupon wenno iti maitutop nga adres a nailista iti panid 5 daytoy a magasin.

□ Kayatko ti umawat iti broshur nga Ania ti Kalikaguman ti Dios Kadatayo?

□ Interesadoak iti libre a panagadal iti Biblia.