Manipud Kadagiti Agbasbasa

Perpeksionista Kayatko ti agyaman kadakayo gapu kadagiti artikulo nga “Agimtuod Dagiti Agtutubo . . . Apay a Mariknak a Rumbeng nga Agbalinak a Perpekto?” ken “Kasano a Maisardengko ti Panagbalinko a Perpeksionista?” (Hulio 22 ken Agosto 22, 2003) Narigatanak unay gapu ta kayatko nga aramiden dagiti bambanag iti perpekto a pamay-an ngem diak kabaelan dayta; isu a saanak a naragsak. Gaput’ amakko a makaisawangak iti di umiso, diak payen agkomento kadagiti Nakristianuan a gimong. Agyamanak unay ken Jehova gapu kadagitoy nga artikulo. Tultulongandak dagitoy a mangparmek kadagiti negatibo a kapanunotak.

S. M., Italia

Dagiti artikulo ti kasapulak unay tapno marisutko ti parikutko iti 50 a tawen. Impagarupko a saan a dakes ti agbalin a perpeksionista​—ta ipapaayko met ken Jehova ti kasayaatan a maaramidak. Pampanunotek idi no apay a masansan a marigatanak a makilangen kadagiti annakko, katrabahuak, ken kakabsatko a Kristiano. Naamirisko itan a saan a natimbeng ken saan a maitunos iti kapanunotan ni Jehova ti dadduma kadagiti panangmatmatko. Gapu iti panagbalinko a “nalinteg unay,” pagladladingitek ti bagik ken ti sabsabali. (Eclesiastes 7:16) Narigat a parmeken daytoy a parikut, ngem babaen ti tulong ni Jehova, situtulokak nga agbalbaliw.

C. H., Estados Unidos

Talaga nga agpayso dagiti komento a ti kinaperpeksionista ti manglapped iti maysa a tao a mangiringpas kadagiti bambanag! Adun a tawen a maup-upayak, ta pampanunotek no apay a diak mairingpas ti bambanag a kayatko a mairingpas. Pudno met dagiti punto ti artikulo maipapan iti kinaawan gagayyem ta masansan a kasla awan ti mayat a makikadua kaniak, ngem diak ammo idi no apay. Ita ammokon a napaut ken narigat ti pakidangdangadangak ngem ni Jehova ti tumulong kaniak.

L. R., Estados Unidos

Adun a tawen a makidangdangadangak iti daytoy a parikut, ta kanayon a mariknak a kurang ti maar-aramidak. Nabang-aranak unay ta saan la gayam a sisiak ti makidangdangadang iti kinaperpeksionista.

A. B., Canada

Maawatak nga awan ti perpekto, ngem ti riknak ti mangipapati a rumbeng nga agbalinak a perpeksionista. Naparegtaak unay a nakabasa a saan a namnamaen ni Jehova ti kinaperpekto kadatayo ken napatpateg kenkuana ti adda iti pusotayo. Agyamanak gapu kadagitoy nga artikulo.

S. K., Alemania

Gapu ta maamakak a mapaay, masansan a diak makairugi ken makairingpas iti maysa a banag. Nasursurok a ti kinaperpeksionista ti pakaigapuan ti nakaro a panagpungtot, kinanegatibo, depression, ken nababa a panangmatmat iti bagi. Diak pay naan-anay a narisut ti parikutko, ngem ammok a kayatko a patanoren ti kinamanagpakatawa maipapan kadagiti kamalik.

A. I., Japan

Nakaro ti sinagabak a pannakaburibor ken danag. Tinagibassitko ti bagik babaen ti panangibagak nga “awan serserbik a tao.” Nangipaay dagiti artikuloyo kadagiti makatulong a panangmatmat ken nabara a pammaregta. Nalaglag-anen ti nadagsen a dagensen iti pusok​—ti rumbeng a panagbalinko a perpeksionista. Tinulongandak dagiti Kasuratan a mangbalbaliw iti kababalinko ken mangpatanor iti nasaysayaat a panangmatmat.

M. N., Japan

St. Petersburg Agyamankami kadakayo gapu iti artikulo a “St. Petersburg​—‘Tawa a Pangbuyaan ti Russia iti Europa.’” (Agosto 22, 2003) Kabayatan ti dua a lawas a honeymoon-mi, nakitami a mismo dagiti historiko a buya ti St. Petersburg. Saanminto a pulos a malipatan ti panagpasiarmi iti sanga nga opisina dagiti Saksi ni Jehova, ti Mariinsky Theater, ti State Hermitage Museum, ken Peterhof. Agyamankami unay gapu iti daytoy nga artikulo. Nagserbi dayta a giyami iti daytoy nangayed a siudad!

A. ken O. S., Russia