Ti Panangmatmat ti Biblia

Pakakitaan Aya a Kurang ti Pammatim no Madukotanka?

“MAIPARIT TI PANAGDUKOT.” Iti sidong daytoy a paulo, insurat ti maysa a pastor idi rugrugi ti maika-20 a siglo a saan laeng a dakes ti madukotan kadagiti material a banag no di ket “nakaro a basol.” Itay laeng nabiit, kinuna ti maysa a managpaliiw a nagsurat maipapan iti panangparmek iti panagdukot ken panagsikor, “No madukotantayo, ipakpakitatayo a ditay agtalek iti Dios.”

Kadagita a kasasaad, imbasar dagiti autor ti konklusionda manipud iti Sermon ni Jesus iti Bantay a nangibagaanna: “Isardengyo ti maringgoran.” (Mateo 6:25) Yantangay nagadu ita ti maringgoran, madanagan, wenno madukotan, mabalin a mayimtuodtayo: Rumbeng aya a makonsiensia ti maysa a Kristiano no madukotan? Pakakitaan aya a kurang ti pammatim no madukotanka?

Maawatan ti Dios ti Kinaimperpektotayo

Saan nga isursuro ti Biblia a ti kurang a pammati ti makagapu iti amin a pakadukotan. Gapu ta agbibiagtayo iti “napeggad a tiempo a narigat a pakilangenan,” dandani imposible ti di agdanag wenno di agdukot. (2 Timoteo 3:1) Sarsarangten dagiti matalek a Kristiano dagiti inaldaw a pakadukotan gapu iti sakit, panaglakay ken panagbaket, rigat iti ekonomia, riri iti pamilia, krimen, ken dadduma pay a parikut. Uray idi un-unana, nagamak ken nagdanag dagiti adipen ti Dios.

Usigem ti salaysay ti Biblia maipapan ken Lot. Insuro ti Dios kenkuana nga agkamang iti kabambantayan tapno malisianna ti pannakadadael ti Sodoma ken Gomorra. Nupay kasta, nadukotan ni Lot. Kinunana: “Saan a kasta, pangngaasim, Jehova!” Nagsarimadeng, sana kinuna pay: “Ngem siak​—saanko a kabaelan ti agtalaw nga agturong iti nakabambantay a rehion  ta amangan no ti didigra makaasideg kaniak ket sigurado a matayak.” Apay a nagamak ni Lot a mapan iti kabambantayan? Saan nga imbaga ti Biblia. Aniaman ti makagapu, talaga a nabutngan ni Lot. Ania ti reaksion ti Dios? Nababalaw aya ni Lot gapu iti kurang a pammati wenno panagtalekna iti Dios? Saan. Imbes ketdi, nangipakita ni Jehova iti konsiderasion, isu nga impalubosna nga agkamang ni Lot iti asideg a siudad.​—Genesis 19:18-22.

Adda pay dadduma a pagarigan iti Biblia maipapan kadagiti matalek nga agdaydayaw a nadukotan unay idi. Nabutngan ni mammadto Elias isu a nagtalaw kalpasan a napangtaan a mapapatay. (1 Ar-ari 19:1-4) Da Moises, Anna, David, Habakuk, Pablo, ken dadduma pay a lallaki ken babbai nga addaan iti nabileg a pammati inyebkasda met dagiti pakadukotanda. (Exodo 4:10; 1 Samuel 1:6; Salmo 55:5; Habakuk 1:2, 3; 2 Corinto 11:28) Ngem kinaasian ida ti Dios ken intultuloyna nga inusar ida nga agserbi kenkuana. Dayta ti pakakitaan a talaga a maawatanna dagiti imperpekto a tattao.

“Ti Basol a Silalaka a Mangsagud Kadatayo”

Nupay kasta, no kanayon a madukotantayo, kumapuy ti pammatitayo ken mapukaw ti panagtalektayo iti Dios. Tinukoy ni apostol Pablo ti kurang a pammati kas “ti basol a silalaka a mangsagud kadatayo.” (Hebreo 12:1) Babaen ti panangiramanna iti bagina, posible nga inamin ni Pablo ti posibilidad nga isu a mismo ket ‘nalaka a maisagud’ kadagiti tiempo a pasaray kumapuy ti pammatina.

Nalabit kasta ti napasamak ken ni Zacarias idi saanna a pinati ti anghel a nangipakaammo kenkuana nga agsikog ni baketna. Naminsan, saan a nabaelan dagiti apostol ni Jesus ti nangagas gapu ta ‘bassit ti pammatida.’ Nupay kasta, dagitoy a tattao ket nagtultuloy a nangsagrap iti anamong ti Dios.​—Mateo 17:18-20; Lucas 1:18, 20, 67; Juan 17:26.

Iti sabali a bangir, inlanad met ti Biblia dagiti pagarigan ti tattao a napukaw ti panagtalekda iti Dios isu a nagsagabada iti nakaro. Kas pagarigan, adu nga Israelita a pimmanaw idiay Egipto ti saan a nakastrek iti Naikari a Daga gapu ta kurang ti pammatida. Naminsan, nagsaoda pay ketdi iti maikontra iti Dios, a kunkunada: “Apay nga inaondakami idiay Egipto tapno mataykami iti let-ang? Ta awan tinapay ken awan danum.” Kas pammaneknek a di naragsakan ti Dios, naibaon dagiti nagita nga uleg a nangdusa kadakuada.​—Numeros 21:5, 6.

Dagiti umili iti Nazaret, ti ili a nakayanakan ni Jesus, naikapisda a nakakita iti ad-adu pay a milagro a naaramid iti lugarda gapu ta kurang ti pammatida. Kanayonanna, nakaro ti panangkondenar ni Jesus iti nadangkes a kaputotan iti daydi nga aldaw gapu iti kurang a pammatida. (Mateo 13:58; 17:17; Hebreo 3:19) Maitutop a kastoy ti impakdaar ni apostol Pablo: “Agannadkayo, kakabsat, ta amangan no addanto ketdi tumanor iti asinoman kadakayo a maysa a nadangkes a puso nga awanan pammati babaen ti iyaadayo iti sibibiag a Dios.”​—Hebreo 3:12.

Wen, kadagiti nakaro a kasasaad, ti kurang a pammati ket mabalin a resulta ti dakes a puso. Ngem saan a kasta ti kasasaad ni Zacarias ken dagiti apostol ni Jesus kadagiti pagarigan a nadakamat itay. Ti kurang a pammatida ket gapu iti apagbiit a kinakapuy. Ipakita ti intero a panagbiagda a “nasin-aw ti pusoda.”​—Mateo 5:8.

Ammo ti Dios Dagiti Kasapulantayo

Tulongannatayo dagiti Kasuratan a mangilasin iti nagdumaan dagiti gagangay ken inaldaw a pakadukotan ken ti basol a kurang a pammati. Dagiti inaldaw a pakadukotan wenno apagbiit a kinakapuy ti pammati gapu iti pagkapuyan ti tao ket saan koma a maipada iti naan-anay a kinaawan ti panagtalek iti Dios gapu iti dakes ken timmangken a puso. No kasta, masapul a di makonsiensia dagiti Kristiano gapu laeng ta pasaray madukotanda.

Nupay kasta, kasapulan ti panagannad tapno saan a kumaro dagiti pakadukotan ket dagita ti agbalin a kangrunaan iti panagbiagtayo. Gapuna, nainsiriban ti kinuna ni Jesus: “Dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’” Pinasarunsonanna daytoy kadagitoy makaliwliwa a sasao: “Ta ammo ti nailangitan nga Amayo nga amin dagitoy a banag ket kasapulanyo. Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.”​—Mateo 6:25-33.

[Ladawan iti panid 16]

Napasaran idi ni apostol Pablo ti adu a pakadukotan