Ti Panangmatmat ti Biblia

Ania ti Kaipapanan ti Panagbalin nga Ulo iti Sangakabbalayan?

SIGUN iti Biblia, “ti ulo ti babai isu ti lalaki.” (1 Corinto 11:3; Efeso 5:23) Ngem patien ti adu nga agkunkuna a raraemenda ti Biblia nga inuugma ken makadangran pay ketdi daytoy a prinsipio ti kinaulo ti asawa a lalaki. “Ti pannursuro a rumbeng nga ‘agpasakup a situtulok’ dagiti babbai [kadagiti assawada], no aglablabes ti pannakayaplikarna, ket mabalin nga agtungpal iti panangabuso, agpadpada iti pisikal ken emosional,” kinuna ti maysa nga agassawa. Nakalkaldaang ta nagadu ti mangab-abuso iti kinauloda. Kuna ti maysa nga autor: “Iti adu a pagilian, maibilang a paset ti maakseptar a kababalin ti panangkabil iti asawa a babai​—maysa a kalintegan ti lallaki a makomendaran iti adu a kanta, proverbio, ken kasaran.”

Isingasing ti dadduma a ti prinsipio ti Biblia maipapan iti kinaulo ti makagapu kadagitoy a kinaulpit. Mangtagibassit aya iti babbai ken mangparegta iti kinaranggas iti pagtaengan ti pannursuro ti Biblia maipapan iti kinaulo? Ania ti aktual a kaipapanan ti panagbalin nga ulo iti sangakabbalayan? *

Saan a Dinidiktador ti Kinaulo

Naayat nga urnos ti kinaulo nga isursuro ti Biblia ken dina ipasimudaag ti kinaulpit. Idi laeng simmukir ti tattao iti Dios a nagresulta dayta iti masansan a naulpit a panangtrato ti lallaki kadagiti babbai. (Genesis 3:16) Sipud pay idi napapanaw  ti tattao manipud iti minuyongan ti Eden, masansanen nga abusuen ti lallaki ti pannakabalinda, a siuuyong a gundawayanda ti dadduma, a pakairamanan ti babbai ken annak.

Nupay kasta, dayta ket saan a pulos a paset ti panggep ti Dios. Kagura ni Jehova dagidiay mangabuso iti autoridadda. Kinondenarna dagiti lallaki nga Israelita a ‘nakilangen a sigugulib’ kadagiti assawada. (Malakias 2:13-16) Kanayonanna, kuna ti Dios nga “asinoman a mangay-ayat iti kinaranggas pudno unay a guraen ti kararuana.” (Salmo 11:5) Isu a dagiti manangkabil kadagiti assawada ken ti dadduma nga abusado dida pulos a mausar ti Biblia a pangikalintegan iti naranggas nga ar-aramidda.

Ania ti Nairaman iti Umiso a Kinaulo?

Ti kinaulo ket napateg nga urnos ti Dios tapno mataginayon ti sapasap a kinaurnos. Malaksid iti Dios, amin adda pagpasakupanda. Ni Kristo ti pagpasakupan dagiti lallaki, agpasakup ti ubbing kadagiti dadakkelda, ken agpasakup ti amin a Kristiano kadagiti gobierno. Uray ni Jesus ket agpasakup iti Dios.​—Roma 13:1; 1 Corinto 11:3; 15:28; Efeso 6:1.

Napateg ti panagpasakup iti kinaulo tapno naurnos ken natalged ti kagimongan. Umasping iti dayta, napateg ti panagpasakup iti ulo ti pamilia tapno tumanor ti natalged, naragsak, ken natalna a pamilia. Di agbalbaliw daytoy a kinapudno uray no awan ti asawa a lalaki wenno ama iti pamilia. Kadagita a pamilia, ti ina ti agserbi nga ulo. No agpada nga awan ti ama ken ina, ti inauna nga anak wenno sabali pay a kabagian ti mabalin nga agserbi nga ulo iti sangakabbalayan. Iti amin a kasasaad, mabenepisiaran dagiti miembro ti pamilia no ipakitada ti umiso a panagraem iti daydiay naikkan iti rebbengen a mangidaulo.

Ti napateg ngarud isu ti di pananglaksid iti kinaulo no di ket ti panagsursuro a mangitungpal ken mangtarus a siuumiso iti dayta. Indagadag ni apostol Pablo kadagiti Kristiano nga assawa a lallaki nga agbalinda nga ulo iti sangakabbalayanda “a kas met ti Kristo isu ti ulo ti kongregasion.” (Efeso 5:21-23) Impatuldo ngarud ni Pablo ti wagas ti pannakilangen ni Kristo iti kongregasion kas ti perpekto a pagtuladan iti kinaulo. Ania ti inyulidan ni Kristo?

Nupay ni Jesus ket inikkan ti Dios a mismo iti autoridad kas Mesias ken masakbayan nga Ari sa adayo a nalalaing ken aduan iti kapadasan iti biag ngem kadagiti adalanna, isut’ nadungngo, mannakipagrikna, ken naasi. Saan a pulos a nauyong, naturay, wenno manangipapilit kadagiti tattao. Saan a manangdominar ken kanayon nga impalagipna iti amin nga isut’ Anak ti Dios. Naemma ken napakumbaba ni Jesus. Nagbanaganna, ‘ti sangolna nalanay ken ti awitna nalag-an.’ (Mateo 11:28-30) No kasta, isut’ nalaka a maasitgan ken nainkalintegan. Kinapudnona, kuna ni Pablo nga inayat ni Jesus ti kongregasion iti kasta unay nga uray la nga “inyawatna ti bagina a maipaay iti dayta.”​—Efeso 5:25.

Kasano a Matulad ti Maysa nga Ama ti Kinaulo ni Jesus?

Kasano a matulad dagiti ulo iti pamilia dagiti kalidad ni Kristo? Ti responsable nga ulo ipakitana ti pannakaseknanna iti pisikal ken naespirituan a pagimbagan ti pamiliana. Ipangpangrunana ida babaen ti panangipaayna iti maitutop a tiempo ken panangasikaso iti kasapulan ti tunggal maysa ken iti kasapulan ti intero a pamiliana. Ad-adda a maseknan iti pagimbagan ti asawa ken annakna ngem iti pagimbaganna. * (1 Corinto 10:24; Filipos 2:4) Babaen ti panangyaplikarna kadagiti prinsipio ken pannursuro ti Biblia iti inaldaw a kabibiagna, magun-odan ti asawa a lalaki ti panagraem ken panangsuporta ti asawa ken annakna. Babaen ti naayat a kinaulona, agballigi dagiti panagreggetda a mangrisut iti aniaman a parikut. Isu a babaen ti panangyaplikarna iti kinaulona iti Nainkasuratan a pamay-an, mangibangbangon ti asawa a lalaki iti naragsak a pamilia, daydiay pamilia a mangipadayag ken mangidayaw iti Dios.

Napakumbaba met ti masirib nga ulo. No kasapulan, sidadaan nga agpadispensar, uray no mabalin a marigatan a mangamin nga isut’ nagkamali. Kuna ti Biblia nga adda pannakaisalakan “iti kinaadu dagiti manangbalakad.” (Proverbio 24:6) Wen, ti kinapakumbaba ti mangtignay met iti ulo ti pamilia a dumngeg ken situtulok a mangikabilangan iti kapanunotan ni baketna ken dagiti annakda no maitutop. Babaen ti panangtuladna ken Jesus, masigurado ti Kristiano nga ulo a ti kinaulona ket saan laeng a mangyeg iti kinaragsak ken kinatalged ti pamiliana no di ket mangidayaw ken mangipadayag iti Namunganayan ti amin a pamilia a ni Jehova a Dios.​—Efeso 3:14, 15.

[Footnotes]

[Ladawan iti panid 26]

Ti nainkalintegan nga asawa ikabilanganna dagiti kapanunotan ni baketna ken dagiti annakda