Dagiti Rag-o ken Karit iti Kinaagtutubo

MABALIN a nakaragragsak ti biag iti panawen ti kinaagtutubo. Kinapudnona, para iti adu nga agtutubo, nakaragragsak dayta. Ket adu nga adulto ti maragsakan a manglagip iti panawen ti kinatin-edyerda.

Ngem iti dayta met la a panawen, masapul a bigbigentayo nga agbibiagtayo iti “napeggad a tiempo a narigat a pakilangenan.” (2 Timoteo 3:1) Daytoy ti ad-adda a mangparigat kadagiti agtutubo. Naiduma daytoy a rigat iti napasaran dagiti napalabas a kaputotan. Nalabit daytoy ti makagapu no apay nga ipadis ni Sabrina Solin Weill, kangrunaan nga editor ti maysa a magasin dagiti tin-edyer, ti kapadasan dagiti agtutubo iti “pannagna iti nairteng a tali nga awan ti mangsarapa nga iket.” Kinapudnona, mabalin a napno daytoy narikut a panawen iti panagbiag kadagiti nakababain a kapadasan, danag, ken pannakariribuk. “Gapu ta mariribukan dagiti agtutubo a mangandur iti baet ti panawen ti kinaubing ken kinanataenganda,” kuna ni Weill, “masapul nga anduranda dagiti di matarigagayan a kasasaad dagita a panawen.”

No maysaka nga agtutubo, kasano a madaeram dagiti maipasango a karit kenka? No maysaka nga ama wenno ina ti maysa nga agtutubo, kasano a matulonganka a manglagip iti pangipadisam kadagitoy nariribuk a tawen ket iti kasta, nasaysayaat ti pannakaawatmo iti mapaspasaran ti anakmo? Iti daytoy a serye, awisenmi agpadpada dagiti agtutubo ken nataengan nga ad-adda a mangusig iti kinaagtutubo. Ti panangaramid iti dayta saanna laeng a tulongan dagiti agtutubo a mangandur iti panawen ti kinaagtutuboda no di ket tulonganna met ida nga agballigi iti biag.