“Laglagipem ti Namarsua Kenka”

“Laglagipem ti Namarsua kenka bayat ti kinaagtutubom! Kadagiti umay a tawen, mapadagsenankanto kadagiti rigat ket kunaem, ‘Diak maragsakanen iti biag.’”​—Eclesiastes 12:1, “Contemporary English Version.”

MAMAGPANUNOT unay ti teksto iti Biblia a nadakamat iti ngato. Maminsan laeng nga agbalinka a baro wenno balasang. Kalpasanna, lagipemton dagiti tawen ti kinaagtutubom, no makapnek wenno silaladingit a pagbabawyam dayta. Ania ti kayatmo kadagitoy? Kasano a maiturongmo ti pagtungpalanna?

“Laglagipem ti Namarsua kenka,” idagadag ti Biblia, kas nadakamat iti ngato. Kasano a maaramidmo ti kasta? Babaen ti panangipangag kadagiti linteg ken prinsipio ti Dios a nailanad iti Saona a ti Biblia. Daytoy dina kayat a sawen a paidamam ti biagmo gapu iti kinapanatiko iti relihion, ket paidamam ti bagim iti amin a pagragsakan. Imbes ketdi, no lagipem ti Namarsua kenka, magun-odam ti kasta unay a ragsak. Kasano a kasta?

Kas panangyilustrar, panunotem a naikkanka iti lugan ken lisensia nga agmaneho. Adda naragsak a baro a wayawaya a naipasango kenka, a mangparagsak kenka. Panunotem laengen dagiti mabalinmo a pagpasiaran! Nupay kasta, ti kabbaro a wayawayam ket napakuyogan iti nadagsen a rebbengen. Bayat ti panagmanehom, masapul a tungpalem dagiti pagalagadan iti kalsada ken senial ti trapiko, ti limitasion ti kapartak ti panagpataraymo, ken dagiti mamakdaar a senial. Dagitoy aya a rebbengen ti mangpukaw iti ragsakmo nga agmaneho? Saan a pulos! Kinapudnona, dagita ti mangsalaknib kenka. Talaga a saan a makaparagsak ti maaksidente, saan kadi?

Umasping dayta iti wayawaya nga inted ti Namarsua kenka a ni Jehova a Dios. Bayat nga agmatmataenganka, pagpilpiliennaka no kasano ti panangusarmo iti biagmo. (Deuteronomio 30:19; Proverbio 27:11) Anian a nakaskasdaaw a pribilehio dayta! Ngem dayta a wayawaya adda kakuykuyogna a nainget a rebbengen. Iti Saona, imbinsabinsa ni Jehova dagiti ‘pagalagadan iti kalsada’​—dagiti pagalagadan iti biag a kayatna a surotem. Dagitoy kadi nga alagaden ti manglapped iti ragsakmo? Saan! Imbes ketdi, salaknibannaka manipud iti pakariribukan ken rigat a mangap-apektar iti nagadu nga agtutubo ita.

 Ammo ni Federico, nga agtawen itan iti nasurok a 30, a pudno dayta. Kas agtutubo idi a lalaki, nakitana dagiti kaeskuelaanna a nairaman iti amin a kita ti aramid nga ammona a masapul a liklikanna. “Kasla maragragsakanda,” kunana, “ngem diak pulos pinanunot a talaga a naragsakda.” No lagipenna ti napalabas, maragsakan ni Federico ta adda dagiti pagalagadan ti Biblia a nangiturong kenkuana bayat ti kinaagtutubona. “Pudno a naaddaanak met idi kadagiti parikut, kas iti dadduma nga agtutubo,” kunana. “Ngem talaga a sinalaknibannak ti Biblia. Ken kanayon nga adda padak a Kristiano a tumultulong kaniak. Naragragsakak iti panangsurotko kadagiti prinsipio ti Biblia ngem iti pagarupko!”

Kayat ni Jehova a Dios nga agragsakka​—talaga a maragsakan. Saan laeng a parparawpaw a ragsak dayta a mangabbong iti nakalemmeng a panagliday. Kuna ti Biblia: “Pagragsakam ti kinaagtutubom. Agragsakka bayat nga agtutuboka pay laeng.” Ngem dayta met la a bersikulo inayonna kas pakdaar. “Laglagipem,” kunana, “nga ukomennaka ti Dios iti aniaman nga aramidem.”​—Eclesiastes 11:9, Today’s English Version.

Laglagipem ti Namarsua kenka babaen ti nainsiriban a panangusarmo iti wayawaya nga intedna kenka. No kasta ti aramidem, sigurado a lagipennaka ti Namarsua kenka ket ipaayna ti kadakkelan a ragsak a mabalin a magun-odam. Kuna ti Biblia: “Ti bendision ni Jehova​—isu dayta ti mangpabaknang, ket awan rigat nga inayonna iti dayta.”​—Proverbio 10:22.

Tapno matulongan dagiti agtutubo a mangsaranget kadagiti pakarigatan iti kinaagtutubo, nangipablaak dagiti Saksi ni Jehova iti 320 ti panidna a publikasion a napauluan iti Dagiti Saludsod nga Iyimtuod ti Agtutubo . . . Dagiti Sungbat nga Epektibo. Agingga itatta, dandanin 34 a milion a kopia daytoy a libro ti nayimprenta iti 77 a lenguahe. Mabalinmo ti maaddaan iti dayta no makiumanka kadagiti Saksi ni Jehova iti lugarmo.

[Dagiti Ladawan iti panid 8, 9]

Dagiti Makatulong Kenka nga Agballigi kas Agtutubo

Iyeskediulmo ti tiempom a mangbasa iti Sao ti Dios

Aggaggagetka iti ministeriom

Liklikam dagiti dakes a kakadua

Taginayonem ti nasinged a pannakikomunikarmo kadagiti dadakkelmo

[Credit Line]

Akkub ti broshur: Pictorial Archive (Near Eastern History) Est.