Manipud Kadagiti Agbasbasa

Komunikasion Natignayak nga agsurat maipapan iti serye ti “Komunikasion​—Nakapatpateg iti Biag.” (Setiembre 22, 2003) Dineskribirna ti masansan a mapaspasamak iti intero a nakaparsuaan​—dagiti parsua nga agtitinnulong. Agpipinnakdaar uray dagiti mula no adda dagiti agkaan kadakuada! Nagsayaat koma no masursuro met dagiti tattao ti maseknan iti maysa ken maysa.

C. C., Estados Unidos

Nagustuak ti panangdeskribiryo no kasano ti pannakikomunikar dagiti animal iti maysa ken maysa. Masapul a bigbigentayo nga adda Dios a nangaramid amin kadagitoy nakaskasdaaw a banag.

R. Z., Alemania

Kurang ti sasao tapno mayebkasko ti rag-ok bayat a binasak dagita nga artikulo. Anian a nakaskasdaaw a pribilehiotayo ta mabalintay ti makikomunikar iti Dios!

A. W., South Africa

Idi rinugiak ti nagbasa itay agsapa talaga a nalidayak. Ngem pinagkatawanak ti benneg ti artikulo maipapan iti pannakikomunikar dagiti insekto iti maysa ken maysa. Naragsakak a napan iti panggedak.

L. L., Francia

Dagiti Tato Pagyamanan unay iti artikulo nga “Agimtuod Dagiti Agtutubo . . . Rumbeng Aya nga Agpatatoak?” (Setiembre 22, 2003) Kinapudnona, impagarupko a napintas ken uso idi dagiti tato isu a kayatko ti gumatang iti temporario a tato a maidekket laeng iti kudilko. Nupay kasta, talaga a naamirisko ti kinaserioso daytoy a banag babaen ti sasao a ditay kayat a markaan ti bagitayo iti mangibabain iti Dios “uray no temporario laeng.” Idi naamirisko a ti panagpatato ket mabalin a makaitibkol iti sabsabali ken pakaigapuan ti panangmatmat ti dadduma a maysaak a rebelde, inkeddengko a saanakon nga agpatato.

A. K., Japan

Talaga a kayatko idi ti agpatato. Ngem tinulongannak daytoy nga artikulo a mangamiris a mabalin a pagbabawyakto met laeng dayta inton agangay. Nadakamatyo met dagiti pagdaksanna iti salun-at a saanko idi a napanunot. Pagyamanan unay iti kasta a nakappapati nga artikulo.

D. T., Francia

Dagiti Piñata Nagustuak a binasa ti artikulo a “Ti Piñata​—Kadaanan a Tradision.” (Setiembre 22, 2003) Kalpasan a binasak dayta, adda salsaludsod a kayatko a masungbatan. Pudno a naibasar iti mapangnamnamaan nga ebidensia ti pannakainaigna iti palso a relihion. Ngem kasla ipasimudaag ti artikulo a no la ket ta saan a mangburibor dayta iti konsiensia ti maysa a tao, mabalin dayta. Kasano met ngay dagiti pasken a kas iti panagkasangay ken Krismas?

S. W., Estados Unidos

Sungbat ti “Agriingkayo!”: Liklikan dagiti Kristiano ti aniaman a selebrasion wenno kostumbre a nakainaigan ti palso a narelihiosuan a patpatien wenno aramid a mangsalungasing kadagiti prinsipio ti Biblia. Kas pagarigan, ti Biblia matmatanna a silalawag a di makaay-ayo dagiti panagkasangay. (Genesis 40:20; Mateo 14:6-10) Nupay kasta, no nakabatbatad a ti maysa a kostumbre ket saanen a nainaig iti palso a relihion ken awan met dagiti masalungasing a prinsipio ti Biblia, masapul nga agdesision ti tunggal Kristiano no surotenna ti kasta a kostumbre.

Pakasaritaan ti Maysa a Sientista Pagyamanan unay iti nagsayaat nga artikulo a “Siensia ti Relihionko Idi.” (Setiembre 22, 2003) Saan a nagamak ni Kenneth Tanaka a nangbigbig kadagiti kinapudno. Sipapakumbaba met nga inaminna a saan a husto ti pinatina iti adu a tawen. Umiso ti kapanunotanna.

S. A., Russia

Agsagsagabaak iti depression, ken lablabanak ti tarigagayko nga agpakamatay. Kalpasanna, nabasak ti saludsod iti artikulo ni Kenneth Tanaka a “No mapukawtayto met laeng inton agangay, adda pay ngarud aya serserbi ti itataudtayo?” Daytoy ti nangpikapik iti pusok. Kas man la ibagbaga ti Dios nga, “Saanka nga agpakamatay!”

C. I., Japan