“Saan Koma nga Agbalin a Diktador ti Konsilio iti Siudad”
“Saan Koma nga Agbalin a Diktador ti Konsilio iti Siudad”
BABAEN ITI MANNURAT TI AGRIINGKAYO! IDIAY CANADA
SALAKNIBAN ti Canadian Charter of Rights and Freedoms ti wayawaya ti amin nga umili iti Canada. Ti wayawaya nga agsao, agiwarnak, ken agdayaw ket impasdek ti konstitusion ken ipapaalagad dagiti korte.
Isu a nagtignay dagiti Saksi ni Jehova idi nanginayon ti ili ti Blainville, maysa a komunidad iti amianan a laud ti Montreal, iti amendamente a mangiparit iti panagbalaybalay. Ti naisingasing a amendamente apektaranna ti ministerioda a panagbalaybalay. (Aramid 20:20, 21) Ngem apay a naisingasing dayta a panagbalbaliw? Sigun kadagiti opisial ti ili, adu kano ti nagreklamo maipapan iti panagbalaybalay dagiti Saksi ni Jehova. Nupay kasta, sigun iti rekord ti departamento ti polisia, iti napalabas a lima a tawen, awan ti uray maysa a reklamo maipapan iti trabaho dagiti Saksi ni Jehova!
Nupay kasta, idi 1996, napagbalin a linteg ti amendamente. Dagiti abogado dagiti Saksi ni Jehova iti Blainville dagus a pinakaammuanda ti ili a gapu ta ipalubos ti konstitusion ti wayawaya ti relihion, awan ti kalintegan ti ili a mangusar iti linteg tapno iparit ti aktibidad dagiti Saksi ni Jehova. Saan nga inkankano dagiti opisial ti ili daytoy a pakaammo ket intultuloyda ti nangipatulod iti 17 nga abiso nga agparang iti korte. Nagdarum dagiti abogado dagiti Saksi tapno malapdan ti Blainville a mangiparit iti narelihiosuan a wayawaya ken wayawaya nga agsao—a kalintegan ti amin nga umili iti Canada.
Nabista ti kaso idiay Quebec Superior Court iti imatang ti Madaydayaw a Mahistrado a ni Jean Crépeau idi Oktubre 3 ken 4, 2000. Kalpasan ti panangadal, impaulog ti mahistrado ti desisionna a pabor kadagiti Saksi ni Jehova. Patien ni Mahistrado Crépeau “a dagiti nagpetision sursurotenda ti inaramid ti immuna a kongregasion Kristiano nga agbalaybalay tapno sarungkaranda dagiti kaarrubada ken paregtaenda dagiti tattao a mangtaginayon iti nangato a moralidad ken espiritualidad. . . . Maysa a serbisio iti komunidad ti isasarungkar kadagiti tattao iti balbalayda. Iti promedio, sarungkaran dagiti Saksi ni Jehova dagiti umili iti Blainville maminsan iti kada uppat a bulan tapno awisenda ida a makisarita maipapan kadagiti positibo ken kadawyan a banag nga agpapada a paginteresanda.” Iti pangngeddengna, kinuna ni Mahistrado Crépeau: “Ibaga [ti Korte] a saan a kasapulan dagiti Saksi ni Jehova ti mangala iti permiso tapno maibanag ti ministerioda.”
Inyapelar ti Blainville ti desision ni Mahistrado Crépeau iti Court of Appeal ti Quebec. Nabista ti panagapelar idi Hunio 17, 2003, ket naipaulog ti pangngeddeng idi Agosto 27, 2003, a nangpatalged iti desision ti hues idi immuna a nabista ti kaso. Iti panangisitarna iti Canadian Charter of Rights and Freedoms, a mangsalsalaknib iti wayawaya ti relihion a pakairamanan ti kalintegan a mangiparangarang iti narelihiosuan a pammati babaen ti panangisuro ken panangiwaragawag, impaulog ti Korte ti sasao a kunkunana: “Ti makukuestion a linteg nakaro ti pananglappedna iti wayawaya ti relihion dagiti Saksi ni Jehova ken ti wayawaya ti panunot, pammati, opinion ken panagsao dagiti umili iti Blainville . . . Ipakita dagiti ebidensia a saan nga agrekreklamo dagiti umili iti Blainville maipapan iti naganetget a panangallukoy dagiti Saksi ni Jehova no di ket kadagiti adu nga aglaklako ken agdaldaliasat a negosiante. Awan ti naganat ken pudno a pakasapulan ti pananglimitar iti narelihiosuan a panagbalaybalay. Kasta met, naaramid ti amendamente nga awan ti panangikabilangan ken apurado ken awan man la ti panagkonsulta, di nainkalintegan ken di maitunos ti epektoda iti naibaga a panggepna a mangsalaknib iti kinapribado dagiti umili. . . . Iti siwayawaya ken demokratiko a kagimongan, saan koma nga agbalin a diktador ti konsilio iti siudad babaen iti panangpadasna a mangikeddeng no asino ti pasangbayen dagiti umili iti pagtaenganda iti rabii wenno iti ngudo ti lawas. Husto ti umuna a hues idi impaulogna a ti amendamente ket saan nga agaplikar kadagiti Saksi ni Jehova.” *
Maragsakan dagiti Saksi ni Jehova ta inyaplikar dagiti korte ti Quebec ti Charter of Rights iti daytoy a kaso tapno masalakniban ti narelihiosuan a wayawaya ti amin nga umili ti Quebec manipud kadagiti babassit a panangirurumen.
[Footnote]
^ par. 7 Ti titulo a “diktador” tuktukoyenna ni George Orwell iti nobela a Nineteen Eighty-four a sadiay, ti pagarigan a totalitariano nga estado iturturayanna dagiti umilina babaen iti pangulo ti partido nga adda iti amin a lugar, ti Diktador, a makaammo iti amin a naibaga ken naaramid iti gobierno.
[Mapa iti panid 24]
(Para iti aktual a pannakaurnosna, kitaem ti publikasion)
CANADA
Blainville
Montreal
E.U.A.
[Ladawan iti panid 24]
Salakniban ti Canadian Charter of Rights and Freedoms ti wayawaya ti amin nga umili iti Canada
[Dagiti Ladawan iti panid 25]
Siwayawaya itan dagiti Saksi a mangaramid iti publiko a ministerioda idiay Blainville. Bassit a retrato: Pannakigimong iti Kingdom Hall-da