Manipud Kadagiti Agbasbasa

Agrikultura Nagsuratak tapno agyaman iti serye nga “Agrikultura​—Apay nga Agpegpeggad?” (Oktubre 8, 2003) Agnanaedak iti kataltalonan. Gapu iti rigat ti biag ken dadduma pay a makagapu, ilaklako dagiti mannalon ti dagada. Kasla inaldaw nga adda maibangon a baro a kabalbalayan a mangsukát kadagiti talon. No dadduma, pampanunotek no addanto pay ngata aniaman a daga a mabati a matalon. Makaparagsak a maammuan a mangyegto ni Jehova iti manayon a solusion ti krisis iti agrikultura.

V. A., Estados Unidos

Mosaic Pagyamanan iti artikulo a “Mosaic​—Panangilamina Babaen Kadagiti Bato.” (Oktubre 8, 2003) Iti dayta nga artikulo, adda retrato ti maysa a mosaic a naidispley iti asideg a parke ti gobierno. Agnanaedak iti asideg dayta a parke iti nasuroken a sangapulo a tawen, ket diak pay pulos nakita dagiti mosaic. Isu a napanko kinita dagitoy ket nagustuak unay ida. Ita, ad-addan nga apresiarek ti arte dagiti mosaic.

E. D., Estados Unidos

Kanayon idi a kayatko a maammuan ti ad-adu pay maipapan kadagiti mosaic​—nangruna ta dinar-ayanmi ti maysa a kombension dagiti Saksi ni Jehova idiay Russia idi 1993. Idiay St. Petersburg ken Moscow, mabalintayo nga apresiaren ti nagadu a nagpipintas a mosaic. Agyamankami kadagiti artist a nangbusbos iti adu a tawen a nangaramid kadagita nga obra ken kadakayo a nagsurat iti kasta a makaisuro nga artikulo.

B. Z., Alemania

Dagiti Naiduma nga Estilo ti Panagbiag Agyamanak gapu iti artikulo a “Ti Panangmatmat ti Biblia: “Dagiti Naiduma nga Estilo ti Panagbiag​—Anamongan Kadi ti Dios?” (Oktubre 8, 2003) Agtawenak iti 17 ket napadakkelak kas maysa a Kristiano. Nupay kasta, nangrugin a nariknak a maysaak a bakla idi ubingak pay laeng. Nagrigat a tarusan dagiti riknak, ngem nagsayaat a maammuan a matarusan ni Jehova ti rigat a pakidangdangadangak. Kadagiti dadduma pay a makidangdangadang iti kasta a rikna, dikay sumuksuko!

J. M., Estados Unidos

Iti intero a panagbiagko, matutuokak iti di umiso a seksual a riknak. Inlawlawag ti artikuloyo ti kasasaad dagiti kas kaniak. Gapu ta nakabuyaak iti pornograpia sipud pay idi ubingak ken seksual a naabusoak, nakaro ti epekto dayta kaniak. Pagyamanan iti panangtulongyo kaniak a mangtarus iti bagik.

J.B.M., Estados Unidos

No maipapan iti seksual a tarigagay, nainsiriban a madakamat dagiti impluensia ti bambanag a kas kadagiti gene, hormone, pannakapadakkel, ken adu pay a banag. Agpayso a dagidiay makidangdangadang kadagiti homoseksual a pagannayasan ket makasarak iti panangandingay iti kongregasion Kristiano.

D. L., Britania

Sungbat ti “Agriingkayo!”: Makipagriknakami iti asinoman a makidangdangadang kadagiti seksual a riknada. Kas iti binigbig ti artikulomi, mabalin a komplikado dagiti makagapu kadagita a rigat. Ngem no la ket ta saan nga igaggagara ti maysa a parasuken wenno aramiden dagiti imoral a seksual a tarigagayna, makapagtalinaed a nadalus iti imatang ni Jehova. Namnamaen dagita a tattao a maragsakan ni Jehova a Dios no ikagumaanda ti agtalinaed a nadalus iti moral.​—Proverbio 27:11.

Dagiti Molino ti Angin Nagustuak ti artikulo a “Dagiti Molino ti Angin​—Nangayed a Mangipalagip iti Napalabas.” (Oktubre 8, 2003) Naammuak a dagiti molino ti angin ket maus-usar saan laeng a pagkiskis iti bukel a mapagbalinto nga arina no di ket adu pay ti pakausaranda. Maysaak a simple laeng nga agtutubo nga agtaltalon ket agyamanak unay iti amin nga impaayyo nga impormasion.

S. A., Russia

Apresiarenna ti Agriingkayo! Pagyamanan iti ruar nga Oktubre 8, 2003. Ita pay laeng a naungpotko a nabasa ti maysa a magasin. Ngem nangrugin a naamirisko a rumbeng nga adalek ti amin nga ipapaay ni Jehova kadatayo. Uray kaskasano, nasdaawak a makapainteres gayam dayta! Talaga a nagsayang ta nagadu a ruar daytoy a magasin ti diak nabasa a naan-anay!

R. K., Japan