Nakakitaka Kadin iti Stilt Palm?

BABAEN ITI MANNURAT TI AGRIINGKAYO! IDIAY PERU

GAGANGAY a makita dagiti stilt palm iti sumagmamano a paset ti lubong. Karkarna ti langana. Agsardeng a dumakkel ti damo a ramut ti palma apaman a dimtengen iti masinunuo a kadakkelna, idinto ta agtultuloy a dumakkel ti dadduma a paset ti mula. Gapuna, agpataud ti puonna iti ad-adu a ramut, a dumanon iti daga isu a kasla kadang ti langana.

Saan laeng a makapainteres a mula dagiti stilt palm. Dayta ti pagnanaedan ti babassit nga animal nga aglemmeng iti nagbabaetan ti ramutda. Mabenepisiaran met ti tao kadagitoy. Iti dadduma a pagilian, dagitoy ti us-usaren dagiti umili kas kayo a pagaramid kadagiti balayda, agraman iti datarda, ket usarenda met dagiti bulong a pagatep, pagaramid iti walis, ken paglaga kadagiti basket. Dadduma a tattao nga agnanaed kadagiti lugar nga adayo iti napuskol a kabakiran ti mabalin a nagusaren iti napintas a baston wenno mabalin a nakapagnadan iti nalagda a suelo a naaramid iti kayo ti stilt palm a pakakitaan kadagiti natayengteng nga urarit.

Kas iti adu a palma, mabalin met a pagtaraon dagiti stilt palm. Kaaduan ti addaan iti naimas ken nananam nga ubog. Nakalkaldaang ta bayat nga umad-adu ti mayat iti daytoy espesial a taraon, dadduma a kita ti palma ti mapukan a nangnangruna gapu iti nalukneng ken naimas nga ubog, isu a mabaybay-an a nakawalang ti dadduma a paset ti kayo.

[Dagiti Ladawan iti panid 31]

Agtaud kadagiti stilt palm ti adu a makatulong a produkto