Pakasarakam iti Nasayaat a Pagalagadan iti Moral?

AGBIBIAGTAYO iti lubong nga agbaliwbaliw dagiti nasayaat a kababalin. Masansanen a di maikankano itatta dagiti makondenar idi a sinasaur nga aramid. Masansan a ti media itan-ok ken ibilangna a bannuar dagiti mannanakaw ken managsaur. Pagbanaganna, adu a tattao ti maitutop iti panangiladawan ti Biblia: “Kaanoman a makakitaka idi iti mannanakaw, naay-ayoka pay kenkuana.”​—Salmo 50:18.

Ngem talaga a saan a rumbeng a maitan-ok dagiti managsaur. Kuna ti maysa nga autor: “Ti naisangsangayan a pakailasinan dagiti agpampammarang ket uray  no ubbingda pay unay, kadawyanna a nalaingda a mangallilaw kadagiti tattao iti aglawlawda. Mainayon iti dayta ti dida pannakakonsiensia wenno dida pannakarurod iti inaramidda. Mapnekda pay ketdi​—maragsakanda isu a maparegtada nga agtultuloy a mangallilaw tapno maalada ti kayatda, uray no aniaman ti mapasamak iti biktima.”

Siempre, maasian ti publiko iti balo a nasaur iti nabayagen nga urnongna, ngem manmano ti maldaang no adda agsaur iti dakkel a gatad iti dakkel a negosio wenno kompania ti insurance. Adu pay ketdi ti agkuna nga uray ta nabaknang met dagita a negosio. Ngem saan laeng a parikut dagiti negosio ti kasta a panagsaur; pagbayadenda dagiti sukida iti nanginngina tapno masupusopan dagiti pukawda. Iti Estados Unidos kas pagarigan, agbaybayad iti nasurok a $1,000 iti tinawen a kanayonan nga insurance premium ti kadawyan a pamilia tapno malitupan ti pukaw gapu iti panagsaur.

Adu met a tattao ti manggundaway iti nalaka ti presioda a peke a produkto a kas kadagiti kawes, relo, bangbanglo, kosmetiko, ken bag. Mabalin a mabigbigda a dakkel ti malugi kadagiti negosio gapu kadagiti nalaka ti presioda a peke a tagilako, ngem pagarupenda a dida maapektaran. Ngem kamaudiananna, nanginngina met la ti bayadan dagiti aggatang kadagiti tagilako ken serbisio dagiti legal a negosio. Kanayonanna, bumaknang dagiti kriminal no gumatangka kadagiti peke a tagilako.

Kastoy ti insurat ti maysa nga autor a mangikagkagumaan a mangparmek iti panagsaur: “Patiek a ti kangrunaan a rason a nakaad-adu ti panagsaur itatta ket agbibiagtayo iti kagimongan a nagdakes ti kababalinna. Dimmakes unayen dagiti kababalin isu a timmaud ti grupo ti nasaur a tattao. . . . Agbibiagtayo iti kagimongan a saan a mangisuro iti nasayaat a kababalin iti pagtaengan. Agbibiagtayo iti kagimongan a di mangisuro iti nasayaat a kababalin iti eskuelaan, agsipud ta maakusar dagiti mannursuro no mangisuroda iti nasayaat a moral a pagalagadan.”

Maisupadi iti dayta, isursuro ken ikagkagumaan dagiti Saksi ni Jehova ti agbiag a maitunos kadagiti moral a pagalagadan a nailanad iti Sao ti Dios. Agpapaiwanwanda kadagiti prinsipio a kas iti sumaganad:

● “Masapul nga ayatem ti padam a tao a kas iti bagim.”​—Mateo 22:39.

● “Dika mangsaur.”​—Marcos 10:19.

● “Ti agtaktakaw saan koma nga agtakawen, no di ket agtrabaho koma a sipipinget, nga aramidenna babaen kadagiti imana ti aramid a naimbag, tapno adda koma maibunongna iti asinoman nga agkasapulan.”​—Efeso 4:28.

● “Kayatmi ti agbiag a mapagtalkan iti amin a bambanag.”​—Hebreo 13:18.

Nupay saan a natangsit dagiti Saksi wenno dida ibilang ti bagida a nalinteg, patienda a no iyaplikar ti amin a tattao dagitoy a prinsipio, agbalin ti lubong a nasaysayaat nga amang a pagnaedan. Mamatida met iti kari ti Dios nga addanto aldaw a matungpal dayta.​—2 Pedro 3:13.

[Blurb iti panid 11]

No amin a tattao ket agbiag a maitunos kadagiti moral a pagalagadan a nailanad iti Sao ti Dios, agbalin ti lubong a nasaysayaat nga amang a pagnaedan

[Ladawan iti panid 10]

Tungtungpalen dagiti pudno a Kristiano dagiti prinsipio ti Biblia, a kas iti “Masapul nga ayatem ti padam a tao a kas iti bagim”