Panagsaur​—Sangalubongan a Parikut

NI Wayne ti kasla maitutop a lalaki a birbiroken ni Karen nga agbalin nga asawana, ta makaallukoy ken naalumamay nga agsao. “Isut’ maitutop a tipo ti lalaki nga inkarkararagko ken ninamnamak,” kinuna ni Karen. “Impagarup ti tunggal makakita kadakami nga agkabagaykami. Impapatina a patpatgennak.”

Ngem adda problema. Imbaga ni Wayne ken ni Karen nga isu ti maikatlo a tao a mangtartarawidwid iti Secret Intelligence Organization iti Australia. Kayatna ti umikkat, ngem dida palubosan. Adu unay ti ammona. Isut’ papatayenda no umikkat! Isu a nagplanoda nga agkallaysa. Pagtiponenda dagiti sanikuada, panawanda ti Australia, sa agkamangda idiay Canada. Inlako ni Karen ti balayna agraman ti amin a sanikuana ket intalekna ti kuartana ken ni Wayne.

Kas iti naiplano, nagkasarda. Pimmanaw ni Wayne iti pagilian, ngem nabati ni Karen, nabaybay-an, a kurang nga innem a doliar laeng ti kuartana iti banko. Di nagbayag, naammuanen ni Karen a nabiktima iti agkakanat a makaallukoy a kinaulbod a nairanta a mangsaur kenkuana. Kas iti maysa nga artista, nagpammarang laeng ni Wayne​—tapno mangallukoy kenkuana. Parparbo amin ti kinataona, ti paginteresanna, ti personalidadna, ken ti panagayatna kenkuana tapno maalana ti panagtalekna, a dayta ti nakapukawanna iti nasurok a $200,000. Kinuna ti maysa nga opisial a polis: “Nasaktan unay ti riknana. Uray pay no saanmon a panunoten ti kuarta​—nakaro unay ti pannakasairna.”

“Kanayon a mariribukanak,” kinuna ni Karen. “Nagpammarang laeng daydiay a lalaki.”

Ni Karen ket maysa laeng kadagiti nagadu a biktima ti panangsaur iti intero a lubong. Ditay ammo no mano ti gatad a masaur iti dadduma a tao, nupay mapattapatta a ginasut a bilion a doliar ket umad-adu dayta iti kada tawen. Malaksid iti pukaw a kuarta, agsagaba pay dagiti biktima a kas ken Karen iti nakaro a ladingit gapu ta ginundawayan ida daydiay pagtaltalkanda.

 Panangliklik ti Kasayaatan nga Addang

Madepinar ti panagsaur a “maysa a gakat wenno inggagara a panangallilaw tapno makakuarta babaen iti panagpammarang, panangipapati, wenno adu a kari.” Ngem nakalkaldaang ta saan a madusa ti kaaduan a manangsaur. Ngamin, masansan a narigat a paneknekan nga adda napasamak nga inggagara a panangallilaw. Kasta met nga ammo ti adu a managsaur dagiti legal a paglusotanda kadagiti pagannurotan isu a gundawayanda dagitoy. Ammoda ti mangsaur iti pamay-an a narigat wenno imposible a mapatawan iti dusa. Kasta met, adu a tiempo ken kuarta ti kasapulan tapno maidarum ti maysa a managsaur. Gagangay a dagidiay nagtakaw iti minilion a doliar wenno daydiay nakaaramid iti dakes unay ti mapatawan iti dusa ta rumbeng a maammuan ti kaaduan. Uray pay matiliw ken madusa ti managsaur, mabalin a nagastona wenno nailemmengnan ti sinaurna a kuarta. Pagbanaganna, manmano a mabayadan ti napukaw a kuarta dagiti biktima.

No ngarud naallilawka, mabalin nga awanen ti pamuspusam a mangpasubli iti pukawmo. Nasaysayaat nga amang ngarud a liklikam ti agbalin a biktima ngem ti panangpanunot no kasano a mapasubli ti kuartam no nabiktimaka. Nabayagen nga insurat ti masirib a tao: “Nasaldet daydiay nakakita iti didigra ket rugianna ti aglemmeng, ngem daydiay awanan kapadasan limmasat ket masapul a sagabaenna ti pannusa.” (Proverbio 22:3) Ilawlawag ti sumaganad nga artikulo dagiti pamay-an tapno masalaknibam ti bagim iti panagsaur.