Nadisenio nga Agsursuro iti Agnanayon

“Iti kada ulo adda nakaskasdaaw a gubuayan ti saririt, maysa a paset ti bagi a nagsayaat ti andarna a kasla agnanayon a lumawlawa ti kapasidadna no ad-adu ti maammuantayo maipapan iti dayta.”​—TONY BUZAN KEN TERENCE DIXON, MANNURAT MAIPAPAN ITI SIENSIA.

KASANO kaadu ti masursuro ti utek? Dayta a saludsod ti agtultuloy a mamagsiddaaw ken mangriro kadagiti managsukisok. Iti The Brain Book, kastoy ti insurat ni Peter Russell: “No ad-adu ti maammuan maipapan iti utek ti tao, ad-adu dagiti matakuatan a kapasidad ken kabaelanna ngem iti dati a pagaruptayo.”

Kas pagarigan, nagdakkel ti kapasidad ti utek no maipapan iti memoria. Kuna ni Russell: “Ti memoria ket saan a kas iti maysa a pagkargaan nga in-inut a mapno. Mayarig dayta iti maysa a kayo nga agpatubo kadagiti kawit a pakaisab-itan dagiti memoria. Tunggal banag a malagipmo ket sabali a grupo dagiti kawit a pakaisab-itan dagiti baro a memoria. Isu a kanayon a dumakdakkel ti kapasidad ti memoria. No ad-adu ti maammuam, lumalaing ti memoriam.” Daytoy ti mangipalagip kadatayo ti immuna a saludsod nga, Apay nga addaan ti utek ti tao iti kasta a nagdakkel a kapasidad?

 Awan ti maipaay ti teoria ti ebolusion a nainkalintegan a sungbat. Gapu ta ad-adda nga agpannurayda iti kapanunotan a panagbiag dagiti maikari, ti ebolusion riribukenna laeng dagiti nainkalintegan ti panagpampanunotda a tattao no ania ti makagapu iti panangpatanor ti utek iti nagdakkel a kapasidadna. Kas pagarigan, apay a mangaramidka iti nagdakkel a trak no sangapala laeng a darat ti awitemto?

Nupay kasta, ti Biblia ket addaan iti makaawis ngem simple a nainkalintegan a panangilawlawag. Umuna, ibagana kadatayo a dagiti immuna a nagannak kadatayo​—da Adan ken Eva​—naparsuada iti ladawan ti Dios. Kabaelanda nga iparangarang dagiti nakaskasdaaw a kualidad ti Dios. Maikadua, ilawlawagna a naparsuada nga agbiag​—ken makasursuro​—iti agnanayon. (Genesis 1:27; 2:16, 17) Nupay di naan-anay itatta, gapu ta simrek ti basol iti natauan a pamilia, ti utek ti tao iyanninawna dayta a nadiosan a panggep.​—Roma 5:12.

Ngem matungpalto ti orihinal a panggep ti Dios a ti daga ket mapno kadagiti perpekto ken managbuteng-Dios a tattao nga agbiag iti Paraiso. Kinapudnona, inted ni Jehova kadatayo ti bugbugtong nga Anakna a ni Jesu-Kristo, kas pangsubbot a daton tapno magun-odantayo ti biag nga agnanayon.​—Mateo 20:28; Juan 3:16.

Ti Kasasayaatan a Taraon ti Isip

Inted met ni Jehova kadatayo ti naipaltiing a Saona, ti Nasantuan a Biblia. (2 Timoteo 3:16; 2 Pedro 1:21) Agsipud ta produkto ti nasantuan nga espiritu daytoy napateg a tomo, saan a panaglablabes ti panangibaga nga aglaon dayta iti kasayaatan a naespirituan a taraon ti isip para iti sangatauan. (Salmo 19:7-10) Kinapudnona, kinuna a mismo ni Jesus: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.”​—Mateo 4:4.

Isu nga agtutuboka man wenno nataengan, apay a dika mangyeskediul iti bassit a tiempo iti kada aldaw nga agbasa kadagiti napateg a ‘sasao’ ti Dios? Dagidiay mangaramid iti dayta ken mangyaplikar iti naadalda ket mabenepisiaran ita ken iti masanguanan. Wen, masagrapda ti namnama nga agbiag ken agsursuro iti agnanayon a kas iti immuna a panggep ti Dios. Anian a nagsayaat a namnama dayta!​—Eclesiastes 3:11; Juan 17:3.

[Ladawan iti panid 11]

Gapu ta iparangarangna ti panggep ti Dios, nadisenio ti utek ti tao nga agsursuro nga agnanayon

[Dagiti Ladawan iti panid 12]

Aglaon ti Biblia iti kasayaatan a taraon para iti isipmo