Ti Panangmatmat ti Biblia

Pudno Aya a Maseknan ti Dios Kadagiti Ubbing?

GINASUT a milion nga ubbing ti magunggundawayan, mairurrurumen, ken siraranggas a maab-abuso iti kada tawen. Kadagiti napeggad a kasasaad, adu ti agtartrabaho a kas man la tagabo. Dadduma ti nakidnap ken napilit nga agsoldado wenno agbalangkantis. Nadadael payen ti panagtalek ti adu nga ubbing gapu iti insesto ken dadduma pay a nakaam-amak a panangabuso kadakuada.

Nalawag a mariribukan dagiti napasnek ken manangisakit iti kasasaad dagiti ubbing. Nupay admitiren ti dadduma a ti kinaagum ken kinadakes ti tao ti kangrunaan a makagapu iti kasta a panangmaltrato, mabalin a marigatanda pay ketdi a mangakseptar no apay a ti Dios ti ayat ipalpalubosna ti kasta a nakaro a kinaawan hustisia. Mabalin a mariknada a ti Dios binaybay-anna dagitoy nga ubbing ken mabalin a saan a talaga a maseknan. Agpayso aya a kasta? Ti aya nakalkaldaang a pannakagundaway ken masansan a pannakaabuso dagiti ubbing kaipapananna a saan a maseknan ti Dios kadakuada? Ania ti kuna ti Biblia?

Ti Dios Kondenarenna Dagiti Manangabuso

Saan a pulos a pinanggep ni Jehova a Dios a dagiti ubbing ket gundawayan dagiti naulpit a nataengan. Ti panangabuso iti ubbing ket maysa kadagiti nakalkaldaang a bunga ti iyaalsa ti sangatauan  idiay minuyongan ti Eden. Gapu iti panangilaksidda iti kinasoberano ti Dios, nagtungpal dayta iti pananggundaway ti tattao iti padada a tattao.​—Genesis 3:11-13, 16; Eclesiastes 8:9.

Kagura ti Dios dagidiay manggundaway kadagiti nakapuy ken awanan gaway. Adu a nasion idi un-unana a saan nga agserserbi ken ni Jehova ti nangidaton iti annakda, ngem imbaga ni Jehova a daytoy ket maysa a ‘banag a saanna nga imbilin ken saan a timpuar iti pusona.’ (Jeremias 7:31) Kastoy ti impakdaar ti Dios iti ilina idi un-unana: “No parigatem latta [ti ulila nga ubing], ngarud no umkis latta kaniak, di bumurong a denggek ti ikkisna; ket pudno a gumil-ayabto ti ungetko.”​—Exodo 22:22-24.

Ay-ayaten ni Jehova Dagiti Ubbing

Nabatad a maseknan ti Dios kadagiti ubbing gapu kadagiti nainsiriban a bilin nga intedna kadagiti nagannak. Dagiti annak a mapadakkel iti natalged a pagtaengan ket ad-adda nga agbalin a manakem ken mannakibagay a nataengan. Dayta ti gapuna a ti Namarsua kadatayo inyurnosna a manayon ti panagasawa, a sadiay “ti maysa a lalaki panawannanto ti amana ken ti inana ket masapul a makitipon iti asawana ket masapul nga agbalinda a maymaysa a lasag.” (Genesis 2:24) Iti Biblia, ti seksual a relasion ket maipalubos laeng kadagiti agassawa tapno ti aniaman nga agbalin nga annakda ket maaywanan iti natalged a kasasaad.​—Hebreo 13:4.

Ipaganetget met dagiti Kasuratan ti kinapateg ti panangsanay dagiti nagannak. Kuna ti Biblia: “Ti annak ket tawid manipud ken Jehova; ti bunga ti tian ket gunggona. Kas kadagiti pana iti ima ti nabileg a lalaki, kasta ti annak ti kinaagtutubo.” (Salmo 127:3, 4) Dagiti annak ket napateg a sagut manipud iti Dios, ken kayatna a dumakkelda a naimbag. Idagadag ti Dios kadagiti nagannak nga isuroda dagiti annakda iti nasayaat a wagas ti panagbiag, no kasano a ti pumapana ket siaannad a mangpuntiria sakbay nga ibiatna dagiti panana. Kastoy ti bilin ti Sao ti Dios: “Dakayo, nga amma, dikay ruroden ti annakyo, no di ket itultuloyyo a padakkelen ida iti disiplina ken panangiturong-panunot ni Jehova.”​—Efeso 6:4.

Maysa pay a pamay-an ti panangipakita ni Jehova iti ayatna kadagiti ubbing ket babaen iti panangisurona kadagiti nagannak a salaknibanda ti annakda kadagiti dakes a tattao. Iti kadaanan nga Israel, uray dagiti “ubbing” ket nabilin a dumngeg iti Linteg, a pakairamanan ti umiso ken di umiso a seksual a kondukta. (Deuteronomio 31:12; Levitico 18:6-24) Kayat ti Dios nga ikagumaan dagiti nagannak a salakniban ti annakda manipud iti asinoman a mabalin a manggundaway wenno mangabuso kadakuada.

Namnama Dagiti Ubbing

Ni Jesu-Kristo, daydiay naan-anay a mangtultulad iti personalidad ni Amana, naisangsangayan nga impakitana ti manayon a panagayat ni Jehova kadagiti ubbing. (Juan 5:19) Idi nagkamali dagiti apostolna iti panggepda a tumulong ken Jesus, sada pinaritan dagiti nagannak a mangipan kadagiti babassit nga annakda kenkuana, nakapungtot a kinorehir ida ni Jesus. Kinunana: “Bay-anyo dagiti ubbing nga umay kaniak.” Kalpasanna, “innalana dagiti ubbing kadagiti takiagna ket rinugianna a binendisionan ida.” (Marcos 10:13-16) Napateg dagiti ubbing iti imatang ni Jehova a Dios ken ti Anakna.

Kinapudnona, babaen iti dinutokanna nga Ari a ni Jesu-Kristo, asidegen nga agtignay ti Dios tapno mabang-aran dagiti ubbing a mamalmaltrato. Dagiti naagum a mananggundaway ken nakaro a manangabuso iti daytoy a lubong ket mapukawton ditoy daga iti agnanayon. (Salmo 37:10, 11) No maipapan kadagiti naemma nga agbirbirok ken Jehova, kuna ti Biblia: “Punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”​—Apocalipsis 21:3, 4.

Kabayatanna, ipakpakita ti Dios ti panagayatna ita babaen ti panangitukonna iti naespirituan ken emosional a tulong kadagiti amin a nagundawayan ken biktima ti panangabuso. Inkarina: “Daydiay napukaw birokekto, ket daydiay naiwara isublikto, ket daydiay nadunor patapatakto ket daydiay masaksakit papigsaekto.” (Ezequiel 34:16) Babaen ti Saona, ti nasantuan nga espirituna, ken ti kongregasion Kristiano, liwliwaen ni Jehova dagiti annak a malmalday ken agrigrigat. Anian a rag-o a maammuan nga ita, ken iti masanguanan, ‘ti Ama dagiti nadungngo nga asi ken ti Dios ti amin a liwliwa, . . . ti mangliwliwa kadatayo iti amin a rigat.’​—2 Corinto 1:3, 4.

[Picture Credit Line iti panid 18]

© Mikkel Ostergaard/Panos Pictures