“Kaanom a Basaen Amin Dagitoy?”

Idi Hulio 2001, adda lalaki idiay Khabarovsk iti Makindaya a Russia a nakasarak iti 34 a ruar ti Agriingkayo! a nabunton iti libraria ti siudad. Binulodna dagitoy, ngem idi dimtengen ti aldaw ti Agosto tapno isublina dagitoy, dina kayat nga isubli. Isu a pinaundayna ti panangbulodna kadagitoy agingga iti Setiembre. Nagustuanna unay dagiti magasin ta idi Nobiembre, binulodna manen dagitoy agraman ti innem a kabbaro a ruar.

Sakbay daytoy, saan a pulos a kayat daytoy a lalaki ti agbasa kadagiti narelihiosuan a publikasion. Apay a rinugiannan ti agbasa iti Agriingkayo!? “Ngamin, kaaduan nga artikulo iti daytoy a magasin ti mangilawlawag kadagiti isyu iti kagimongan a makapainteres ken makapikapik iti amin,” insuratna.

“Masansan nga adda dagiti makapainteres ti pannakaisuratda a ‘panagpasiar’ kadagiti moderno a siudad ken pagilian, agraman dagiti impormasion maipapan iti tradision ti tattao,” intuloy a kinuna ti lalaki. Nagustuanna met dagiti artikulo maipapan kadagiti tattao a nagballigi iti biag, nangsalimetmet kadagiti naespirituan a prinsipioda ken nakatulong iti sabsabali a mangandur kadagiti parikut ken didigra. Ania ti makunana iti Agriingkayo!? “Sigurado nga awan ti magasin maipapan kadagiti agdama a pasamak, siensia, geograpia, ken kultura ti tattao iti intero a lubong a makaartap iti Agriingkayo!”

Nagkiddaw daytoy a lalaki kadagiti daan a ruar ti Agriingkayo! manipud 1995 iti lenguahe a Ruso. Malaksid iti Agriingkayo!, nagkiddaw met iti nadumaduma a libro ken broshur nga impablaak dagiti Saksi ni Jehova. Kastoy ti insuratna: “Mabalin a mayimtuodyo, ‘Kaanom a basaen amin dagitoy?’” Sinungbatanna ti mismo a saludsodna babaen ti panagkunana nga adda orasna nga agbasa kadagiti makagunggona a pagiwarnak, agsipud ta saan unay nga agbuybuya iti telebision ken saan nga agsuksukisok iti Internet.

Mangipapaay ti Agriingkayo! iti nagadu nga impormasion maipapan kadagiti agdama a pasamak ken pannakaawat iti solusion dagiti agdama a parikut. Apay a saanmo a kiddawen kadagiti Saksi ni Jehova nga itulodandaka kadagiti kabaruan a ruar ti Agriingkayo! iti kada bulan?

[Ladawan iti panid 31]

Dagiti Annak​—Ti Kasapulanda Kadagiti Nagannak

[Ladawan iti panid 31]

Panangtarus iti Mood Disorder

[Ladawan iti panid 31]

Ammom Kadi ti Nagan ti Dios?

[Ladawan iti panid 31]

Nuklear a Pangta​—Agpaypayso Aya?

[Ladawan iti panid 31]

Namnama​—Pakasarakam iti Dayta?

[Picture Credit Line iti panid 31]

Nuklear a panagbettak: Rinetrato ti U.S. Department of Energy