No Kasano ti Agbalin a Naimbag nga Ama
No Kasano ti Agbalin a Naimbag nga Ama
MAYSA nga artikulo iti magasin nga Economist maipapan iti pannakadadael ti biag ti pamilia ti nairugi babaen kadagiti makaallukoy a sasao: “Nalaka ti maaddaan iti annak, narigat ti agbalin a naimbag nga ama.”
Nupay adu a banag iti biag ti narigat nga aramiden, maysa kadagiti karirigatan—ken kasta met ti kapatgan—isu ti panagbalin a naimbag nga ama. Tunggal ama kayatna koma ti agbalin a naimbag nga ama, agsipud ta nakapusta ti pagimbagan ken pagragsakan ti pamiliana.
No Apay a Narigat
Iti simple a pannao, ti kinaimperpekto dagiti nagannak ken dagiti annakda ti maysa a kangrunaan a rason a narigat ti agbalin a naimbag nga ama. “Ti pagannayasan ti puso ti tao dakes manipud pay kinaagtutubona,” kuna ti Biblia. (Genesis 8:21) Isu a binigbig ti maysa a mannurat ti Biblia: “Iti basol inyinawnak ni inak.” (Salmo 51:5; Roma 5:12) Ti pagannayasan nga agaramid iti dakes gapu iti natawid a kinaimperpekto ket maysa laeng a tubeng iti panagbalin a naimbag nga ama.
Daytoy a lubong, wenno sistema ti bambanag, ti maysa pay a dakkel a tubeng. Apay a kasta? Ngamin, kas ilawlawag ti Biblia, “ti intero a lubong adda iti pannakabalin daydiay nadangkes,” a nayam-ammo kas “daydiay naawagan iti Diablo ken Satanas.” Ti Biblia awaganna met ni Satanas a “dios daytoy a sistema ti bambanag.” Di pakasdaawan a kinuna ni Jesus a dagiti pasurotna, kas kenkuana, rumbeng a “saanda a paset ti lubong”!—1 Juan 5:19; Apocalipsis 12:9; 2 Corinto 4:4; Juan 17:16.
Tapno agbalin a naimbag nga ama, nasken a sipapanunottayo iti natawidtayo a kinaimperpekto, iti kaadda ni Satanas a Diablo, ken daytoy a lubong nga adda iti sidong ti panangkontrolna. Saan a mapampanunot laeng dagitoy a tubeng. Agpayso dagitoy! Ngem pakasarakan ngay ti tao iti impormasion no kasano a maparmekna dagitoy ken no kasano nga agbalin a naimbag nga ama?
Dagiti Nadibinuan nga Ulidan
Tapno matulongan ti maysa nga ama a mangparmek kadagiti tubeng a nadakamat, isu ket mabalin nga agadal iti Biblia. Adda dagiti nagsayaat nga ulidan a nadakamat sadiay. Inyam-ammo ni Jesus ti kasayaatan idi insurona dagiti pasurotna nga agkararag iti: “Amami nga adda iti langlangit.” Iti panangdeskribirna iti nailangitan nga Amatayo, silalawag a kuna ti Biblia: “Ti Dios ket ayat.” Ania koma ti aramiden ti natauan nga ama iti kastoy a naayat nga ulidan? “Agbalinkayo a tumutulad iti Dios,” indagadag ni apostol Pablo, “ket itultuloyyo Mateo 6:9, 10; 1 Juan 4:8; Efeso 5:1, 2.
ti magna iti ayat.”—No maysaka nga ama, usigem no ania ti masursurom iti uray maysa laeng a pasamak iti pannakilangen ti Dios iti Anakna a ni Jesus. Ibaga kadatayo ti Mateo 3:17 nga idi nabautisaran ni Jesus, nangngeg ti timek ti Dios manipud langit, a kunkunana: “Daytoy ti Anakko, ti dungdungnguen, nga inanamongak.” Ania ti masursurotayo iti daytoy?
Umuna, panunotem ti epekto dayta iti maysa nga ubing no sipapannakkel a kunaen ti maysa nga ama, ‘Daytoy ti anakko.’ Maragsakan dagiti annak no asikasuen ida dagiti nagannak, nangruna no bigbigenda ti nasayaat a nagapuanan dagitoy. Matignay ti anak nga ad-adda a mangikagumaan a mangipakita a maikari iti kasta a pammadayaw.
Maikadua, inyebkas ti Dios ti riknana maipapan ken Jesus, nga isut’ tinukoyna a kas ‘dungdungnguenna.’ Sigurado a naragsakan unay ni Jesus iti dayta nga ebkas ti panangipateg ni Amana. Maparegta met dagiti annakmo no ipakitam babaen iti sasaom—agraman ti panangipaaymo iti panawen, atension, ken pannakaseknan—a dungdungnguem unay ida.
Maikatlo, imbaga ti Dios iti Anakna: “Inanamonganka.” (Marcos 1:11) Nasken met nga ibaga ti maysa nga ama kadagiti annakna a maay-ayo kadakuada. Pudno a masansan nga agbiddut ti maysa nga anak. Agbidduttayo amin. Ngem kas maysa nga ama, mangbirbirokka aya kadagiti gundaway a mangyebkas iti pananganamong kadagiti naimbag nga ar-aramiden wenno ibagbaga dagiti annakmo?
Ni Jesus nakasursuro a naimbag iti nailangitan nga Amana. Idi adda ditoy daga, impakitana babaen iti sao ken inyulidanna no kasano ti panagrikna ti Amana kadagiti annak ti Dios ditoy daga. (Juan 14:9) Uray no makumikom idi ni Jesus ken nagadu ti asikasuenna, nangipaay iti panawen a makikatugaw ken makisarita kadagiti ubbing. “Bay-anyo dagiti ubbing nga umay kaniak,” kinunana kadagiti adalanna, “dikay padasen a pawilan ida.” (Marcos 10:14) Dakayo nga amma, mabalin kadi nga ad-adda pay a tuladenyo a naan-anay ti ulidan ni Jehova a Dios ken ti Anakna?
Nasken ti Naimbag nga Ulidan
Nakapatpateg ti panangipaay iti naimbag nga ulidan kadagiti annakmo. Mabalin a saan unay nga epektibo ti ‘panangitultuloymo a mangpadakkel kadakuada iti disiplina ken panangiturong-panunot ni Jehova’ no sika a mismo ket sumuksukir iti disiplina ti Dios ken saanka nga agpapaiwanwan iti dayta. (Efeso 6:4) Ngem babaen iti tulong ti Dios, mabalinmo a parmeken ti aniaman a tubeng tapno matungpal ti bilinna nga aywanam dagiti annakmo.
Usigem ti ulidan ni Viktor Gutschmidt, a maysa a Saksi ni Jehova iti dati nga Union Soviet. Idi Oktubre 1957, isut’ nasentensiaan a maibalud iti sangapulo a tawen gapu iti panangiranudna iti pammatina iti sabsabali. Napanawanna ti dua nga ubbing pay nga annakna a babbai ken ti asawana a ni Polina. Bayat a naibalud, napalubosan a suratanna ti pamiliana ngem naparitan a mangibaga iti aniaman maipapan iti Dios wenno iti aniaman a narelihiosuan a topiko. Agpapan pay iti daytoy a
rigat, determinado ni Viktor nga agbalin a naimbag nga ama, ket ammona a nagpateg ti panangisurona kadagiti annakna maipapan iti Dios. Isu nga ania ti inaramidna?“Nakasarakak iti material kadagiti magasin dagiti Soviet a Young Naturalist ken Nature,” insalaysay ni Viktor. “Kadagiti postcard, nagdrowingak iti ladawan dagiti animal ken tattao ket inramanko ti estoria wenno kapadasan maipapan iti nakaparsuaan.”
“Apaman a maawatmi dagitoy a postcard,” kuna ni Polina, “dagus nga innaigmi dagitoy kadagiti suheto ti Biblia. Kas pagarigan, no nairaman kadagitoy ti kinapintas ti nakaparsuaan, kabakiran, wenno karayan, basaek ti Isaias kapitulo 65,” a mangisalsalaysay kadagiti kari ti Dios a pagbalinennanto ti daga a paraiso.
Kinuna ti balasang ni Viktor a ni Yulia: “Makipagkararag ni Nanang kadakami, ket makasangitkami. Dakkel ti naitulong dagitoy a kard iti pannakapadakkelmi.” Imbaga ni Polina a kas nagbanaganna, “ti Dios ket ay-ayaten unay dagiti annakko sipud pay kinaubingda.” Ania ti kasasaad ti pamilia itan?
Inlawlawag ni Viktor, “Ita, kasadon dagiti annakko kadagiti Kristiano a panglakayen, ket agpadada nga addaan iti pamilia a nabileg iti naespirituan ken annak a simamatalek nga agserserbi ken Jehova.”
Masansan a saan laeng a kinasaririt ti kasapulan iti panangipaay iti naimbag nga ulidan no di ket ti dakkel pay a panangikagumaan. Talaga a matignay ti puso dagiti annak no makitada nga ikagkagumaan ti ama ti mangipakita iti naimbag nga ulidan. Maysa a baro a nagserbin iti adu a tawen iti amin a tiempo ti nagkuna buyogen iti panangapresiar ken amana, “No dadduma nabannog unay ni Tatang nga aggapu iti trabaho ta uray la a makatugtuglep, ngem kasanoman ti bannogna, adda latta panagadalmi iti Biblia a sangapamiliaan, ket daytoy ti nakatulong kadakami a mangapresiar iti kinapateg dayta.”
Nabatad a nasken ti panangipaay iti nasayaat nga ulidan—iti sao man ken aramid—iti panagbalin a naimbag nga ama. Masapul nga aramidem dayta no kayatmo a pumayso ti kuna ti proverbio iti Biblia: “Sanayem ti ubing sigun iti dalan nga agpaay kenkuana; uray no lumakay saanto a sumiasi iti dayta.”—Proverbio 22:6.
Isu a laglagipem a saan laeng a ti ibagbagam ti napateg; nangnangruna ti ar-aramidem—ti ipakpakitam nga ulidan. Kastoy ti insurat ti maysa a taga Canada nga eksperto iti panangisuro kadagiti ubbing: “Ti kasayaatan a pamay-an tapno agtignay ti ubing [sigun iti kayattayo] ket ipakitatayo kadakuada ti kayattayo a kababalin.” Kinapudnona, nasken nga ipategmo dagiti naespirituan a banag no kayatmo nga ipateg met dagiti annakmo dagita.
Mangipaayka iti Panawen Kadakuada!
Masapul a makita dagiti annakmo ti nasayaat nga ulidanmo. Kaipapanan dayta a mangipaayka iti panawen a kaduada—saan laeng a saggabassit no di ket adu a panawen. Nainsiriban nga ipangagmo ti balakad ti Biblia a ‘gatangem ti tiempo,’ kayatna a sawen, bay-am dagiti saan unay a napateg a banag tapno makaduam dagiti annakmo. (Efeso 5:15, 16) Kinapudnona, ania pay aya ti napatpateg ngem kadagiti annakmo? Ti aya dakkel ti iskrinna a telebision, maysa a propesional nga alikamen a pagay-ayam iti golf, napintas a balay, ti panggedam?
No awan ti panawen dagiti amma a mangasikaso kadagiti annakda bayat nga ubbing pay dagitoy, sagabaendanto dagiti epektona. Dagiti amma a nagbalin dagiti annakda nga imoral wenno saan a naespirituan ti panagbiagda masansan a nakaro ti babawida. Maldaangda ta awanda a kadua dagiti annakda idi kasapulan unay dagiti annakda ti ama a mangaywan kadakuada.
Laglagipem a no ubbing pay dagiti annakmo, dayta ti tiempo a panunotem dagiti pagbanagan dagiti desisionmo. Awagan ti Biblia dagiti annakmo a “tawid manipud ken Jehova,” maysa a banag nga intalek ti Dios kenka. (Salmo 127:3) Isu a laglagipem a manungsungbatka iti Dios gapu kadakuada!
Adda Magun-odam a Tulong
Magagaran ti naimbag nga ama a manggun-od iti tulong agpaay iti pagimbagan dagiti annakna. Kalpasan nga imbaga ti maysa nga anghel iti baket ni Manoa nga aganakto, nagkararag ni Manoa iti Dios: “Bay-am, pangngaasim, nga umay manen kadakami ket isuronakami no ania ti rebbeng nga aramidenmi iti ubing a mayanakto.” (Uk-ukom 13:8, 9) Kas kadagiti nagannak itatta, ania a tulong ti kasapulan idi ni Manoa? Kitaentayo.
Kastoy ti kinuna ni Brent Burgoyne, maysa a maestro idiay University of Cape Town, South Africa: “Maysa kadagiti kasayaatan a sagut a maitedmo iti ubing isu ti panangisurom kenkuana kadagiti prinsipio ken pagalagadan.” Iti report a naipablaak iti Daily Yomiuri iti Japan, naipakita a masapul a maisuro kadagiti ubbing dagiti prinsipio ken pagalagadan. Kunana: “[Maysa] a surbey ti mangipakita a 71 a porsiento kadagiti Hapones nga ubbing ti di pulos insuro dagiti ammada a saanda nga agulbod.” Saan kadi a nakalkaldaang dayta a kasasaad?
Siasino ti makaipaay iti mapagtalkan a prinsipio ken pagalagadan? Daydiay met la nangiwanwan ken Manoa—ti Dios a mismo! Tapno matulongannatayo ti Dios, imbaonna ti Anakna a ni Jesus, kas Mannursuro—ti kadawyan a pangawagtayo kenkuana. Ti libro nga Agsursuroka iti Naindaklan a Mannursuro, a nangadaw kadagiti leksion manipud kadagiti pannursuro ni Jesus, ket magun-odan itan iti adu a lenguahe tapno usarenyo a mangisuro kadagiti ubbing.
Saan laeng nga ilawlawag ti Agsursuroka iti Naindaklan a Mannursuro dagiti prinsipio ken pagalagadan a naibasar iti Sao ti Dios no di ket iladawanna met ti naisurat a sasao babaen iti nasurok a 160 a ladawan a mainaig iti punto nga itampok dagiti saludsod. Kas pagarigan, naipakita iti panid 32 daytoy a magasin ti ladawan a makita iti kapitulo 22, a napauluan iti “No Apay a Saantayo Koma nga Agulbod.” Kastoy ti naisurat a sasao iti panid a pakakitaan daytoy a ladawan: “Wenno kunaen ti maysa a barito ken ni tatangna: ‘Saanko a kinugtaran ti bola ditoy balay.’ Ngem ania ngay no talaga a kinugtaranna? Dakes kadi nga ibagana a dina kinugtaran?”
Maisuro met dagiti makaparegta a leksion kadagiti kapitulo a napauluan iti “Ti Panagtulnog Salaknibannaka,” “Nasken a Labanantayo Dagiti Sulisog,” “Leksion iti Panagbalin a Naasi,” “Pulos a Dika Koma Agbalin a Mannanakaw!,” “Anamongan Kadi ti Dios Amin a Padaya?,” “No Kasano a Maparagsak ti Dios,” ken “No Apay a Nasken nga Agtrabahotayo,” no dakamaten ti sumagmamano laeng kadagiti 48 a kapitulo iti libro.
Kastoy ti pangserra a sasao ti introduksion ti libro: “Nangnangruna a kasapulan a maiturong dagiti ubbing iti Gubuayan ti amin a sirib, ti nailangitan nga Amatayo a ni Jehova a Dios. Kasta ti kanayon nga inaramid ni Jesus, ti Naindaklan a Mannursuro. Manginanamakami unay a daytoy a libro tulongannakayo ken ti pamiliayo a mangmolde iti biagyo tapno maparagsakyo ni Jehova ken mabendisionankayo iti agnanayon.” *
Nabatad a ti panagbalin a naimbag nga ama ramanenna ti panangipakita iti naimbag nga ulidan kadagiti annakmo, panangipaay iti adu a panawen a kaduada, ken panangtulong kadakuada nga agbiag sigun kadagiti pagalagadan ti Dios nga impalgakna iti Biblia.
[Footnote]
^ par. 35 Dagiti libro a Ti Librok Dagiti Estoria ti Biblia, Dagiti Saludsod nga Iyimtuod ti Agtutubo—Dagiti Sungbat nga Epektibo, ken Ti Sekreto ti Kinaragsak iti Pamilia ti dadduma pay a libro dagiti Saksi ni Jehova a makatulong kadagiti pamilia.
[Ladawan iti panid 8]
Nupay naibalud, nabaelan ni Viktor Gutschmidt ti agbalin a naimbag nga ama
[Dagiti Ladawan iti panid 8, 9]
Bayat ti pannakaibaludna gapu iti pammatina, drinowingna dagitoy a ladawan tapno maisurona dagiti annakna
[Ladawan iti panid 9]
Dagiti annak ni Viktor idi 1965
[Ladawan iti panid 10]
Kanayon koma a makiraman dagiti amma iti panangisuro kadagiti annakda