Panangidanon iti Kinapudno ti Biblia Kadagiti Pygmy

BABAEN ITI MANNURAT TI AGRIINGKAYO! IDIAY CAMEROON

Iti nasurok a 230 a pagilian iti intero a lubong, ikagkagumaan dagiti Saksi ni Jehova nga idanon ti mensahe ti Pagarian ti Dios iti “amin a kita ti tattao.” (1 Timoteo 2:4; Mateo 24:14) Nairaman kadagitoy dagiti African Pygmy, babassit a tattao nga uppat agingga iti uppat ket kagudua a pie ti promedio a katayagda. Kaaduan kadakuada ti agnanaed iti nasulinek a kabakiran ti Central African Republic, iti rehion ti Congo, ken iti abagatan a daya ti Cameroon.

Napasamak ti kaunaan a nairekord a pannakaam-ammo dagiti Pygmy kadagiti sangaili idi nangibaon ti Faraon a ni Neferirkare iti Egipto iti ekspedision nga agbirok iti ubbog ti Karayan Nilo. Kadagiti kabakiran ti nasulinek nga Africa, naipadamag a nakasabat dagiti kameng ti ekspedision kadagiti pandek a tattao. Ti Griego a mannurat a ni Homer ken ti pilosopo a ni Aristotle agpadpada a dinakamatda dagiti Pygmy. Naam-ammo dagiti taga Europa dagitoy a tattao idi maika-16 ken maika-17 a siglo.

Kadagiti moderno a tiempo, mangaskasaba dagiti Saksi ni Jehova kadagiti kabakiran ti Africa. Nupay nangipangag dagiti Pygmy iti mensahe ti Pagarian, kaaduanna, natungday dagiti panagregget a mangsarungkar manen kadakuada. Ngamin, agkaraakar dagiti Pygmy iti nadumaduma a lugar iti kada dua a bulan wenno nasursurok pay.

Agdinamag dagiti Pygmy kas natalna ken managbabain nga umili nga addaan iti mapattapatta a populasion iti Africa a 150,000 agingga iti 300,000. Nangaramiden dagiti gobierno, internasional nga organisasion, ken relihion kadagiti eskuelaan a nangnangruna nga usarenda, agraman ti babassit a balbalay a maitutop iti estilo ti panagbiagda. Ngem natungday ti nagadu a panagregget a mangallukoy kadakuada nga agtalinaed iti maymaysa a lugar.

Ti naiduma kadakuada idiay Cameroon ket ni Janvier Mbaki, ti kaunaan a Pygmy a naammuan a nagbalin a Saksi ditoy. Inawatna ti mensahe ti Biblia kalpasan a binasana ti aduan ilustrasion a libro a Mabalinyo ti Agbiag nga Agnanayon iti Paraiso a Daga, agraman ti dadduma pay a publikasion. * Idi tawen 2002, nagbautisar ni Janvier, ket agserserbi itan a payunir, kas pangawag dagiti Saksi ni Jehova kadagiti managebanghelio iti amin-tiempo. Isut’ maysa met a ministerial nga adipen iti kongregasion Kristiano ken kameng ti kongregasion ti Mbang, maysa a bassit nga ili iti makin-abagatan a daya a paset ti pagilian. Maammuantayto no ad-adunto pay a Pygmy iti Cameroon ti mangikeddeng nga agdayaw ken Jehova, ti kakaisuna a pudno a Dios, a managayat iti “amin a kita ti tattao.”

[Footnote]

[Ladawan iti panid 24]

Madama a mangaskasaba ni Janvier Mbaki​—ti kaunaan a Pygmy idiay Cameroon a naammuan a nagbalin a Saksi