Ti Kita ti Ama a Kasapulan Dagiti Annak

KASAPULAN dagiti annak ti maysa nga ama a mangay-ayat ken mangandingay kadakuada, a mangaramid iti aniaman a kabaelanna a tumulong kadakuada a dumakkel kas manakem ken mapagtalkan a nataengan. Saan a mabigbig dagiti amma a daytoy a kita ti ama ti kasapulan dagiti annak.

Agpayso a dagiti inna ti mangipasngay kadagiti annak ditoy lubong, ket pudno a nakapatpateg nga annongen ti panagbalin a naimbag nga ina. Ngem iti panangdakamatna a napateg met ti annongen ti ama, kinuna ti The Wilson Quarterly: “Ti pannakadadael ti kinaama ti maysa a kangrunaan a makagapu iti adu kadagiti makapadanag unay a parikut ti kagimongan dagiti Americano”​—ken mabalin met nga iramantayo ti dadduma a paset ti lubong.

Maysa a panagadal ti impadamag ti periodiko iti Brazil a Jornal da Tarde nga adu a parikut maipapan iti kababalin dagiti agtutubo​—kas iti kinaagresibo, kinasukir, kinakapuy iti klase, ken di panangikankano​—ti masansan a “resulta ti di pannakaseknan ti ama.” Ken ipaganetget ti Italiano a libro a Gli imperfetti genitori (Dagiti Imperpekto a Nagannak), nga insurat ni Marcello Bernardi a tapno naballigi ti panagdakkelda, kadawyan a kasapulan dagiti annak ti dua a nagannak.

Mabalin a Mapasayaat ti Biag ti Pamilia

Nupay ti nangbaybay-a nga ama ket adda pasetna iti itataud dagiti parikut iti pamilia wenno isu ti kangrunaan a makagapu iti kaaduan kadagitoy, dina kayat a sawen a saanen a maatur ken mapasayaat ti biag ti pamilia. Apay? Ania ti nasken nga aramiden ti ama?

Nabatad a kasapulan dagiti annak ti urnos ti pamilia, ti pannakarikna nga adda mangidadaulo a maseknan iti pagimbaganda. No saan a maipaay dayta, kas iti masansan a mapaspasamak ita, dakes ti pagtungpalan dagiti annak. Ngem adda pamuspusan, adda man ti ama wenno awan. Kuna ti Biblia iti Salmo 68:5, a ‘ti ama dagiti awan ammada nga ubbing isu ti Dios iti nasantuan a pagnaedanna.’ *

No Kasano a Magun-odan ti Tulong

Tapno agballigi, nasken ti tulong ti Dios ken mabalin a magun-odan ti balligi kas makita iti kasasaad a dineskribir ni Lidia, ti balasang a taga Poland a nadakamat iti napalabas nga artikulo. Ania ti kasasaad ti pamilia iti pagtaenganna? Kasano a nagun-odan ti pamilia ti tulong ti Dios?

Inamin ni Franciszek, nga ama ni Lidia, nga idi ubbing pay dagiti annakna, binaybay-anna ti pamiliana, kas iti imbaga ti balasangna. Kunana: “Awan bibiangko no ania idi ti ar-aramiden dagiti annakmi. Diak impakita ti kinadungngok kadakuada, isu a saanda a nasinged kaniak.” Dina  ngarud ammo nga idi agtawen iti 14 ni Lidia, isu ken dagiti addina dumardar-aydan kadagiti nalaaw a padaya, agsigsigarilio, umin-inum, ken makiap-apada.

Kamaudiananna, naamiris ni Franciszek ti pakaisagsagmakan ti annakna, isu a nariribukan ken nagtignay. “Nagkararagak iti Dios tapno agpatulong,” kunana. Nakaskasdaaw ta di nagbayag kalpasanna, simmarungkar dagiti Saksi ni Jehova iti pagtaenganna, ket nakipagadalda nga agassawa iti Biblia. Idi agangay, iyap-aplikardan dagiti pannursuro ti Biblia iti biagda. Ania ti epekto dayta kadagiti annakda?

Inlawlawag ni Franciszek: “Nadlawdan nga insardengkon ti aginum ket nagbalinakon a nasaysayaat nga ama. Kayatda metten a maam-ammo a naimbag dagiti Saksi ni Jehova. Nakipagadalda metten iti Biblia ken insardengdan ti dakes a pannakitimpuyogda.” Kuna ni Rafał maipapan ken tatangna: “Nasursurok nga ayaten kas maysa a gayyem.” Kunana pay: “Pagammuan ta saanen a napateg kaniak dagiti barkadak. Okupadokami kadagiti naespirituan nga aramid.”

Ni Franciszek ket maysa itan a Kristiano a panglakayen iti kongregasion dagiti Saksi ni Jehova, ket as-asikasuenna pay latta ti pamiliana ken ti naespirituan nga irarang-ay ti tunggal maysa. Agpada a payunir, amin-tiempo nga ebanghelisador, ni baketna ken ti balasangda a ni Lidia. Ni Rafał ken ti adienna a babai a ni Sylwia ket makiramraman met iti naimpusuan a panagadal ti Biblia, panagkomento kadagiti Nakristianuan a gimong, ken iti panangiranud ti pammatida iti sabsabali.

Inaramidna ti Insurona

Usigem met ti napasamak ken ni Luis, ti ama ni Macarena. Lagipem nga isu daydiay taga Espania a balasang nga agtawen iti 21, a nadakamat iti napalabas nga artikulo. Tinulad ni Luis ti panagbiag ti mangnginum nga amana. Kas imbaga ni Macarena, isut’ pumanaw iti sumagmamano nga aldaw a kadua dagiti barkadana. Kasta met a kasla tagabo ti panangtratona ken ni baketna imbes nga ipatpateg a kapareha. Dandanida nagsina, isu a madanagan idi ni Macarena ken dagiti addina.

Ngem idi agangay, immanamong ni Luis a makipagadal iti Biblia kadagiti Saksi ni Jehova. Inlawlawagna: “Addan panawenko a makikadua kadagiti agiinak. Agsasaritakami, aggigiddankami a mangan, ken sangsangkamaysakami nga agadal iti Biblia. Agtitinnulongkami met kadagiti trabaho iti balay ken agkakaduakami nga aglinglingay.” Kuna ni Macarena: “Nangrugin a mariknak nga adda naasi nga amami a pudno a maseknan iti pamiliana.”

Nakapatpateg ta saan laeng a pinaregta ni Luis ti pamiliana nga agserbi iti Dios no di ket inaramidna ti insurona. Insardengna ti “narang-ay a negosio,” inlawlawag ni Macarena, “agsipud ta daytat’ mangibus iti adu unay a tiempo ket kayatna nga ipaayan iti ad-adu a tiempo ti pamiliana.” Nakaskasdaaw ti epekto dayta. “Ti pagwadanna ti nangisuro kaniak iti simple a panagbiag ken panangyun-una kadagiti naespirituan a bambanag,” kinuna ni Macarena. Ita, agserserbin a payunir ni Macarena, ket ni nanangna ken dagiti addina ti nareregta itan a miembro ti kongregasion Kristiano.

Ti Desision ti Ehekutibo iti Tren

Nabatad a ti kita ti ama a kasapulan dagiti annak isu daydiay ama a mangaramid kadagiti desision nga ikabilanganna ti pagimbagan dagiti annakna. Di nasayaat ti nakibarkadaan idi ti barito ni Takeshi Tamura, ti Hapones nga ehekutibo a nadakamat iti napalabas nga artikulo, ket dumakdakes ti pagtungpalanna. Tawen 1986 idi, ti tawen nga inkeddeng ni Takeshi nga umikkat iti responsable a saadna iti Japanese National Railways. Ania ti rikna ni Takeshi ita maipapan iti desisionna, nasurok a 18 a tawen kalpasanna?

“Nalabit dayta ti kasayaatan a desision nga inaramidko,” kinunana iti di pay nabayag. “Adda nagsayaat nga epekto ti panangipaayko iti ad-adu a tiempo iti barok ken ti panagkaduami nga agaramid kadagiti bambanag, agraman ti panangyadalko iti Biblia kenkuana. Nagbalinkami nga aggayyem, ket binaybay-annan dagiti dakes a pannakitimpuyog ken dakes a kababalinna.”

Immuna iti sumagmamano a tawen a nagbalin a maysa kadagiti Saksi ni Jehova ti asawa ni Takeshi, ket ti mapagulidanan a kababalin ni baketna ti nangtignay kenkuana a mangsukimat iti Biblia ken ad-adda a mangidaulo iti pamiliana. Idi agangay,  aminda a sangapamiliaan ket nagbalinda a Saksi. Agserserbi itan ni Takeshi ken ti barona kas panglakayen kadagiti kongregasion a nakaitimpuyoganda, ket payunir ni baketna ken ti balasangda.

Kasapulan Dagiti Amma ti Tulong

Adu nga amma, nupay mabigbigda a mabaybay-anda dagiti annakda, dida ammo no ania ti aramidenda kadagiti annakda. Adda paulo ti periodiko nga Espaniol a La Vanguardia nga “Aminen ti 42 a Porsiento [nga Espaniol] nga Amma a Dida Ammo ti Mangpadakkel Kadagiti Tin-edyer nga Annakda.” Ngem kasta met laeng ti maibaga iti amma dagiti ubbing pay nga annak. Maisupadi iti pagarup ti adu, dagitoy nga ubbing masapulda met ti atension ti napasnek nga ama.

Ania pay ti mabalin a masursuro maipapan iti panagbalin a naimbag nga ama? Siasino dagiti kasayaatan a pagwadan nga amma, ket ania ti masursurotayo kadakuada? Ti maudi nga artikulomi usigenna dagitoy a saludsod.

[Footnote]

[Dagiti Ladawan iti panid 7]

Dagiti amma a nangipaay iti kasapulan dagiti annakda

Ni Franciszek ken ti pamiliana

Ni Luis ken ti pamiliana

Ni Takeshi ken ti pamiliana