Dagiti Agtutubo a Nangikalintegan iti Pammatida

ADU nga agtutubo ti naitimpuyog kadagiti Saksi ni Jehova. Ay-ayatenda ti Dios ken ikagkagumaanda ti agbiag a maitunos kadagiti pagalagadanna a nailanad iti Biblia. Pagpannakkel dagitoy nga agtutubo ti pammatida, ket situtured nga ipakaammoda dayta iti sabsabali idiay eskuelaan. Usigem ti sumagmamano a pagarigan.

▪ Idi adda iti maikanem a grado, natudingan ni Holly ken dagiti kaklasena a mangisurat iti salaysay maipapan iti saludsod a “Kasano a risutem ti parikut a terorismo a dika agusar iti kinaranggas?” Inaprobetsar ni Holly daytoy tapno agsurat maipapan iti naibasar iti Biblia a namnamana maipapan iti masanguanan. Inlawlawagna a sipud pay idi un-unana, “ti tao dinominaranna ti tao iti pakadangrananna.” (Eclesiastes 8:9) Kalpasanna, impatuldona ti kakaisuna a pudno a namnama ti sangatauan​—ti Pagarian ti Dios. “Tangay ni Jesus ti natudingan nga Ari dayta a Pagarian,” insuratna, “mapukawton ti amin a parikut, agraman ti terorismo.” Inlawlawag ni Holly no kasano nga aramiden ni Jesus ti saan a maaramid ti asinoman a tao nga agturay. Insuratna: “Idi adda ditoy daga, impakita ni Jesus no ania a kita nga agturay ti pagbalinannanto. Isut’ naayat, ken maseknan kadagiti tattao. Impakitana ti pannakabalinna babaen ti panangagasna kadagiti sakit ken panangpagungarna kadagiti natay. Awan ti gobierno ti tao a makabael a mangpagungar kadagidiay natayen. Ngem kabaelan ti Pagarian ti Dios.” Tinurpos ni Holly ti salaysayna babaen kadagiti sasao a “Ti laeng Dios ti makaipaay iti solusion, saan a ti tattao.”

Iti ngudo ti report, insurat ti maestra: “Ayna! Makakombinsir ti insuratmo Holly. Ken nagsayaat ti pannakaputarna.” Nasdaaw met ti maestra kadagiti Nainkasuratan a pammaneknek ni Holly. Ginundawayan ni Holly nga imbaga iti maestrana ti maipapan iti Teokratiko nga Eskuelaan ti Panagministro, maysa a linawas a programa ti panagbitla ken panangisuro nga ar-aramiden dagiti Saksi ni Jehova. Siraragsak nga inawat ti maestrana ti maysa a kopia ti  libro a maus-usar iti Eskuelaan ti Panagministro.

▪ Nairanud met ni Jessica ti pammatina idi mangputputar kadagiti salaysayna idiay eskuelaan. “Nakapagsuratak iti tallo a salaysay maipapan iti pammatik,” kunana. “Maipapan kadagiti Saksi ni Jehova ken dagiti kalintegan ti relihion ti maysa. Inkabil ti maestra dayta iti libraria tapno basaen dagiti mayat a mangbasa. Iti nabiit pay, nagsuratak iti salaysay maipapan iti panagbautisarko ken no kasano kapateg dayta nga aldaw kaniak. Pinagpipinnasaan dagiti estudiante dagiti kopia ti sinuratda, isu a nabasada met ti sinuratko. Kinuna ti maysa a balasitang: ‘Nagpintas ti insuratmo. Nagsayaat a maammuan dagiti rebbengen ti agbalin a Saksi ni Jehova. Kablaawandaka iti panagbautisarmo!’ Kinuna ti maysa pay a balasitang: ‘Nagsayaat ti estoriam! Maragsakanak ta nakabilbileg ti pammatim!’ Kastoy laeng ti insurat ti maysa a barito: ‘Nainkalinteganka a tao. Pagyamanan.’”

▪ Idi agtawen ni Melissa iti 11, adda naisangsangayan a gundawayna a mangisalaysay iti pammatina. “Ti nars iti eskuelaanmi immay iti klasek iti siensia tapno salaysayenna ti maipapan iti sistema ti imiunidad. Rimsua ti tema maipapan iti panangyalison iti dara. Kalpasan ti klase, imbagak iti maestrok ti maipapan iti maysa kadagiti video-tayo maipapan iti dara. Kabigatanna, intugotko dayta iti eskuelaan, ket inyawid ti maestrok ken binuyada a sangapamiliaan. Iti simmaganad nga aldaw, intugotna idiay eskuelaan sana impabuya iti dua a klase, agraman iti klasemi. Kalpasanna, nagsayaat ti nasaona maipapan kadagiti Saksi ni Jehova. Imbagana iti klase a no saan a gapu kadagiti Saksi ni Jehova, saan koma a nalaka a magun-odan dagiti pangsandi iti panangyalison. Idi insublina ti video kaniak, dinamagna, ‘Kasano a maaddaanak iti kopia para iti libraria ti eskuelaan?’ Inikkak iti kopia. Naragsakan iti dayta, ket naragsakanak met!”

Karaman da Holly, Jessica, ken Melissa kadagiti adu nga agtutubo a Saksi ni Jehova a mangan-annurot iti pammagbaga ti Biblia a laglagipenda ti Namarsua kadakuada. (Eclesiastes 12:1) Ar-aramidem met aya dayta? No kasta, masiguradom a maparagsakmo ti puso ni Jehova.​—Proverbio 27:11; Hebreo 6:10.

No dakayo nga agtutubo iranranudyo ti pammatiyo kadagiti kaeskuelaanyo ken mannursuroyo, makaipaay dayta iti nabileg a panangsaksi maipapan ken ni Jehova a Dios ken kadagiti panggepna. Pabilgenna met ti pammatiyo, ken maipagpannakkelyo ti nagsayaat a pribilehio a kadua dagiti adipen ti Dios. (Jeremias 9:24) Mangsalaknib met ti panangasaba idiay eskuelaan. Kastoy ti kuna ni Jessica: “Maysa a pagimbagan ti panangiranudko iti patpatiek isu a saandakon a piliten dagiti estudiante a mangaramid kadagiti banag a maikontra iti Biblia.”

[Dagiti Ladawan iti panid 12]

Ni Holly

[Dagiti Ladawan iti panid 12]

Ni Jessica

[Dagiti Ladawan iti panid 13]

Ni Melissa