Manipud Kadagiti Agbasbasa

Aglawlaw Ti serye a “Kabaelantayo Kadi nga Ispalen ti Aglawlawtayo?” ket naisangsangayan kaniak. (Nobiembre 22, 2003) Il-iliwek ti tiempo inton dalusan ni Jehova daytoy napintas a daga ken isublina ti damo a kasasaad dayta. Maldaangak a makakita iti panangdadael ti tattao iti pagnanaedantayo a daga!

D. L., Britania

Sangapulo ket lima ti tawenko, ken diak idi basbasaen ti dadduma a ruar ti Agriingkayo! Ngem kalpasan a binasak daytoy a serye, kayatko a basaenen a regular dayta! Dagiti artikulo ti nangisuro kaniak iti nagadu a makapainteres a banag maipapan iti planetatayo. Idi agangay, inusarko daytoy nga impormasion idiay eskuelaan ket nakaawatak iti nangato a grado.

S. V., Ukraine

Multiple Sclerosis Pangngaasiyo ta awatenyo ti naimpusuan a panagyamanko gapu iti artikulo a “Panangandur iti Multiple Sclerosis.” (Nobiembre 22, 2003) Dandani makatawenen sipud idi nadayagnos nga addaanak iti kasta a sakit. Saankon a makuti dagiti takkiag, ken gurongko, sa din makakita ti kannigid a matak. Sakbayna, masansan a negatibo ti mapanunotko. Ngem kas iti insingasing ti artikuloyo, ikagkagumaak a pagtalinaeden ti kinamanagpakatawak ken agpanunotak kadagiti positibo a banag. Pagyamanan iti makaparegta nga artikulo.

M. A., Japan

Sangapulo ket uppat a tawenen nga agsagsagabaak iti daytoy a sakit. Nupay kasta, daytat’ saan nga ammo ti kaaduan ditoy Japan. Isu nga idi naammuak nga addan daytoy nga artikulo, imbagak ken ni lakayko ken kadagiti gagayyemko iti kongregasion. Ita, ad-addan a mannakipagrikna ken tultulongandak dagiti gagayyemko.

N. S., Japan

Siuumiso ti panangdeskribir daytoy nga artikulo iti multiple sclerosis agraman ti ikakarona ken dagiti pagbanaganna! Nasungbatan met laengen dagiti saludsod a pampanunotek la idi iti adun a tawen. Imbaga kaniak ti adu kadagiti kasingedan a gayyemko a dida ammo idi no ania ti nairaman iti MS.

M. W., Alemania

Maysaak nga agsolsolo nga ina ti tallo nga annak. Nabasak daytoy nga artikulo bayat nga addaak iti ospital kabayatan ti maikapat a pannakaatakek iti MS. Nagustuak unay ti artikulo. Nupay kasla karkarna, ti kaadda daytoy a sakitko ti nangpasinged iti relasionko ken ni Jehova ken nangpapigsa iti panagtalekko kenkuana.

M. H., Alemania

Makatulong daytoy nga artikulo kadagidiay naapektaran iti MS a kas kadakami. Nupay agus-usarakon iti wheelchair, makipaspasetak iti amin tiempo a trabaho a panangasaba, a masansan nga idiay balay babaen iti telepono. Gapu iti paralisisko, maysa a Kristiano a kabsat a babai ti nangisurat iti daytoy para kaniak.

M. G., Francia

Agarup 21 a tawenen sipud idi nadayagnos ti sakitko nga MS. Agserserbiak kas maysa a Kristiano a panglakayen, ngem sidudungngo a pinalag-an dagiti kakabsat ti trabahok tapno saan a kumaro ti sakitko. Anian a nagsayaat ti tiempo inton, kas iti kinuna ti Isaias 33:24, “awanen ti agnanaed nga agkuna: ‘Masakitak’”!

E. C., Estados Unidos

Didigra Idiay Mississippi Naklaatak iti artikulo nga “Idi Nagpasurong ti Panagayus ti Karayan.” (Nobiembre 22, 2003) Gapu iti dayta, naammuak ti kinapigsa ti nakaparsuaan ken no kasano nga awan gaway ti tao no maipasango iti kalamidad. Ti artikuloyo ti nangpabileg iti determinasionko nga agtalek iti Biblia.

M. J., Mauritania

Nupay dagiti naisalaysay ket napasamak dandani 200 a tawenen ti napalabas, kas man la insalaysay ida ti maysa a nakasaksi. Bayat a basbasaek ti artikulo, nariknak a kasla addaak sadiay a mangikagkagumaan a lumung-aw iti kinadawel ti karayan. Nagagaranak a nangbasa iti tunggal parapo.

V. R., Russia