Nagpatulong ti Maysa nga Abogado

Gapu ta naldaang ti maysa nga abogado iti iyaadu dagiti agdiborsio, kastoy ti insuratna iti sanga nga opisina dagiti Saksi ni Jehova idiay Brazil: “Adu kadagiti klientek nga umay iti opisinak ti mangipagpagnan iti panagsinada. Makapaupay unay ti panagdengngegko kadakuada a mangisalaysay kadagiti makagapu ti panagsinada, kas iti manmano a panagtungtongda ken ti saan a napudno a panaginnayatda. Naan-anay a dida ammo ti pammalakad kadagiti publikasionyo.”

Yantangay am-ammona dagiti Saksi ni Jehova, nagsurat ti abogado: “Agyamanak no mabalin a patulodandak iti publikasion a mabalinko nga ited kadagiti klientek tapno makatulong kadakuada nga agpanunot maipapan iti kinapateg ti panagasawa, mangusig manen iti desisionda, ken mangtagiragsak manen iti naurnos ken naragsak a panagbiag.”

No kayatmo a maammuan ti napateg a balakad ti Biblia no kasano a matagiragsak ti naballigi a panagasawa, maragsakankami a mangipatulod kenka iti libro a Ti Sekreto ti Kinaragsak iti Pamilia. Usigenna ti dua a kangrunaan a makatulong tapno makapagbiag ti agassawa a siraragsak ken mangted iti gundaway a masagrapda ti adu a bendision. Mabalinmo ti agkiddaw iti daytoy a libro babaen ti panangsuratmo iti naipakuyog a kupon ken panangibusonmo iti dayta iti adres a makita iti kupon wenno iti maitutop nga adres a nailista iti panid 5 daytoy a magasin.

□ Kayatko ti maaddaan iti libro a Ti Sekreto ti Kinaragsak iti Pamilia.

□ Interesadoak iti libre a panagadal iti Biblia.