Ti Panangmatmat ti Biblia

Ti Aya Diborsio ti Solusion?

IDIAY Britania, adda ministro a nangpasangbay kadagiti dimmar-ay iti maysa a seremonia. Timmakder iti sanguananna ti maysa nga agassawa, a kadua dagiti nasinged a gagayyem ken annakda. Addada aya iti naragsak a kasar? Saan! Daytoy a seremonia ket panangbigbig iti pannakaukas ti panagasawada. Wen, nagbalinen a gagangay unay ti diborsio ta iti dadduma a simbaan, nangaramidda payen kadagiti seremonia ti panagdiborsio!

Pangpanggepenyo aya ti makidiborsio? No kasta, agpayso aya a naragragsakto ti biagyo no naukasen ti panagasawayo? Adda aya dagiti praktikal a pamuspusan tapno agbalinkayo a naragsak nga agassawa?

“Masapul nga Agbalinda a Maymaysa a Lasag”

Idi nagkasar ti immuna a pagassawaan, kinuna ti Dios a ti lalaki “masapul a makitipon iti asawana ket masapul nga agbalinda a maymaysa a lasag.” (Genesis 2:24) No kasta, ti panagasawa ket maysa a permanente a singgalut. Dayta ti makagapu a kinuna ni Jesus idi agangay a ti “pannakiabig” ti kakaisuna a pangibasaran iti Nainkasuratan a diborsio nga addaan iti posibilidad a makiasawa ti maysa a tao.​—Mateo 19:3-9. *

Ipaganetget daytoy ti kinapateg ti pannakikumit iti panagasawa. Ngem kasano ngay no nakaro unay dagiti parikut iti panagasawayo?

Nainsiriban Aya ti Panagdiborsio?

Nangipaay ni Jesus iti prinsipio a mabalin a  pangtingitingantayo iti kinapateg dagiti aramidentayo idi kinunana: “Ti kinasirib mapaneknekan a nalinteg babaen iti ar-aramidna.” (Mateo 11:19) Ania ti ipasimudaag dagiti resulta ti kasta unay nga iyaadu ita dagiti agdiborsio nga awan dagiti nainkalintegan a nakaibasaranna?

“Aglablabes dagiti opinion maipapan iti pagimbagan ti diborsio,” kuna ni Linda Waite a propesor iti sosiologo idiay University of Chicago, a nangidaulo iti grupo dagiti eskolar a nangadal kadagiti di naragsak a panagasawa. Umasping iti dayta, kalpasan ti panangbusbosna iti 11 a tawen a nanganag iti sungbat ti rinibu a tattao, natakuatan ti propesor idiay University of Oxford a ni Michael Argyle a “dagiti nagdiborsio wenno nagsina ti kalilidayan iti kagimongan.” Apay a kasta?

Nupay mabalin a pukawen ti diborsio ti dadduma a parikut, mabalin a mangpataud met iti agsasaruno a nakalkaldaang a pasamak a mabalin a saanmo a malapdan. Kinapudnona, ipakita ti panagsirarak a ti diborsio masansan a dina kissayan dagiti sintoma ti depression wenno dina papigsaen ti panagraem ti maysa iti bagina.

Uray no saan a “perpekto ti panagasawayo,” mabalin nga adu ti pagimbaganna no saankayo nga agsina. Maragsakan ti adu a determinado a mangaramid iti kasta. Kinuna ni Propesor Waite: “Nagadu a parikut ti narisut idi agangay, ken naragragsak dagiti agassawa.” Kinapudnona, ipakita ti maysa a panagadal a dandani 8 iti kada 10 a “nakalidliday” ti panagasawada ngem dida nagdiborsio ti “rimmagsak ti panagasawada” lima a tawen kalpasanna. No kasta, nupay adda dagiti nakaro a parikut, nasayaat no saan a dagus nga agdiborsio dagiti agassawa.

Dagiti Praktikal a Pamuspusan

Dagidiay agpangpanggep nga agdiborsio rumbeng a saludsodanda ti bagida no realistiko dagiti namnamaenda iti panagasawa. Ti media intandudona ti ladawan ti romantiko a relasion a ti tampokna ket engrande a kasar nga agngudo kadagiti sarsarita nga agbiagdan a siraragsak. Kalpasan ti kasar, no masaaw dagiti nangato a namnamaenda, pannakapaay ti pagtungpalanna ket mabalin a mangrubrob iti susik. Bayat a kumarkaro, ad-addan a paturayenda dagiti nasair a rikna. Agkupasen ti panagayat, ket inton agangay, agarin ti pungtot ken gura. Iti sidong dagita a kasasaad, mabalin a marikna ti dadduma a ti diborsio ti kakaisunan a pamuspusan.​—Proverbio 13:12.

Imbes a paturayem dagiti negatibo a riknam, makilangenka kadagidiay nabileg ti pannakikumitda iti panagasawada. Naidagadag kadagiti Kristiano nga ‘itultuloyda a liwliwaen ti maysa ken maysa ken pabilgen ti maysa ken maysa.’ (1 Tesalonica 5:11) Kinapudnona, dagidiay nariribuk ti panagasawada kasapulanda ti pammabileg dagiti kapammatianda.

Ti Kinapateg Dagiti Nadiosan a Kalidad

“Kawesanyo ti bagbagiyo kadagiti kinalailo ti pannakipagrikna, kinamanangngaasi, kinapakumbaba iti panagpampanunot, kinaalumamay, ken mabayag a panagitured,” indagadag ni apostol Pablo. (Colosas 3:12) Dagiti nadiosan a kalidad masalaknibanda ti kinaurnos ti panagasawa kabayatan dagiti nariribuk a panawen.

Kas pagarigan, insurat ni Pablo: “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali.” (Colosas 3:13) Kuna ti eksperto iti panangadal iti isip ken kababalin idiay University of Michigan a ni Christopher Peterson: “Ti panangpakawan ti kangrunaan a kalidad a panggun-od iti kinaragsak.”

Ti kinaasi, kinadungngo, ken panangpakawan ti mangiturong iti ayat, ti “naan-anay a singgalut ti panagkaykaysa.” (Colosas 3:14) Sigurado a siraragsak nga agin-innayatkayo idi. Mabalinyo kadi a patanoren manen dayta a nariknayo idi? Papigsaenyo ti pakinakemyo kasano man karigat ti kasasaadyo. Adda namnama. Kinapudnona, no agtalinaedkayo nga agkatakunaynay ken kanayon nga iyaplikaryo dagiti prinsipio ti Biblia, naragragsakkayto ngem iti impagarupyo. Kinapudnona, dagiti panagreggetyo iti daytoy a benneg ti mangparagsak iti Nangyurnos iti panagasawa a ni Jehova a Dios.​—Proverbio 15:20.

[Footnote]