Ania ti Vitiligo?

Babaen iti mannurat ti Agriingkayo! idiay South Africa

▪ No dadduma, makapakatawa ti panangdeskribir ni Sibongile iti kasasaad ti kudilna. Siiisem a mangibaga, “Nayanakak a nangisit ngem nagbalinak a puraw isu a mariroak itan.” Isut’ addaan iti vitiligo.

Ti vitiligo, a maawagan met iti leukoderma, ket maigapu iti pannakaibus dagiti mangpataud iti kolor a selula iti kudil. Gapu iti dayta, aglabanglabang ken kasla agkamanaw ti kudil. Iti dadduma a pasiente, saan a pulos a kumaro ti kasasaad apaman nga agparang ti maysa a kasla kamanaw. Ngem iti dadduma, nagbiit nga agwaras dayta iti intero a bagi. Kaskasdi, dadduma ti mabalin nga agsagaba iti nabambannayat a kita iti vitiligo nga agtultuloy nga agwaras iti adu a tawen. Saan a nasakit wenno makaakar dayta.

Saan nga amin a vitiligo ket madlaw a kas iti vitiligo ni Sibongile. Ngamin, madlaw unay dayta iti kudil dagiti nangisit a tattao. Ngem nadumaduma ti epektona iti adu a tattao. Sigun iti estadistika, 1 agingga iti 2 a porsiento iti populasion dagiti nataengan ti naapektaran. Awan ti puli a pilpilien ti vitiligo ken apektaranna ti amin, lallaki man wenno babbai. Agingga ita, awan pay ti naammuan a makagapu iti dayta.

Nupay awan ti sigurado nga agas ti vitiligo, adu ti pamuspusan a pangtaming iti dayta. Kas pagarigan, kadagiti napudaw a pasiente, ad-adda a madlaw dayta no ti kudil ket kimmayumanggi gapu iti panagkainaran. Isu a makatulong ti saan a panagkainaran tapno saan unay a madlaw dayta. Kadagiti nangisngisit a tattao, makatulong dagiti espesial a kosmetiko tapno saan a madlaw dayta no idilig iti kolor ti kudilda. Iti dadduma a pasiente, nagkurri ti maysa a proseso a maawagan repigmentation (panangbaliw iti kolor ti kudil). Daytoy a panangagas ramanenna ti adu a bulan a panangagas ken panangusar iti espesial nga alikamen a mangusar iti ultraviolet. Iti dadduma a kasasaad, nagsubli ti gagangay a kolor kadagiti paset ti naapektaran a kudil gapu iti daytoy a panangagas. Ikeddeng ti dadduma a pasiente ti maipasidong iti proseso a depigmentation. Babaen ti panangusar iti maysa a kita ti agas, panggep daytoy a pagpapadaen ti kolor ti kudil babaen ti panangdadael kadagiti nabatbati a selula a mangpataud iti kolor.

Madanagan dagidiay addaan iti vitiligo, nangruna no nagwarasen iti rupa. Inlawlawag ni Sibongile: “Iti nabiit pay, dua nga ubbing ti kimmita kaniak sada agririaw a nagtataray. Dadduma ti bumdeng a makisarita kaniak ta pagarupenda nga addaanak iti makaakar a sakit wenno nailunodak. No adda la koma pamuspusak a mangipaawat iti dadduma, saanda koma a kaariek dagiti tattao nga addaan vitiligo. Saanda a maakaran iti vitiligo babaen ti panangsagid wenno babaen ti angin.”

Saan nga ipalubos ni Sibongile a ti kasasaadna ti manglapped iti trabahona a panangisuro iti Biblia a kaay-ayona la unay kas maysa kadagiti Saksi ni Jehova. Ramanen daytoy ti isasarungkar kadagiti tattao iti pagtaenganda ken aktual a pannakisarita kadakuada. Kunana: “Naakseptarkon ti langak. Nasaysayaaten ti panagriknak iti agdama a kasasaadko, ket segseggaak ti tiempo inton naan-anay a maisubli ti gagangay a kolorko iti Paraiso a daga nga inkari ni Jehova a Dios.”​—Apocalipsis 21:3-5.

[Ladawan iti panid 22]

Idi 1967, sakbay a naaddaan iti vitiligo