Kindergarten nga Awanan Abalbalay

BABAEN ITI MANNURAT TI AGRIINGKAYO! IDIAY ALEMANIA

Maysa nga agsapa, idi simrek dagiti ubbing iti klaseda iti kindergarten, awanen ti nakitada kadagiti amin a kuarto malaksid kadagiti muebles. Nagbirokda kadagiti munieka, ay-ayam, wenno sinan–animal nga abalbalay a naselselan iti kapas ngem awan ti nasarakanda. Awan met dagiti libro wenno abalbalay a mabalin a sangalen. Awan pay papel ken kartib. Naikkat amin dagiti abalbalay ket saan a maisubli dagitoy iti las-ud ti tallo a bulan. Ania ti napasamak?

Daytoy a klase ti kindergarten ti maysa kadagiti umad-adu idiay Austria, Alemania, ken Switzerland. Makipaspasetda iti nakaskasdaaw ken mamagbalbaliw a proyekto a maawagan iti Kindergarten nga Awanan Abalbalay. Nupay kasla karkarna daytoy a proyekto, komendaran unay dagiti eksperto iti salun-at iti European Union, ta panggepna a lapdan ti pannakaadikto. Kadagiti kallabes a tawen, naamiris dagiti managsukisok a saan unay a maadikto dagiti tattao iti aniaman a banag no mapatanorda ti kinalaingda a makilangen iti padada a tattao bayat ti kinaubingda. Kuna ti report ti maysa a periodiko a karaman kadagitoy ti “kinasigoda a makikomunikar ken mangirugi iti saritaan, mangsolbar iti di pagkinnaawatan, manungsungbat iti aniaman nga inaramidda, mangikeddeng iti trabahuenda, makadlaw kadagiti parikut, agpatulong, ken mangsolbar.” Sigun kadagiti nangyussuat iti daytoy a programa, rumbeng a nasapa a mapatanor dagita a kinasigo, ket maibanag daytoy no awan dagiti abalbalay. Daytoy ti mangparegta iti panagpartuat ken panagtalek iti bagi.

Siaannad a naiplano ken nailawlawag kadagiti nagannak ken ubbing ti tallo a bulan a kinaawan dagiti abalbalay. Idi damo, saan nga ammo ti dadduma nga ubbing ti aramidenda no awan dagiti abalbalayda. “Adda dagiti pagaywanan a nagbalin a nakasuksukir dagiti ubbing iti umuna nga uppat a lawas,” ket dagiti nagplano kasla didan ammo nga ipamuspusan, kuna ti report. Ngem nairuam met laeng dagiti ubbing ken nasursuroda ti agpartuat. Gapu ta awan dagiti abalbalayda, agsasarita dagiti ubbing, agplanoda, ken agkakaduada nga agay-ayam, isu a nagbalinda a nasigo a makilangen ken makisarita. Mannakigayyem itan ti dadduma a “naipamaysa” laeng idi kadagiti ay-ayamda. Nakita met dagiti nagannak ti nasayaat a nagbalbaliwanda. Nasingsingpet dagiti ubbing iti panagay-ayamda, ken kunada nga ad-adda a managpartuatdan.