Ammoyo Kadi?

(Masarakan dagiti sungbat daytoy a pannubok kadagiti naipaay a teksto ti Biblia, ket nayimprenta iti panid 26 ti kompleto a listaan dagiti sungbat. Para iti kanayonan nga impormasion, kitaenyo ti publikasion nga “Insight on the Scriptures,” nga impablaak dagiti Saksi ni Jehova.)

1. Tapno maipaganetget kadatayo a ‘saantay koma nga agsubli iti bambanag a nalikudan,’ siasino ti indagadag ni Jesu-Kristo a laglagipentayo? (Lucas 17:31, 32)

2. Iti ilustrasion ni Jesus maipapan iti agmulmula, apay a nagango ti bukel a nagtubo iti kabatuan? (Marcos 4:5, 6)

3. Ania ti ipasimudaag ti panagtugaw ti napagungar a ni Jesus iti ‘makannawan’ ni Jehova? (Aramid 2:34)

4. Siasino ti kakaisuna a Suhita a nainaganan iti Kasuratan? (Job 8:1)

5. Ania ti impanagan ti Dios ken ni Jacob idi agtawen iti agarup 97? (Genesis 32:28)

6. Nupay impakita ni Saul a nasukir iti Dios ken an-anupenna ni David, apay a saan a pinatay ni David idi adda gundawayna? (1 Samuel 26:7-11)

7. Kas kaitungpalan ti sao ni Jehova, aniada nga animal ti nangalun-on ken nadangkes a Jezebel? (2 Ar-ari 9:36)

8. Ania ti kaunaan a nadakamat a pagsardengan dagiti Israelita iti pannagnada nga agturong iti Nalabaga a Baybay? (Exodo 12:37)

9. Kas kinuna ni Santiago, ania a porma ti panagdaydayaw ti ‘nadalus ken di natulawan iti panangmatmat ti Diostayo’? (Santiago 1:27)

10. Kaano ti naipakaammo ken Daniel a panagparang ken pannakagessat ti Mesias? (Daniel 9:24-27)

11. Ania ti imbaga ni Jesus a “maikaskasabanto iti intero a mapagnaedan a daga maipaay a pangsaksi kadagiti amin a nasion” sakbay ti panungpalan? (Mateo 24:14)

12. Ania “dagiti aramid ti lasag” a manglapped iti panangtawid ti maysa a tao iti Pagarian ti Dios? (Galacia 5:19-21)

13. Siuumiso nga ukomen ni Jehova ti maysa a tao gapu iti ania nga abilidadna? (1 Samuel 16:7)

14. Sakbay a napili kas mammadto, ania ti trabaho ni Amos? (Amos 7:14)

15. Ania ti kayat a sawen ni Jesus idi imbagana a dagiti adalanna masapul a ‘guraenda’ dagiti miembro ti pamiliada? (Lucas 14:26)

Dagiti Sungbat ti Pannubok

1. “Ti asawa ni Lot”

2. Agsipud ta awan ramutna isu a di makaandur iti nabara nga init

3. Agtakem ni Jesus iti kapatgan a saad a sumaganad ken ni Jehova a mismo

4. Ni Bildad ket maysa kadagiti tallo a kakadua ni Job

5. Israel

6. Ni Saul ti dinutokan ni Jehova, isu nga impabiang ni David ti banag ken Jehova

7. Dagiti aso

8. Succot

9. “Panangtaripato kadagiti ulila ken iti balo a babbai kadagiti rigatda, ken panamagtalinaed ti maysa iti bagina nga awanan mulit manipud iti lubong”

10. “Pitopulo a lawas”

11. “Daytoy naimbag a damag ti pagarian”

12. “Pannakiabig, kinarugit, nalulok a kababalin, idolatria, panangannurot iti espiritismo, guranggura, ringgor, imon, dagiti irarasuk ti unget, rinnupir, pannakabingbingay, dagiti sekta, ap-apal, panagbarbartek, naariwawa a panagragragsak, ken bambanag nga umasping kadagitoy”

13. “Kitaenna no ania ti puso”

14. “Pumapastor ken agkedkeddel kadagiti higos ti kaykayo a sikomoro”

15. Saan nga isuda ti maipangpangruna a maayat