“Dimi Kayat a Rambakan ti Halloween!”

BABAEN ITI MANNURAT TI AGRIINGKAYO! IDIAY BELGIUM

Dayta ti inkeddeng ti maysa a klase idiay Tienen, Belgium. Apay a kasta ti inkeddeng dagiti estudiante? Idiay Belgium, nabiit pay a maramrambakan ti Halloween wenno bisperas ti Todos los Santos. Kinapudnona, idi la Oktubre 31, 2002, ti damo a pannakaselebrar dayta iti daytoy nga eskuelaan. Isu a sakbay a dimteng dayta nga aldaw, inikkan ti maestra dagiti amin nga ubbing iti maysa a proyekto maipapan iti Halloween. “No ad-adda a nakabutbuteng ken karkarna, nasaysayaat!” kinunana.

Ni Matthias, nga agtawen iti 10 ti maysa kadagiti ubbing iti klase. Nalagipna nga adda nabasana idi iti Oktubre 8, 2001, a ruar ti Agriingkayo! maipapan kadagiti di madmadlaw a peggad dagiti nalatak a rambak a kas iti Halloween. Naammuanna nga adda dagiti banag a di makaay-ayo iti Dios a nairaman iti Halloween. Isu a para iti proyektona, nangisurat ni Matthias ti report a naibasar kadagiti artikulo. Kalpasan a binasa a naimbag ti maestrana ti impormasion, imbaga ti maestra ni Matthias a ti Halloween ket saan gayam a rambak a pagraragsakan laeng kas iti gagangay a pagarup. Kiniddawna ngarud a ti topiko ket ipalawag ni Matthias iti klase.

Idi rinugian ni Matthias ti agpalawag, kasla di dumdumngeg ti dadduma a kaklasena. Ngem bayat ti panangitultuloyna, naan-anay a naginteres ti amin iti panangilawlawagna. Idi nalpas, dinamag ti maestra no kayatda pay a rambakan ti Halloween. Simmungbat ti intero a klase iti “Saanen!” Kinuna ti maysa a kaklasena: “Nakaam-amak!” Kinuna ti sabali: “Ita la a naammuak a no Halloween, saan gayam a maipakpakita ti panagraem kadagiti natayen.”

Managbabain idi ni Matthias. Gapu iti daytoy a kapadasan, naparegta a mangsalimetmet iti pammatina a naibasar iti Biblia nupay masuot no dadduma. Kas maysa kadagiti Saksi ni Jehova, nagun-odanna met ti dakdakkel a panagraem ti maestrana ken dagiti kaklasena.