“Jehova, Nasarakannak!”

Kas insalaysay ni Nelly Lenz

“Saksi ni Jehova-kayo kadi?” Dayta ti dinamagko iti dua a lallaki nga immay idiay balaymi. “Wen,” kinunada. Siraragsak nga imbagak, “Saksi-ak met!” Agtawenak la idi iti 13 ken diak pay napan nakigimong iti Kingdom Hall. Saan a Saksi ni Jehova ti dadakkelko. Apay ngarud nga imbagak a Saksi-ak?

NO SAAN a gapu kadagiti Saksi ni Jehova, nalabit diak koma naipasngay. Insikognak ni nanangko idi agnanaed idiay Montreal, Quebec, Canada. Agtawen la idi iti 17. Nakaro ti panangpilit ti pamiliana nga iregregnak. Immanamong.

Kiniddaw ni Nanang iti amona nga agbakasion iti maysa nga aldaw tapno agparegreg. Ti amona, a maysa kadagiti Saksi ni Jehova, nabatad a naammuanna no apay a kayat ni nanangko ti agbakasion. Apagbiit nga imbagana ken Nanang ti kinapateg ti sagut a biag. (Salmo 139:13-16) Idi agturturongen iti klinika, pinampanunot ni Nanang ti imbaga ti amona. Inkeddengna a di agparegreg. Iti pannakaipasngayko idi 1964, impaamponnak ni nanangko.

Damo a Pannakaammok iti Kinapudno iti Biblia

Idi agarup dua ti tawenko, ni nanang ken ti kabbaro nga asawana inruardak idiay pagamponan. Bayat nga agnanaedkami idiay Sainte-Marguerite-du-Lac-Masson, rinugianda ti nakipagadal iti Biblia kadagiti Saksi ni Jehova ken timmabuno kadagiti gimong ti kongregasion. Ngem di nagbayag, immakarkami idiay Boisbriand, isu a simmardeng a nakipagadal ti dadakkelko.

Sumagmamano a tawen kalpasanna, intuloyda ti nakipagadal. Dimngegak tapno maammuak ti maibagbaga maipapan iti namnama nga ipaay ti Biblia maipapan iti paraiso a daga. (Lucas 23:43) Natignayak a mangayat unay ken Jehova.

Ngem maysa nga aldaw, imbaga kaniak ni Nanang a simmardengdan a makipagadal kadagiti Saksi ket saankamin a mapan idiay Kingdom Hall. Idi damo, naragsakanak. Kas maysa nga ubing nga agtawen iti walo, mariknak a napaut unay dagiti gimong. Ngem iti dayta a rabii, kayatko ti agkararag ken Jehova, ngem madanaganak di la ket ta dinak denggen.

Iti simmaganad a malem ti Domingo, nakitak dagiti kaarrubami a Saksi ni Jehova a mapan makigimong idiay Kingdom Hall. Nagsangitakon ket kiniddawko iti Dios, “Apay a mabalin a makigimong dagiti annakda idinto ta saanak a makapan?” Nupay kasta, talaga a pimmayso ti sasao ti Salmo 33:18: “Adtoy! Ti mata ni Jehova situturong kadagidiay agbuteng kenkuana, kadagidiay agur-uray iti naayat a kinamanangngaasina.”

Panagsublik Idiay Kingdom Hall

Kalpasan ti tallo a lawas, pinasiarko dagiti kaarrubak ket imbagak iti ina a ni Lilianne, a kayatko ti makigimong. Inlawlawag ni Lilianne nga imposible dayta, ta din kayat ni nanangko ti makitimpuyog kadagiti Saksi ni Jehova. Ngem impapilitko. Isu nga inyawidnak ket kiniddawna ken Nanang no mabalinko ti kumuyog kadakuada. Nasdaawak ta immanamong ni Nanang. Imbagana a makasursuroak kadagiti naimbag a prinsipio kadagiti gimong. Isu a Dinomingo a nakigimongak.

 Nakigimgimongak iti agarup tallo a tawen. Ngem idi agtawenakon iti 11, nagsina ti dadakkelko ket immakarkami ken ni nanangko. Diak manen nakalangen dagiti Saksi ni Jehova.

Di Ninamnama a Panagrana

Maysa nga aldaw, agtugtugawak iti makinsango nga agdan ti balaymi idi immay ti dua a Saksi​—da Eddie Besson ken Don Fisher​—ket dinamagda no adda dagiti dadakkelko. Idi imbagak nga awanda, pimmanawen dagiti lallaki. Ngem kinamatko ida, ket nagsasaritakami kas iti nadakamatko iti pangrugian.

Kaawatan a nasdaaw dagiti lallaki ta imbagak a maysaak a Saksi ni Jehova. Inlawlawagko ti kasasaadko ket nagpakpakaasiak nga agsublida karabiyanna. Idi imbagak ken Nanang nga umay sumarungkar dagiti Saksi, madanagan sana imbaga a dina pastreken ida iti balay. Kinapudnona, inkeddengna ti pumanaw sakbay a sumangpetda. Makasangsangitak a nagpakaasi ken Nanang a saan a pumanaw. Idi agsagsaganan a pumanaw, adda nagtimbre iti ridaw, ket addan sadiay ni Eddie Besson. Agasem ti ragsakko idi immannugot ni Nanang a makipagadal iti Biblia!

Kamaudiananna, mabalinko manen ti makigimong! Ngem awan pay ti makatawen, simmardeng manen ni nanangko a nakipagadal. Iti daytoy a tiempo, pinaritannak a makipagkita kadagiti Saksi ket imbellengna ti amin a masarakanna a publikasion dagiti Saksi ni Jehova. Ngem nakailemmengak iti maysa a Biblia, maysa a pagkantaan, dua a tomo ti Pagwanawanan, dua a Tinawen a Libro Dagiti Saksi ni Jehova, ken ti libro a napauluan Ti Kinapudno a Mangiturong iti Biag nga Awan Inggana. * Bayat ti naudi a pannakipagadalko, dinamagko ken Eddie Besson no ania ti mabalinko nga aramiden, yantangay ay-ayatek unay ni Jehova. Pinaregtanak nga agadal a bukodko ken agkararag a masansan. Impanamnamana nga aywanannak ni Jehova. Agtawenak la idi iti agarup 14.

Panangikondukta Kadagiti Bukodko a “Gimong”

Sipud idin, Dinomingo a sumrekak iti kuartok ket panunotek a makigimgimongak. Kantaek ti kanta a “Matmatanyo ti Gunggona!” iti pangrugian ken ngudo ti gimong ta dayta la ti kanta ti Pagarian nga ammok a kantaen. Agingga ita, makasangitak no kantaek dayta. Adalek met dagiti artikulo iti tomo ti Pagwanawanan nga adda kaniak. Serraak ti ‘gimongko’ babaen iti kararag. Isu nga uray no diak makitimtimpuyog idin kadagiti Saksi, mariknak nga asideg kaniak ni Jehova.

Idi agtawenakon iti 17, immakarkami ken ni Nanang idiay Montreal. Narigat dagidi a tawen, ta awan ti ayat iti pagtaenganmi.

Nasarakannak!

Maysa nga aldaw inawat ni Nanang ti libro a Mabalinmo ti Agbiag nga Agnanayon iti Paraiso a Daga manipud kadagiti Saksi ni Jehova. Idi nagawidak, nakitak dayta iti lamisaan isu a sinukimatko. Idi nakitak a nailanad iti dayta ti nagan ti Dios a Jehova, nakasangitak ket siuulimek a nagkararagak, “Jehova, nasarakannak!”

Masapul a makipagkitaak kadagiti Kristiano a kakabsatko. Ngem kasano? Imbaga ni Nanang kaniak a mabalin a Saksi ni Jehova ti kaarrubami. Isu nga idi mapanak agtrabaho, dimmagasak iti balay ti kaarrubami ket nagtimbreak iti ridaw. Rimmuar ti maysa a lalaki a makaturturog. Anian a siddaawna idi imbagak a maysaak a Saksi ni Jehova ket kayatko ti agbautisar! Inyurnosna ti maysa a Kristiano a kabsat a babai nga agnagan iti Josée Miron a mangyadal kaniak iti Biblia. Ngem binusor manen ni Nanang ti panagadalko iti Biblia. Imbagana kaniak a masapul nga agurayak agingga nga agtawenak iti 18 sakbay nga agbalinak a Saksi.

Naragsak a Biag ti Pamilia Ngem Paglikudak ni Jehova?

Nadlaw ti amok a dumakdakes ti kasasaadko iti pagtaengan. Masansan nga awisennak a makikadua kadakuada nga agassawa kadagiti ngudo ti lawas. Gapu ta pagay-ayatko dagiti kabalio, masansan nga agkakaduakami nga agkabalio. Nariknak a kas man la dadakkelko ida.

Maysa nga aldaw, imbaga kaniak ti amok ken ti asawana nga ay-ayatendak unay ket kayatda a makipagnaedak kadakuada. Ituktukonna kaniak ti  nabayagen nga il-iliwek​—ti naayat a pamilia. Ngem adda kondision​—masapul nga isardengko ti makitimpuyog kadagiti Saksi ni Jehova. Inikkandak iti makalawas a mangtingiting iti tukonda, ngem diak pay kasapulan ti maysa nga aldaw. Dagus a sinungbatak ida. Dinak pulos binaybay-an ni Jehova, isu a diak met mabalin a baybay-an.

Ti Panagserbik iti Dios

Gapu iti rigat a mapaspasarak iti pagtaenganmi, nakipagnaedak iti agsiuman kaniak. Pinaregtanak a mangituloy iti pannakipagadalko, ket idi Disiembre 17, 1983, nabautisaranak idi agtawenak iti 19. Naragsakanak unay a makakita ken ni Eddie Besson idi aldaw a nabautisaranak. Saanen nga agduadua a maysaak kadagiti Saksi ni Jehova!

Nupay kasta, nagbaliw ti kababalin ti agsiuman kaniak kalpasan a nabautisaranak. No makitanak nga agkarkararag, agsao iti nakalalaaw ken barsakennak pay! Impapilitna nga itultuloyko ti ageskuela, a dayta ti manglapped iti kalatko nga agbalin a payunir, maysa nga amin-tiempo nga ebanghelisador. Idi agangay, kiniddawna a pumanawak iti balay. Inikkannak iti tseke a $100 ket imbagana kaniak a no isukatko dayta, maammuakto a binaybay-annak ni Jehova.

Nagbalinak a payunir idi Setiembre 1, 1986, ket adda pay la kaniak dayta a tseke​—diak insuksukat agingga ita! No dadduma, narigat ti agpayunir kadagiti probinsia no awan ti luganmo. Ngem manangsuporta ken manangandingay unay dagiti kakongregasionko.

Idi agangay, naam-ammok ti nasingpet a Kristiano a lalaki nga agnagan iti Ruben Lenz. Nagkallaysakami idi 1989. Ni Ruben ket agserserbi ita a panglakayen iti kongregasion ti Milton, Ontario, Canada, a pagnanaedanmi sipud idi 2002. Ti panagasawami ti maysa kadagiti kasayaatan a bendision ni Jehova kaniak. Intultuloyko ti panagserbik iti amin-tiempo agingga a naaddaankami iti anak a ni Erika, idi 1993. Nasurok la bassit a tallo a tawen, naaddaankami iti anak a lalaki a ni Mika. Kalpasan ti napaut a kinaliday, sibabaknang a pinaraburannak ni Jehova a Dios iti pamilia a mangay-ayat unay kenkuana a kas kaniak.

Nupay masansan a maisinaak iti ili ni Jehova idi dumakdakkelak, diak pulos insardeng ti pananginanamak iti Dios ken panagtalinaedko a manginanama iti biag nga agnanayon iti Paraiso. (Juan 3:36) Anian a yamanko ta “nasarakannak” ni Jehova!

[Footnote]

[Ladawan iti panid 15]

Nakasakayak iti kabalio ti amok

[Ladawan iti panid 15]

Kaduak ni lakayko a Ruben, ken ti annakmi a da Erika ken Mika